(ឧត្តរមានជ័យ)៖​ ព្រះតេជគុណ ឈឿន ឈន ព្រះគ្រូចៅអធិការវត្តសេរីចំប៉ា ហៅវត្តកោះចំប៉ា ឧបាសក ហង្ស ផុស និងឧបាសិកា ហង្ស ផុន ព្រមទាំងអាចារ្យ គណៈកម្មការ និងពុទ្ធបរិស័ទជិតឆ្ងាយ ក្នុងឃុំព្រីងជ្រុះ ស្រុកជើងព្រៃ ខេត្តកំពង់ចាម បានផ្តួចផ្តើមអង្គកឋិនទានសាមគ្គីមួយដង្កែមកកាន់វត្តជ័យរុក្ខារ៉ាម ហៅវត្តថ្លាត ស្ថិតក្នុងឃុំថ្លាត ស្រុកអន្លង់វែង ខេត្តឧត្តរមានជ័យ
នៅព្រឹកថ្ងៃទី០៨ ខែតុលា ឆ្នាំ២០២៥។

នៅរសៀលថ្ងៃទី០៧ ខែតុលា ឆ្នាំ២០២៥ អង្គឋិនទានសាមគ្គី បានរៀបចំសូត្រមន្តតាមប្រពៃណីក្រោមវត្តមានចូលរួមពីថ្នាក់ដឹកនាំ មន្ត្រីរាជការ ស្រុកអន្លង់វែងផងដែរ។តាមប្រពៃណីព្រះពុទ្ធសាសនានាសម័យពុទ្ធកាលមកបានបង្ហាញថា ពុទ្ធបរិសទ្ទ័នាំគ្នាធ្វើបុណ្យកឋិននេះ គឺក្នុងជំនឿតាមគម្ពីរដីកាពុទ្ធសាសនាស្តីពីកឋិនទានថា ជាកាលទានដ៏មានផល្លានិសង្ឃច្រើនជាងទានទាំងពួង។តាមពុទ្ធប្បញ្ញត្តិ ភិក្ខុសង្ឃដែលអាចទទួលក្រាលគ្រងកឋិនបានលុះណាតែបានគង់ចាំព្រះវស្សាអស់ពេល៣ខែ ដោយបរិបូរណ៍ ពុំមានដាច់កិច្ចចូលព្រះវស្សាទេនោះក៏ពុំអាចទទួលកឋិនទានពីពុទ្ធបរិសព្ទ័បានដែរ។

បើតាមទំនៀមទំលាប់ តាំងពីសម័យពុទ្ធកាលមកបានពោលថា ជនណាបានធ្វើបុណ្យកឋិនទាន ដែលនាំឲ្យភិក្ខុសង្ឃបានទទួលនូវអានិសង្ឃ៥យ៉ាង ឈ្មោះថា ជាអ្នកឲ្យសេចក្តីសុខដល់អ្នកដទៃ ក្នុងបច្ចុប្បន្នជាតិ ជននោះឯងតែងបានសុខក្នុងមនុស្សលោក និងទេវលោកក្នុងអនាគត។កម្លាំងសទ្ធាជ្រះថ្លារបស់ពុទ្ធបរិស័ទ្ធ ដែលកើតមានពីអង្គកឋិនទាន និងដើម្បីឧទ្ទិសកុសលផលបុណ្យ ជូនដល់វិញ្ញាណក្ខន្ធបុព្វការីជនមានមាតា បិតា ជីដូនជីតាញាតិការទាំង៧សណ្តាន និងឧទ្ទិសដល់វិញ្ញាណក្ខន្ធ យុទ្ធជនយុទ្ធនារីដែលបានពលីជីវិតដើម្បីបុព្វហេតុជាតិមាតុភូមិ។

បច្ច័យដែលប្រមូលបានពីអង្គកឋិនទានសាមគ្គីទាំងអស់នេះ មានចំនួនសរុប១៨លានរៀល បានវេរប្រគេនព្រះសង្ឃ ក្នុងពទ្ធសីមា វត្តជ័យរុក្ខារ៉ាម ហៅវត្តថ្លាត សម្រាប់កសាងសមិទ្ធផលនានា នៅក្នុងទីអារាមនេះ។

សូមបញ្ជាក់ផងដែរថា៖ស្រុកអន្លង់វែង គឺជាស្រុកមួយរបស់ខេត្តឧត្តរមានជ័យ មានព្រំប្រទល់ជាប់ជាមួយស្រុកភូសុីង ខេត្តសុីសាកេត របស់ប្រទេសថៃ។ក្នុងព្រឹត្តិការណ៍សង្គ្រាមឈ្លានពានទឹកដីដែលបង្កដោយកងទ័ពថៃបាញ់កាំភ្លើងចូលមកទឹកដីកម្ពុជាមុន កាលពីថ្ងៃទី២៤ ខែកក្កដា ឆ្នាំ២០២៥ កន្លងទៅ ធ្វើឱ្យប្រជាពលរដ្ឋខ្មែររស់នៅស្រុកអន្លង់វែង បានភៀសខ្លួនចាកចេញពីលំនៅដ្ឋានទៅរកតំបន់សុវត្ថិភាពនានា គេចពីគ្រាប់កាំភ្លើងផ្លោងរបស់កងទ័ពថៃឈ្លានពាន៕