(ស្វាយរៀង)៖ លោកបណ្ឌិត សម តារា សមាជិកគណៈកម្មាធិការកណ្តាល អនុប្រធានក្រុមការងារគណបក្សចុះមូលដ្ឋាន ខេត្តស្វាយរៀង សមាជិកសភាមណ្ឌលស្វាយរៀង អនុប្រធានគណៈកម្មការទី១ នៃរដ្ឋសភា និងលោកស្រី, លោកបណ្ឌិត ជ័យ សុន សមាជិកគណៈកម្មាធិការកណ្តាល អនុប្រធានក្រុមការងារគណបក្សចុះមូលដ្ឋាន ខេត្តស្វាយរៀង សមាជិកសភាមណ្ឌលស្វាយរៀង និងលោកស្រី ឯក សុវណ្ណភារៈ អនុប្រធានក្រុមការងារ គណបក្សចុះមូលដ្ឋានខេត្តស្វាយរៀង សមាជិកសភា មណ្ឌលស្វាយរៀងនៅព្រឹកថ្ងៃទី១៩ ខែកញ្ញា ឆ្នាំ២០២៥ បានអញ្ជើញនាំយកបច្ច័យ និងទេយ្យទានប្រគេនព្រះសង្ឃ និងឧបត្ថម្ភថវិកាជូនអ្នកចូលរួម ក្នុងពិធីបុណ្យកាន់បិណ្ឌវេនទី១២ នៅវត្តស្វាយបុទុម (ហៅវត្តព្រៃរបស) ឃុំត្នោត ស្រុកកំពង់រោទិ៍។

ពិធីកាន់បិណ្ឌនេះមានការចូលរួមពីលោក ប៊ុន សាវ៉ាន់ សមាជិកគណៈប្រចាំការគណៈអចិន្ត្រៃយ៍គណបក្សខេត្ត ក្រុមការងារ គណបក្សថ្នាក់ខេត្ត ថ្នាក់ស្រុក ថ្នាក់ឃុំ និងពុទ្ធបរិស័ទជំណុះ ជើងវត្ត។

ក្នុងឱកាសនោះលោកបណ្ឌិតសម តារា បានថ្លែងថាពិធីបុណ្យកាន់បិណ្ឌ និងភ្ជុំបិណ្ឌ ជាពិធីបុណ្យដ៏ធំមួយក្នុងចំណោមពិធីបុណ្យប្រពៃណីខ្មែរផ្សេងទៀត ពិធីបុណ្យកាន់បិណ្ឌ ភ្ជុំបិណ្ឌ នេះមានរយៈពេល១៥ថ្ងៃ ដោយចាប់ពីថ្ងៃ១រោច ដល់ថ្ងៃ១៥រោច ខែភទ្របទ។ ប្រជាពលរដ្ឋខ្មែរ តែងតែប្រារព្ធពិធីបុណ្យភ្ជុំបិណ្ឌនេះជាប្រចាំរៀងរាល់ឆ្នាំដែលទម្លាប់ទាំងនេះ គឺបានអនុវត្តជាយូរយាណាស់មកហើយ។

ពិធីបុណ្យភ្ជុំបិណ្ឌនេះ ក៏បានឧទ្ទិសដល់ពពួកប្រែតអសុរកាយ និងឧទ្ទិសមហាកុសលជូនដល់លោកអ្នកមានគុណទាំងឡាយ មានមាតាបិតា ជីដូនជីតា ញាតិកាលទាំង៧សណ្តាន ដែលបានចែកឋានទៅហើយនោះ និងជួយរំដោះឱ្យរួចចាកផុតពីទុក្ខទោសទាំងឡាយ ដើម្បីបានទៅកាន់សុខគតិភពថ្មី។

លោកបណ្ឌិត បានបន្តថា លោក និងក្រុមការងារ បានមកកាន់បិណ្ឌទី១២ នៅវត្តស្វាយបុទុម (ហៅវត្តព្រៃរបស) ឃុំត្នោត ស្រុកកំពង់រោទិ៍ ខេត្តស្វាយរៀង ក៏ដើម្បីបួងសួងឧទ្ទិសមគ្គផល កុសលផលបុណ្យ ទៅដល់វីរកងទ័ពដែលបានពលីជីវិតក្នុងសមរភូមិជួរមុខផងដែរ។

លោកបណ្ឌិតបានបញ្ជាក់ថា សុខសន្តិភាពពិតជាមានតម្លៃដ៏មហាសាល មានសន្តិភាពទើបមានការអភិឌ្ឍ និងប្រជាពលរដ្ឋអាចគោរពប្រតិបត្តិសាសនាតាមជំនឿរៀងៗខ្លួនបាន។ ជាមួយគ្នានេះ សូមថ្លែងអំណរគុណ យ៉ាងជ្រាលជ្រៅបំផុត ចំពោះស្ថាបនិកក្នុងការរកបាននូវសន្តិភាពជូនប្រជាពលរដ្ឋ ដែលមានសម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចធីបតី ហ៊ុន ម៉ាណែត ជានាយករដ្ឋមន្ត្រី ដូចនេះប្រជាពលរដ្ឋទាំងអស់គ្នា ត្រូវតែការពារនូវសុខសន្តិភាពដែលមាននាពេលបច្ចុប្បន្ននេះជារៀងរហូត ហើយក៏មិនអាចឱ្យក្រុមណាមកបំផ្លាញសន្តិភាពបានឡើយ។

សូមបញ្ជាក់ថា នៅក្នុងពិធីបុណ្យកាន់បិណ្ឌវេនទី១២ នេះសរុបថវិកាទាំងអស់មានចំនួន ៦.៧០០.០០០រៀល ក្នុងនោះថវិកាលោកបណ្ឌិត សម តារា និងលោកស្រីចំនួន ៤.៦៨០.០០០រៀល, លោកបណ្ឌិត ជ័យ សុន ចំនួន ៩០០.០០០រៀល, លោកស្រីឯក សុវណ្ណភារៈ ចំនួន ១.០២០.០០០រៀលនិង លោក ប៊ុន សាវ៉ាន់ចំនួន១០០០០០រៀលផងដែរ៕