(ភ្នំពេញ)៖ នៅថ្ងៃទី៣ ខែតុលា ឆ្នាំ២០២៥ លោក ចាយ បូរិន រដ្ឋមន្ត្រីក្រសួងធម្មការ និងសាសនា បានអញ្ជើញជាអធិបតីក្នុងពិធីប្រគល់ជ័យលាភីសិស្សពូកែ ផ្នែកភាសាបាលី សំស្រ្តឹត និងសូត្របាតិមោក្ខ ឆ្នាំ២០២៥ ដោយមានព្រះសង្ឃ និងបេក្ខសមណសិស្ស-សិស្សសរុបចំនួន ២៤១អង្គ/នាក់ បានចូលរួមប្រឡង ក្នុងនោះផ្នែកបាតិមោក្ខ ចំនួន ៦១អង្គ និងផ្នែកភាសាបាលី សំស្រ្តឹតចំនួន ១៨៦ អង្គ/នាក់ នៅមណ្ឌលពុទ្ធិកវិទ្យាល័យព្រះសុរាម្រឹត សង្កាត់ចតុមុខ ខណ្ឌដូនពេញ រាជធានីភ្នំពេញ។

ពិធីនេះមានការ យាង និមន្ត និងអញ្ជើញចូលរួមពីសំណាក់ សម្ដេចព្រះមហាសុមេធាធិបតីកិត្តិបណ្ឌិត អំ លីមហេង ព្រះអគ្គាធិការនៃអគ្គាធិការដ្ឋានពុទ្ធិកសិក្សាជាតិ សម្តេចព្រះអគ្គាធិការរង សម្តេច ព្រះមន្ត្រីសង្ឃ ព្រះថេរានុត្ថេរៈគ្រប់ព្រះអង្គ លោក លោកស្រី ថា្នក់ដឹកនាំក្រសួងធម្មការ និងសាសនា។

លោក ចាយ បូរិន បានសម្ដែងនូវការកោតសរសើរ និងវាយតម្លៃខ្ពស់ ចំពោះព្រះរាជតម្រិះដ៏ខ្ពង់ខ្ពស់ របស់សម្តេចព្រះមហាសុមេធាធិបតី អំ លីមហេង ព្រះអគ្គាធិការនៃអគ្គាធិការដ្ឋានពុទ្ធិកសិក្សាជាតិ ដែលទ្រង់ផ្ដួចផ្តើមឱ្យមានកម្មវិធី ប្រឡងនេះឡើង ដើម្បីពង្រឹងនូវការប្រតិបត្តិធម៌វិន័យ និងកសាងបាននូវមូលធនព្រះសង្ឃ ជំរុញឱ្យវិស័យពុទ្ធិកសិក្សាគ្រប់កម្រិតនៅទូទាំងព្រះរាជាណាចក្រកម្ពុជា មានការរីកចម្រើនទាំងបរិមាណ និងគុណភាពស្របតាមយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយភាពប្រាកដនិយមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

លោករដ្ឋមន្ត្រី បានមានប្រសាសន៍បន្តថា កម្ពុជាជាប្រទេសដ៏ចំណាស់មួយ មានវប្បធម៌សម្បូរបែប ហើយគុណតម្លៃនៃវប្បធម៌ខ្មែរ ផ្អែកលើមូលដ្ឋានព្រះពុទ្ធសាសនា ការរៀបចំកម្មវិធីប្រឡងនាពេលនេះ ពិតជាឆ្លើយតបបានយ៉ាងស័ក្តិសមបំផុត ចំពោះវិស័យពុទ្ធចក្រ និងអាណាចក្រ ព្រោះបាតិមោក្ខ គឺជាធម្មនុញ្ញ នៃព្រះពុទ្ធសាសនា ជាបញ្ញត្តិហាមឃាត់ដោយកាយ វាចា ចិត្ត ញ៉ាំងបុគ្គលអ្នកប្រតិបត្តិតាម ឱ្យរួចចាកពីអបាយ និងពីសេចក្តីទុក្ខបាន។ ចំណែកឯភាសាបាលី សំស្ក្រឹត ក៏មានសារៈសំខាន់ និងចាំបាច់ខ្លាំងណាស់សម្រាប់ព្រះពុទ្ធសាសនា មិនត្រឹមតែជាគ្រឹះដ៏រឹងមាំក្នុងការរក្សានូវពុទ្ធវចនៈដើម ឱ្យគង់វង់ស្ថិតស្ថេរប៉ុណ្ណោះទេ ប៉ុន្តែនៅក្នុងអក្សរសាស្ត្រខ្មែរ ក៏មានពាក្យកម្ចីជាច្រើនដែលបានមកពីភាសាបាលី និងសំស្ត្រឹត។

លោករដ្ឋមន្រ្តី បានផ្តល់នូវអនុសាសន៍មួយចំនួនដូចខាងក្រោម៖

*ទី១៖ សូមឱ្យអគ្គាធិការនៃអគ្គាធិការដ្ឋានពុទ្ធិកសិក្សាជាតិ បន្តរៀបចំកម្មវិធីប្រឡងនេះ ឱ្យបានជារៀងរាល់ឆ្នាំ ដើម្បីធានាបាននូវភាពរឹងមាំ និងរីកចម្រើន នៃព្រះពុទ្ធសាសនា។
*ទី២៖ សូមឱ្យព្រះចៅអធិការគ្រប់វត្តអារាម ចូលរួមពង្រឹងការធ្វើឧបោសថកម្មពោលគឺការសូត្របាតិមោក្ខ ឱ្យបានមួយខែពីរដង ដើម្បីធ្វើឱ្យព្រះពុទ្ធសាសនាក្លាយទៅជាបុញ្ញខេត្ត ដ៏ប្រពៃសម្រាប់ពុទ្ធបរិស័ទ។
*ទី៣៖ រក្សាឱ្យបាននូវគុណតម្លៃនៃអត្តសញ្ញាណ និងភាពខ្លាំងនេះ ឱ្យបានគង់វង្ស ល្បីរន្ទឺ ទៅទូទាំងប្រទេស។
*ទី៤៖ សូមឱ្យសមណសិស្ស សិស្សត្រូវខិតខំប្រឹងប្រែងបន្តទៀត អភិវឌ្ឍចំណេះដឹងខាងផ្នែកភាសាបាលី សំស្ក្រឹត និងបាតិមោក្ខ ឱ្យរឹងរិតតែមានភាពស្ទាត់ជំនាញខ្ពស់ ឱ្យទៅជាសក្តានុពលនៃវិស័យពុទ្ធិកសិក្សា។
*ទី៥៖ គោរពតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា «កែទម្រង់រស់ មិនកែទម្រង់ស្លាប់» ដូច្នេះអគ្គាធិការដ្ឋានពុទ្ធិកសិក្សា គប្បីធ្វើបច្ចុប្បន្នភាព កែទម្រង់កម្មវិធីសិក្សាដោយឈរលើអត្តសញ្ញាណ និងភាពខ្លាំងរបស់ខ្លួន ពោលគឺភាពខ្លាំងខាងផ្នែកអក្សរសាស្ត្រ បាលី សំស្រ្តឹត និងទស្សនវិជ្ជាព្រះពុទ្ធសាសនាជាដើម៕