(ព្រៃវែង)៖ យុវជនឈាមរាវម្នាក់ បានកាប់ដេញកាប់បុរសចំណាស់ម្នាក់ ដែលជាចាស់ទុំក្នុងចំនួន២កាំបិតផ្គាក់បណ្តាលឱ្យរងរបួសធ្ងន់ បន្ទាប់ពីចាស់ទុំនិយាយណែនាំកុំឱ្យដើរសៀតកាំបិតផ្គាក់នឹងចង្កេះ អួតសម្ញែងអ្នកភូមិ។

ករណីអំពើហិង្សានេះ បានកើតឡើងកាលពីវេលាម៉ោង៤ និង៥០នាទីល្ងាចថ្ងៃទី២២ ខែកញ្ញាឆ្នាំ ២០២៥នៅចំណុចភូមិត្រពាំងចាម ឃុំពោធិ៍ទី ស្រុកស៊ីធរកណ្ដាល ខេត្តព្រៃវែង។

សមត្ថកិច្ចបានឲ្យដឹងថា ជនរងគ្រោះក្នុងហេតុការណ៍មានឈ្មោះជីង ចាន់ ភេទប្រុសអាយុ៥៨ឆ្នាំ មានទីលំនៅនៅក្នុងភូមិ ឃុំកើតហេតុខាងលើ ត្រូវបានជនសង្ស័យឈ្មោះភាព លាក់ ភេទប្រុស អាយុ១៩ឆ្នាំ រស់នៅក្នុងភូមិឃុំជាមួយគ្នា កាប់ត្រូវចំនួន២កាំបិតផ្គាក់ បណ្ដាលឲ្យរងរបួសធ្ងន់ និងត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យភ្លាមៗក្រោយពីកើតហេតុ។

ប្រភពពីសមត្ថកិច្ចស្រុកស៊ីធរកណ្ដាលបានឲ្យដឹងទៀតថា នៅមុនពេលកើតហេតុជនសង្ស័យ បានយកកាំបិតផ្គាក់សៀតនិងចង្កេះ ដើរអួតសម្ញែងគេពេញភូមិ ឃើញបែបនេះជនរងគ្រោះជីង ចាន់ ដែលជាចាស់ទុំក្នុងភូមិបាននិយាយណែនាំថា ចៅអើយ កុំយកកាំបិតផ្គាក់សៀតចង្កេះដើរសម្ញែងគេឯងបែបនេះ អ្នកស្រុក អ្នកភូមិគេខ្លាច ហើយប្រយ័ត្នប៉ះក្រុមក្មេងស្ទាវវាឃើញ នាំឲ្យកើតរឿងរ៉ាវ។ ប៉ុន្តែជនសង្ស័យមិនស្ដាប់បែរជាខឹងជនរងគ្រោះ ហើយក៏រត់ដេញកាប់ជនរងគ្រោះផ្អើលពេញភូមិតែម្តង។

ប្រភពដដែលបានបន្តថា នៅពេលជនសង្ស័យរត់ដេញកាប់ ជនរងគ្រោះបានស្រែកហៅឲ្យអ្នកស្រុកជួយ អ្នកភូមិក៏រត់ជួយឃាត់ និងខ្លះទៀតរាយការណ៍ទៅសមត្ថកិច្ចចុះទៅចាប់ជនសង្ស័យបានភ្លាមៗ និងបញ្ជូនទៅកាន់ប៉ុស្តិ៍រដ្ឋបាលឃុំពោធិ៍ទី ដើម្បីកសាងសំណុំរឿងតាមនីតិវិធីច្បាប់ផងដែរ៕