(ទីក្រុងគុនមិញ)៖ លោកវេជ្ជបណ្ឌិត លី សៀវហ្វុង អនុប្រធានក្រុមប្រឹក្សាភិបាលសមាគមនិស្សិតកម្ពុជា ប្រចាំសាធារណរដ្ឋប្រជាមានិតចិន និងជាប្រធាននិស្សិតកម្ពុជាប្រចាំខេត្តយូណាន​ នៅថ្ងៃទី២៥ ខែតុលា ឆ្នាំ២០២៥ បានដឹកនាំនិស្សិត​កម្ពុជា ​ដែលកំពុងសិក្សានៅសាកលវិទ្យាល័យ​ Kunming​ Medical​ University ក្នុងខេត្តយូណាន​ សម្តែងរបាំគោះត្រឡោកនៅក្នុងសន្នីសីទអន្តរជាតិលើកទី១៥ ស្តីអំពីសុខភាពសាធារណៈ ក្នុងចំណោម​ប្រទេសអនុតំបន់ទន្លេមេគង្គ ដែលប្រារព្ធធ្វើឡើងនៅទីក្រុងគុនមិញ ខេត្តយូណាន សាធារណរដ្ឋប្រជាមានិតចិន ដើម្បីចូលរួមផ្សព្វផ្សាយប្រពៃណីវប្បធម៌កម្ពុជាទៅកាន់ពិភពលោក។

ស្របពេលដែលប្រតិភូកម្ពុជាមកពីវិទ្យាស្ថានជាតិសុខភាពសាធារណៈ បានដឹកនាំសាស្ត្រាចារ្យ អ្នកវិទ្យាសាស្ត្រ និងអ្នកស្រាវជ្រាវផ្នែកសុខភាពសាធារណៈ មកចូលរួមនៅក្នុងសន្នីសីទអន្តរជាតិលើកទី១៥ ស្តីពីសុខភាពសាធារណៈក្នុងចំណោមបណ្តាប្រទេសអនុតំបន់ទន្លេមេគង្គ ដែលប្រាព្ធធ្វើឡើងនៅក្នុងសាកលវិទ្យាល័យវេជ្ជសាស្ត្រគុនមីង ដែលមានអ្នកចូលរួមប្រមាណជា ៥៥០នាក់មកពីប្រទេសចំនួន៦រួមមាន ចិន កម្ពុជា ឡាវ មីយ៉ាន់ម៉ា ថៃ និងវៀតណាម។

ការសម្តែងរបាំគោះត្រឡោក​ នៅក្នុងសន្នីសីទអន្តរជាតិនេះ ជាសកម្មភាពដ៏សំខាន់មួយសម្រាប់ប្រទេសកម្ពុជា ដែលថាវិទ្យាស្ថានជាតិសុខភាពសាធារណៈ នឹងទទួលយកវេនធ្វើជាម្ចាស់ផ្ទះក្នុងការរៀបចំសន្នីសីទអន្តរជាតិអំពីសុខភាពសាធារណៈ ក្នុងចំណោមបណ្តាប្រទេសអនុតំបន់ទន្លេមេគង្គ នៅចុងឆ្នាំ២០២៦។

លោកសាស្ត្រាចារ្យ ឈា ឆវណ្ណ នាយកវិទ្យាស្ថានជាតិសុខភាពសាធារណៈ បានកោតសរសើរដល់និស្សិតកម្ពុជា ដែលបានស្ម័គ្រចិត្តហាត់របាំសម្តែងក្នុងការរួមចំណែកលើកស្ទួយ និងផ្សព្វផ្សាយនូវវប្បធម៌កម្ពុជាទៅកាន់ឆាកអន្តរជាតិ ក្នុងសន្នីសីទអន្តរជាតិនេះ។

របាំគោះត្រឡោកជានិមិត្តរូបនៃការបង្កើតឱ្យមានសិរីសួស្តី ព្រោះ «ត្រឡោកញីឈ្មោល» នេះ ចំពោះជនជាតិខ្មែរយើងយល់ថា ជានិមិត្តរូបសម្បត្តិធម្មជាតិ ជាពិសេសភោគផលកសិកម្មនៃជាតិរបស់ខ្លួន។ អត្ថន័យម្យ៉ាងទៀត «ត្រឡោកញីឈ្មោល» គឺតំណាងទឹក តំណាងដី ដែលជាប្រភពផ្តល់ជីវជាតិសម្រាប់ភោគផលកសិកម្មដុះលូតលាស់ និងជានិមិត្តរូបនៃការចងសម្ព័ន្ធរវាងភេទស្រី និងភេទប្រុស ដែលនាំមកនូវការរីកចម្រើនបន្តពូជ។ របាំគោះត្រឡោកនេះ មានឈ្មោះម្យ៉ាងទៀតថា ជារបាំកណ្តូបសេះ (ឯកសារ វប្បធម៌-អរិយធម៌ខ្មែរ ដែលរៀបរៀងដោយលោកសាស្ត្រាចារ្យ ពន់ ឆាយ)។

សូមបញ្ជាក់ថា សមាគមនិស្សិតកម្ពុជាប្រចាំសាធារណរដ្ឋប្រជាមានិតចិន បានទទួលនូវអំណោយដ៏ថ្លៃថ្លាពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី នូវសម្ភារៈសិល្បៈសម្រាប់និស្សិតកម្ពុជា សិក្សានៅប្រទេសចិនប្រើប្រាស់ ដើម្បីលើកស្ទួងថែរក្សាប្រពៃណីវប្បធម៌ខ្មែរ និងផ្សព្វផ្សាយទៅកាន់អន្តរជាតិ៕