(ព្រះសីហនុ​)៖ លោកឧត្ដមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ និង​លោក​ស្រី នៅថ្ងៃទី៨ ខែតុលា ឆ្នាំ២០២៥ បានផ្តល់ជូនមួក​សុវត្ថិភាព​ដល់ទៅដល់ កម្លាំងការិយាល័យនគរបាលចរាចរណ៍ផ្លូវគោក ដើម្បីចែក​ជូន​បងប្អូន​ប្រជាពលរដ្ឋ សិស្សានុសិស្ស​​ ដើម្បី​ការពារ​សុវត្ថិភាព​ក្នុងការធ្វើ​ដំណើរ​ ក្រោយអង្កេតឃើញបងប្អូនមួយចំនួនបើកបរដោយគ្មានមួកក្នុងមូលដ្ឋានក្រុងព្រះសីហនុ។

នាឱកាសនោះ លោកឧត្តមសេនីយ៍ត្រី ស៊ីធឿន តុលា ស្នងការរងផែននគរបាលសន្តិសុខសណ្តាប់ធ្នាប់សាធារណៈ នៃស្នងការរដ្ឋាននគរបាលខេត្តព្រះសីហនុ បានថ្លែងថា យុទ្ធនាការនេះ បានធ្វើឡើងក្រោមការយកចិត្តទុកដាក់ខ្ពស់ពីសំណាក់ លោកឧត្ដមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ និង​លោក​ស្រី ដែល​បាន​គិត​គូរ​ដល់​សុវត្ថិភាព​បងប្អូន​ប្រជាពលរដ្ឋ សិស្សានុសិស្ស​ និង​​បាន​ឧបត្ថម្ភ​មួក​សុវត្ថិភាព​ដល់​ការិយាល័យនគរបាលចរាចរាចរណ៍ផ្លូវគោក​ ​ចែក​ជូន​ដល់​បងប្អូន​ប្រជាពលរដ្ឋ សិស្សានុសិស្ស​​។

ឧត្តមសេនីយ៍ត្រី ស៊ីធឿន តុលា, ក្នុង​នាម​ថ្នាក់​ដឹក​នាំ​ នៃ​ការិយាល័យនគរបាលចរាចរាចរណ៍ផ្លូវគោក និងលោកវរសេនីយ៍ទោ នី​ ចាន់ណារ៉ា​ នាយការិយាល័យ​ ព្រមទាំងមន្ត្រីនគរបាលទាំងអស់ សូម​ថ្លែង​អំណរគុណ​ចំពោះ​ លោកឧត្ដមសេនីយ៍ឯក ស រដ្ឋា និង​លោក​ស្រី ដែល​បាន​គិត​គូរ​ដល់​សុវត្ថិភាព​បងប្អូន​ប្រជាពលរដ្ឋ សិស្សានុសិស្ស​នាពេលនេះ។

លោក បានបន្ថែមថាប្រជាពលរដ្ឋទាំងអស់ត្រូវតែគោរពច្បាប់ចរាចរណ៍ផ្លូវគោកឱ្យបានល្អ មិនបើកបរបញ្ច្រាស់ទិសចរាចរណ៍ បើកបរត្រូវគោរពផ្លាកសញ្ញាចរាចរណ៍ និងភ្លើងចរារចរណ៍ គ្រប់ពេលវេលាក្នុងពេលបើកបរ, សូមកុំគោរពតែនៅពេលដែលមាន វត្តមានកម្លាំងនគរបាល, និងកុំនិយាយទូរស័ព្ទពេលកំពុងបើកបរឲ្យសោះ ជាពិសេលអ្នកបើកបរម៉ូតូ ពីព្រោះគ្រោះថ្នាក់អាចកើតមានតែក្នុង១ប៉ព្រិចភ្នែកប៉ុណ្ណោះ, មិនត្រូវដណ្តើម ឬប្រជែងយកឈ្នះគ្នាលើដងផ្លូវសាធារណៈ ដែលជាហេតុធ្វើឲ្យមានគ្រោះថ្នាក់ និងកុំវ៉ាជែងដោយបំពាន ក្នុងស្ថានភាពដែលអាចមានគ្រោះថ្នាក់គ្រប់ពេល៕