(ព្រះសីហនុ)៖ សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ខេត្តព្រះសីហនុ ហៅកាត់ថា (ក.ប.ប) នៅព្រឹកថ្ងៃទី៣ ខែតុលា ឆ្នាំ២០២៥នេះ សហការជាមួយមន្ត្រីមន្ទីរពាណិជ្ជកម្មខេត្តព្រះសីហនុ គណៈកម្មការមជ្ឈមណ្ឌលពាណិជ្ជកម្មតារាសំណាង (ផ្សារឃ្លាំងលើ) ចុះអប់រំផ្សព្វផ្សាយអំពីគុំណភាព សុវត្ថិភាព ម្ហូបអាហារ និងត្រួតពិនិត្យធ្វើតេស្តបឋមលើម្ហូបអាហារ ដែលកំពុងដាក់លក់តាមស្តង់នានា ក្នុងផ្សារស្ថិតនៅសង្កាត់លេខ១ ក្រុងព្រះសីហនុ ខេត្តព្រះសីហនុ។

លោក ឃុន ស៊ីម៉ន បានឲ្យដឹងថា ដើម្បីពិនិត្យធានាបាននូវគុណភាព គុណសម្បត្តិដល់អ្នកប្រើប្រាស់ លោកបានដឹកនាំមន្ត្រីជំនាញពិនិត្យលើបន្លែរ ផ្លែឈឺ ម្ហូប និងគ្រឿងឧបភោគបរិភោគជាច្រើនមុខទៀត ដែលដាក់តាំងលក់ នៅក្នុងផ្សារឃ្លាំងលើ​ ដើម្បីធានាបាននូវសុវត្ថិភាព និងគុណភាពល្អសម្រាប់សុខភាពរបស់អ្នកប្រើប្រាស់។ ជាលទ្ធផល គឺមានអនុលោមភាពត្រឹមត្រូវតាមបទដ្ឋានបច្ចេកទេសសុវត្ថិភាពផ្នែកម្ហូបអាហារ។

ឆ្លៀតក្នុងឱកាសនេះ ប្រធានសាខាបានណែនាំប្រជាពលរដ្ឋ ទទួលទានបន្លែ និងផ្លែឈើជាច្រើនប្រភេទដូចជា ស្ពៃប្រូខូលី ការ៉ុត ម្ទេសប្លោក ខាត់ណា ស្ពៃខ្មៅ និងផ្លែឈើតាមរដូវ ដើម្បីទទួលបានសារធាតុចិញ្ចឹមចាំបាច់ទាំងអស់។

លោកបានគូសបញ្ជាក់ថា ក្រុមការងារមន្ត្រីសាខាខេត្តតែងតែចុះជាប្រចាំ ដូចភ្លៀងរលឹមទាំងនៅតាមបណ្ដាទីផ្សារ តាមហាងលក់ដូរតូចធំ តាមភោជនីយដ្ឋានទូទាំងខេត្ត លក់ដូរតាមតំបន់ឆ្នេរជាដើម៕