(ភ្នំពេញ)៖ ក្នុងពិធីតាំងពិព័រណ៌ផលិតផលខ្មែរ ក្រោមប្រធានបទ «ខ្មែរធ្វើបាន៖ ចូលរួម ជំរុញ និងគាំទ្រផលិតផលក្នុងស្រុក» ផលិតផលខ្មែររាប់រយមុខ ត្រូវបានយកមកដាក់លក់នៅមជ្ឈមណ្ឌលកោះពេជ្រ។

ក្នុងនោះក៏មានផលិតផលមួយប្រភេទ ដែលអាចជំនួសផលិតផលដែលផលិតដោយប្លាស្ទិច មិនប៉ះពាល់បរិស្ថាន អាចបរិភោគបាន ជាពិសេសជួយដល់ប្រជាកសិករទៀតនោះ គឺផលិតផល «បំពង់បឺតម្សៅអង្ករ»។

បើតាមការបញ្ជាក់របស់លោក អ៊ូ ខេ មកពីក្រុមហ៊ុន TK&D Manufacturing បានឱ្យដឹងថា គោលបំណងសំខាន់នៃការផលិតបំពង់បឺតនេះឡើង គឺដើម្បីជួយកាត់បន្ថយការដាក់សម្ពាធដល់បរិស្ថាន និងជួយដល់ជីវភាពប្រជាកសិករបានថែមទៀត។

លោក បានបន្តថា បច្ចុប្បន្ននេះ ផលិតផលបំពង់បឺតដែលអាចញាំបាយ បានកំពុងដំណើរការដាក់លក់នៅតាមម៉ាតមួយចំនួន និងនៅហាងកាហ្វេខ្លះផងដែរ។

ថ្វីដ្បិតតម្លៃខុសគ្នា៥ដងពីផលិតផលប្លាស្ទិច តែផលិតផលនេះមានផលប្រយោជន៍លើសលប់ សមជាមួយនឹងតម្លៃ ដែលគួរក្លាយជាផលិតផលមួយនៅក្នុងផ្ទះរបស់បងប្អូនប្រជាពលរដ្ឋ។

សូមជម្រាបថា កម្មវិធីពិព័រណ៍ផលិតផលខ្មែរ ក្រោមប្រធានបទ «ខ្មែរធ្វើបាន៖ ចូលរួម ជំរុញ និងគាំទ្រផលិតផលក្នុងស្រុក» ដើម្បីពង្រឹងសមត្ថភាពផលិតកម្ម បង្កើនឱកាសការងារដល់ប្រជាពលរដ្ឋខ្មែរ និងជំរុញចរន្តសេដ្ឋកិច្ចក្នុងស្រុកដែលមានរយៈពេល៣ថ្ងៃ ចាប់ពីថ្ងៃទី២៦ ដល់ថ្ងៃទី២៨ ខែកញ្ញា ឆ្នាំ២០២៥នេះ នៅមជ្ឈមណ្ឌលសន្និបាត និងពិព័រណ៍កោះពេជ្រ។

ព្រឹត្តិការណ៍ពិព័រណ៍នេះ បានរៀបចំឡើងក្នុងគោលបំណងបញ្ញា ការយល់ដឹង និងបណ្តុះស្មារតីចូលរួម ជំរុញ គាំទ្រការប្រើប្រាស់ផលិតផលក្នុងស្រុកឱ្យកាន់តែផុសផុល និងទូលំទូលាយបន្ថែមទៀត ដែលជាកត្តាចាំបាច់ ដើម្បីពង្រឹងសមត្ថភាពផលិតកម្ម បង្កើនឱកាសការងារដល់ប្រជាពលរដ្ឋខ្មែរ និងជំរុញចរន្តសេដ្ឋកិច្ចក្នុងស្រុក៕