(កំពង់ស្ពឺ)៖ លោកបណ្ឌិត តូច ប៉ូលីវ៉ា អភិបាលរងខេត្តកំពង់ស្ពឺ និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តកំពង់ស្ពឺ បានថ្លែងបញ្ជាក់ថា ការជួយជំរុញ និងប្រើប្រាស់ App NoDrug គឺជាការជួយខ្លួនឯង និងក្រុមគ្រួសារឱ្យមានសុវត្ថិភាព ជៀសឆ្ងាយពីបញ្ហាគ្រឿងញៀន។

លោកបណ្ឌិត តូច ប៉ូលីវ៉ា បានថ្លែងដូចនេះ នាថ្ងៃទី២៣ ខែកញ្ញា ឆ្នាំ២០២៥នេះ នាឱកាសដែលលោកតំណាងលោកបណ្ឌិត ជាម ច័ន្ទសោភ័ណ្ឌ អភិបាលខេត្តកំពង់ស្ពឺ ដឹកនាំបញ្ជារការងារផ្សព្វផ្សាយអប់រំពីបញ្ហាគ្រឿងញៀន និងជំរុញការប្រើប្រាស់ App NoDrug ក្នុងមូលដ្ឋានខេត្តកំពង់ស្ពឺ នាឱកាសបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរ។

លោកបណ្ឌិត តូច ប៉ូលីវ៉ា បានបន្ថែមថា ប្រព័ន្ធបច្ចេកវិទ្យាប្រយុទ្ធប្រឆាំងគ្រឿងញៀននៅលើទូរសព្ទដៃគឺ App NoDrug ពិតជាផ្ដល់នូវប្រសិទ្ធិភាពបទល្មើសគ្រឿងញៀនឱ្យមានការថតចុះ និងជាមធ្យោបាយដល់ប្រជាពលរដ្ឋក្នុងការស្វែងយល់ពីបញ្ហាគ្រឿងញៀនសម្រាប់អប់រំគ្រួសារ ក៏ដូចជាការតភ្ជាប់រវាងប្រជាពលរដ្ឋទៅនឹងអាជ្ញាធរមានសមត្ថកិច្ចដើម្បីរួមគ្នាដោះស្រាយបញ្ហាគ្រឿងញៀន រួមគ្នារាយការណ៍យកបញ្ហាគ្រឿងញៀនចេញពីសហគមន៍ អនាមិគគ្មានអត្តសញ្ញាណមានសុវត្ថិភាពចំពោះអ្នករាយការណ៍ ១០០%។

ជាមួយគ្នានេះលោកបណ្ឌិត តូច ប៉ូលីវ៉ា បានសង្កត់ធ្ងន់ថា គ្រប់គ្នាត្រូវតែជួយជំរុញ និងប្រើប្រាស់ App NoDrug ព្រោះថា ការជំរុញនិងប្រើប្រាស់បាននូវApp NoDrug គឺជួយខ្លួនឯង គ្រួសារលោកអ្នកនឹងមានសុវត្ថិភាពពីបញ្ហាគ្រឿងញៀន៕