(ព្រះវិហារ)៖ សម្ដេចព្រះមហាអរិយវង្ស បណ្ឌិត យ៉ន សេងយៀត ព្រះសាកលវិទ្យាធិការ ពុទ្ធិកសាកលវិទ្យាល័យព្រះសីហនុរាជ និងជាព្រះចៅអធិការវត្តឧណ្ណាលោម មួយអន្លើដោយព្រះធម្មឃោសាចារ្យ ជួន សាវឿន ព្រះសាកលវិទ្យាធិការរង បានដឹកនាំព្រះមន្ត្រីសង្ឃ និមន្តចុះចែកទេយ្យទាន ដែលបានមកពីព្រះសង្ឃ និងប្រជាជនខ្មែរគ្រប់មជ្ឈដ្ឋាន តាមរយៈមូលនិធិជនភៀសសឹកវត្តឧណ្ណាលោម និងពុទ្ធិកសាកលវិទ្យាល័យព្រះសីហនុរាជ ឧបត្ថម្ភជូនដល់កងទ័ពជួរមុខ ទិសដៅប្រាសាទព្រះវិហារ និងទិសដៅមុំបី ខេត្តព្រះវិហារ។

ការបន្តដឹកនាំព្រះមន្ត្រីសង្ឃនិមន្ត ចុះចែកទេយ្យទានឧបត្ថម្ភ ជូនដល់កងទ័ពជួរមុខរបស់ សម្ដេចព្រះមហាអរិយវង្ស បណ្ឌិត យ៉ន សេងយៀត ធ្វើឡើងនារសៀលថ្ងៃអាទិត្យ ១៣កើត ខែអស្សុជ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៥ ខែតុលា ឆ្នាំ២០២៥ ដោយមានការចូលរួមពី ព្រះធម្មឃោសាចារ្យ ជួន សាវឿន ព្រះសាកលវិទ្យាធិការរង និងមន្ត្រីសង្ឃជាច្រើនអង្គ។

នាឱកាសនោះ សម្ដេចព្រះមហាអរិយវង្ស បណ្ឌិត យ៉ន សេង យៀត ក៏បានជូនបុណ្យដល់សប្បុរសជន ដែលបានចូលរួមចំណែក ជាទេយ្យទាន និងថវិកា បានជួបប្រទះតែពុទ្ធពរបួនប្រការគឺអាយុ វណ្ណៈ សុខៈ និងពលៈកុំឃ្លៀងឃ្លាតឡើយ៕