(ព្រះសីហនុ)៖ ក្រុមហ៊ុន Royal Group Koh Rong Development Company Ltd. របស់អ្នកឧកញ៉ា គិត ម៉េង បានសហការជាមួយក្រុមហ៊ុន ខ្មែរ ប៊ែវើរីជីស ដែលជាពហុពាណិជ្ជកម្មមួយ របស់ក្រុមហ៊ុនមេ ជីប ម៉ុង រៀបចំព្រឹត្តិការណ៍កីឡាទេសចរណ៍តំបន់ឆ្នេរដ៏ធំមួយ ក្រោមប្រធានបទ «កីឡាដើម្បីទេសចរណ៍ ទេសចរណ៍ដើម្បីទាំងអស់គ្នា» ចាប់ពីថ្ងៃទី២៩-៣១ ខែតុលា ឆ្នាំ២០២៥ នៅលើកោះរ៉ុង ខេត្តព្រះសីហនុ។

ដោយទទួលបានការគាំទ្រ និងអនុញ្ញាតពីរដ្ឋបាលខេត្តព្រះសីហនុ ព្រឹត្តិការណ៍រយៈពេល៣ថ្ងៃនេះ ត្រូវបានរៀបចំឡើង ក្នុងគោលបំណងជំរុញយុទ្ធនាការ ទាក់ទាញទេសចរណ៍ ក្នុងរដូវកាលបៃតង សម្រាប់គោលដៅទេសចរណ៍ ក្រុងកោះរ៉ុង ខេត្តព្រះសីហនុ ក៏ដូចជាបង្កើតនូវព្រឹត្តិការណ៍កម្សាន្តសប្បាយ ជូនភ្ញៀវទេសចរជាតិ និងអន្តរជាតិ ក៏ដូចជាប្រជាពលរដ្ឋ ក្នុងពិធីអបអរសាទរព្រះរាជពិធី គ្រងព្រះបរមរាជសម្បត្តិរបស់ ព្រះមហាករុណា ព្រះបាទសម្តេចព្រះបរមនាថ នរោត្តមសីហមុនី ព្រះមហាក្សតនៃព្រះរាជាណាចក្រកម្ពុជា។

ដើម្បីញ៉ាំឲ្យព្រឹត្តិការណ៍នេះ កាន់តែមានភាពទាក់ទាញ និងសប្បាយរីករាយ ក្រុមហ៊ុន មានរៀបចំការប្រគុំតន្ត្រី និងមានសកម្មភាពកីឡាមួយចំនួន ដូចជា ១៖ កីឡារត់ឧបសគ្គចម្ងាយ «២០០០ម៉ែត្រ» នៅឆ្នេរកោះរ៉ុង តាមបណ្តោយឆ្នេរពីចំណុច Hill Beach Resort ទៅបញ្ចប់នៅ Nest beach, ២៖ កីឡាបាល់ទះលើឆ្នេរខ្សាច់ «នៅឆ្នេរកោះរ៉ុង», ៣៖ កីឡាអុំទូកកាយ៉ាក់ នៅសហគមន៍ព្រែកកោងកាង, ៤៖ កីឡាប្រដាល់សេរីគុនខ្មែរគូរអន្តរជាតិ និង៥៖ ជិះកង់លេងកម្សាន្តក្រុងកោះរ៉ុង «១៥គីឡូម៉ែត្រ» ពីឆ្នេរកោះរ៉ុង ទៅឆ្នេរឡងប៊ីច។

ដើម្បីអញ្ជើញចូលរួមកម្សាន្តសប្បាយ និងអញ្ជើញចូលរួមនៅក្នុងសកម្មភាពប្រកួតកីឡាផ្សេងៗ ក្នុងព្រឹត្តិការណ៍ទេសចរណ៍ដ៏សំខាន់នេះ សូមភ្ញៀវទេសចរជាតិ អន្តរជាតិ និងប្រជាពលរដ្ឋ រួសរាន់ចុះឈ្មោះឱ្យបានមុន ពីព្រោះចំនួនអ្នកចូលរួមមានកំណត់។

សូមជម្រាបថា ចាប់តាំងពីក្រុមហ៊ុន រ៉ូយ៉ាល់គ្រុប ទទួលបានសិទ្ធិវិនិយោគស្របច្បាប់ សម្រាប់អភិវឌ្ឍន៍នៅលើតំបន់កោះរ៉ុង ពីរាជរដ្ឋាភិបាលកម្ពុជាមក ក្រុមហ៊ុនសម្រេចបានសមិទ្ធផល នៃការអភិវឌ្ឍរបស់ខ្លួនយ៉ាងច្រើនជាបន្តបន្ទាប់ ក្នុងការផ្លាស់ប្តូរកោះនេះ ទៅជាគោលដៅទេសចរណ៍លំដាប់ពិភពលោក។

ក្រុមហ៊ុន បានវិនិយោគលើគម្រោងហេដ្ឋារចនាសម្ព័ន្ធជាច្រើន រួមទាំងការសាងសង់សណ្ឋាគារផ្កាយ ៣ និងផ្កាយ ៥ និងផ្លូវបេតុងប្រវែង ៧០គីឡូម៉ែត្រ ដែលមានតម្លៃ ៣៥លានដុល្លារអាម៉េរិក។ បន្ថែមពីនេះ ក្រុមហ៊ុនរ៉ូយ៉ាល់គ្រុប ក៏បានធ្វើការជាមួយអគ្គិសនីកម្ពុជា (EDC) ដើម្បីពង្រីកខ្សែបញ្ជូនអគ្គិសនីក្រោមបាតសមុទ្រប្រវែង ៦០គីឡូម៉ែត្រ ទៅកាន់កោះរ៉ុង ដោយធានាបាននូវការចែកចាយថាមពល ប្រកបដោយស្ថិរភាព ប្រើប្រាស់នៅលើកោះនេះ។

ចំណុចសំខាន់មួយទៀត នៃចក្ខុវិស័យអភិវឌ្ឍន៍របស់ក្រុមហ៊ុន គឺគម្រោងសាងសង់អាកាសយានដ្ឋានអន្តរជាតិកោះរ៉ុង លំដាប់ 4C ដើម្បីផ្តល់ភាពងាយស្រួល សម្រាប់អ្នកធ្វើដំណើរជាតិ និងអន្តរជាតិ។ តាមរយៈគម្រោងអភិវឌ្ឍន៍នៅលើកោះរ៉ុងនេះ ក្រុមហ៊ុន រ៉ូយ៉ាល់គ្រុប មានគោលបំណងគាំទ្រចក្ខុវិស័យរបស់រាជរដ្ឋាភិបាល ក្នុងការលើកកម្ពស់វិស័យទេសចរណ៍ ប្រកបដោយចីរភាព៕