(ភ្នំពេញ)៖ នៅវេលាព្រឹកថ្ងៃ២រោច ខែអស្សុជ ត្រូវនឹងថ្ងៃទី៩ ខែតុលា ឆ្នាំ២០២៥ សម្តេចមហាមន្ត្រី គុយ សុផល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាឧត្តមប្រឹក្សាផ្ទាល់ព្រះមហាក្សត្រ ជាព្រះរាជតំណាងដ៏ខ្ពង់ខ្ពស់ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត និងលោកជំទាវ សុខ នារី គុយ សុផល បានអញ្ជើញក្នុងព្រះរាជពិធីបុណ្យដង្ហែអង្គកឋិនទានព្រះរាជទ្រព្យព្រះមហាក្សត្រ បន្ទាប់ពីបានរៀបចំព្រះរាជពិធីចម្រើនព្រះបរិត្តយ៉ាងមហោឡារិក នៅរសៀលថ្ងៃ១រោច ខែអស្សុជ ដោយបានរៀបចំជាក្បួនដង្ហែចេញពីព្រះបរមរាជវាំង ឆ្ពោះទៅកាន់ព័ទ្ធសីមា វត្តភ្នំព្រះពុទ្ធមានបុណ្យ ស្ថិតនៅភូមិដំបូករូង ឃុំដំបូករូង ស្រុកភ្នំស្រួច ខេត្តកំពង់ស្ពឺ ដើម្បីវេរប្រគេនព្រះសង្ឃ បន្ទាប់ពីបានគង់ចាំព្រះវស្សាអស់កាលត្រីមាស។

ព្រះករុណាជាអម្ចាស់ជីវិតលើត្បូង ព្រះបាទសម្តេច ព្រះបរមនាថ ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គបានបំពេញព្រះរាជសទ្ធាដ៏ប្រសើរខ្ពង់ខ្ពស់ ក្នុងការកសាងអង្គកឋិនទានព្រះរាជទ្រព្យ ទៅវេរប្រគេនព្រះសង្ឃគង់នៅតាមទីអារាម ដែលជួបការលំបាកខ្វះខាតជារៀងរាល់ឆ្នាំ ដើម្បីជួយទ្រទ្រង់ជីវភាព ព្រះសង្ឃ និងការប្រោសព្រះរាជទានរួមចំណែកកសាងសមិទ្ធិផលក្នុងទីអារាមទាំងនោះ។

សូមបញ្ជាក់ជូនថា បច្ច័យសង្កត់លើត្រ័យនៃអង្គកឋិនទានព្រះរាជទ្រព្យព្រះករុណាព្រះមហាក្សត្រ នាពេលនេះ មានព្រះរាជទ្រព្យ ព្រះករុណាជាអម្ចាស់ជីវិតលើត្បូង ចំនួន៥ពាន់ដុល្លារសហរដ្ឋអាមេរិក, សម្តេចព្រះមហាក្សត្រី ព្រះវររាជមាតាជាតិខ្មែរ ចំនួន ៤ពាន់ដុល្លារសហរដ្ឋអាមេរិក, បច្ច័យសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំនួន៥០លានរៀល, សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ចំនួន ២០លានរៀល, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ចំនួន ៥០លានរៀល, សម្តេចអគ្គមហាពញាចក្រី ហេង សំរិន ប្រធានកិត្តិយសក្រុមឧត្តមប្រឹក្សាផ្ទាល់ព្រះមហាក្សត្រ និងសម្តេចធម្មវិសុទ្ធវស្សា សៅ ទី ហេងសំរិន ចំនួន ៥លានរៀល, សម្តេចវិបុលសេនាភក្តី សាយ ឈុំ ឧត្តមប្រឹក្សាផ្ទាល់ព្រះមហាក្សត្រ និងលោកជំទាវ ចំនួន ២០លានរៀល, សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងលោកជំទាវ ចំនួន១០លានរៀល, សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងលោកជំទាវ ចំនួន៥លានរៀល, សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ ចំនួន១០លានរៀល,សម្តេចរាជបុត្រីព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ និងឯកឧត្តម កែវ ពុទ្ធរស្មី ព្រមទាំងបុត្រាបុត្រី ចំនួន ១លានរៀល, សម្តេចស៊ីសុវត្ថិ ពង្សនារី មុនីពង្ស ឧត្តមប្រឹក្សាផ្ទាល់ព្រះមហាក្សត្រ ចំនួន១លានរៀល, សម្តេចមហាមន្រ្តី គុយ សុផល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាឧត្តមប្រឹក្សាផ្ទាល់ព្រះមហាក្សត្រ និងលោកជំទាវ សុខ នារី គុយសុផល ចំនួន១០លានរៀល ព្រមទាំងបច្ច័យដែលជាសទ្ធាជ្រះថ្លារបស់ព្រះរាជវង្សានុវង្ស សម្តេច ឯកឧត្តម លោកជំទាវ ជាឧត្តមប្រឹក្សាផ្ទាល់ព្រះមហាក្សត្រ ថ្នាក់ដឹកនាំ ទីប្រឹក្សា មន្ត្រីរាជការក្រសួងព្រះបរមរាជវាំង និងក្រសួងស្ថាប័ន សប្បុរសជននានា និងពុទ្ធបរិស័ទ មានបច្ច័យសរុបគិតជាប្រាក់រៀលចំនួន 361,144,500៛ និងសរុបគិតជាប្រាក់ដុល្លារចំនួន 90,286$ សម្រាប់ចូលរួមក្នុងការកសាងសមិទ្ធផលក្នុងព័ទ្ធសីមា វត្តភ្នំព្រះពុទ្ធមានបុណ្យនេះ។

សម្តេចមហាមន្ត្រី គុយ សុផល ព្រះរាជតំណាង និងលោកជំទាវ សុខ នារី គុយ សុផល បានទូលប្រគេន និងជម្រាបជូនពីព្រះរាជបណ្តាំសាកសួរសុខទុក្ខ ក្នុងព្រះរាជហឬទ័យនឹករលឹកដ៏ជ្រាលជ្រៅ និងដោយការគោរពដ៏ខ្ពង់ខ្ពស់ពីព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ប្រគេនព្រះសង្ឃគ្រប់ព្រះអង្គ និងជូនពុទ្ធបរិស័ទព័ទ្ធសីមា វត្តភ្នំព្រះពុទ្ធមានបុណ្យ នេះទាំងមូល។

ព័ទ្ធសីមា វត្តភ្នំព្រះពុទ្ធមានបុណ្យ សូមថ្លែងអំណរព្រះរាជគុណដ៏ជ្រាលជ្រៅបំផុត ចំពោះព្រះរាជទាននូវ អង្គកឋិនទាន ព្រះរាជទ្រព្យដ៏ថ្លៃថ្លានេះ និងសូមថ្វាយមហាព្រះរាជកុសល ថ្វាយព្រះករុណាជាអម្ចាស់ជីវិតលើត្បូង ព្រះបាទសម្តេច ព្រះបរមនាថ ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ព្រះអង្គបានសមប្រកបតែនឹងពុទ្ធពរទាំង៤ប្រការ កុំបីឃ្លៀងឃ្លាត ដើម្បីគង់ប្រថាប់នៅជាម្លប់ដ៏ត្រជាក់ដល់កូនចៅ ចៅទួត និងព្រះពុទ្ធសាសនា នៅព្រះរាជាណាចក្រកម្ពុជា ជាដរាបតរៀងទៅ៕