(ព្រះវិហារ)៖ មណ្ឌលសុវត្ថិភាពវត្តត្រាវគៀត​ ស្ថិតក្នុងភូមិត្រាវគៀត​ ឃុំថ្មី​ ស្រុកគូលែន​ ខេត្តព្រះវិហារ​ ត្រូវបានបិទបញ្ចប់ជាផ្លូវការ​ បន្ទាប់ពីប្រជាពលរដ្ឋភៀសសឹកបានវិលត្រឡប់ទៅលំនៅដ្ឋានវិញ​រៀងៗខ្លួន​ ក្រោយការចុះកិច្ចព្រមព្រៀងសន្តិភាព​ រវាងកម្ពុជា​ និងថៃ​ ដែលបានធ្វេីឡេីងនៅទីក្រុងកូឡាឡាំពួរ ប្រទេសម៉ាឡេសុី​ កាលពីថ្ងៃទី២៦​ ខែតុលា​ ឆ្នាំ២០២៥ កន្លងទៅថ្មីៗនេះ។

លោក​ អ៊ុក គឹមសាន អភិបាលរងខេត្តព្រះវិហារ​ និងជាប្រធានយុវជនគណបក្សខេត្ត​ បានឱ្យដឹងនៅរសៀលថ្ងៃទី២៩​ ខែតុលា​ ឆ្នាំ២០២៥​ នេះថា ក្រោមការណែនាំ​ និងចង្អុលបង្ហាញ ពីលោក​ គីម​ រិទ្ធី​ អភិបាលខេត្តព្រះវិហារ​ មណ្ឌលសុវត្ថិភាពវត្តត្រាវគៀត​ ក្នុងស្រុកគលែន​ ត្រូវបានបង្កេីតឡេីង​ទទួលពលរដ្ឋភៀសសឹកស្នាក់នៅបណ្តោះអាសន្ន ចាប់តាំងពីព្រឹត្តិការណ៍ផ្ទុះអាវុធនៅតាមព្រំដែន​ កម្ពុជា-ថៃ​ កាលពីថ្ងៃទី២៤​ ខែកក្កដា​ ឆ្នាំ២០២៥​ កន្លងទៅ​ ពោលគឺបង្កេីតឡេីងបន្ទាប់ពីមណ្ឌលសុវត្ថិភាពវត្តពោធិ៥០០០ដេីម​ និងមណ្ឌលសុវត្ថិភាពវត្តទួលអណ្តែត។

លោក​ អ៊ុក​ គឹមសាន​ បន្តថា «មណ្ឌលសុវត្ថិភាពវត្តត្រាវគៀត ត្រូវបានរៀបចំនិងកសាងឡើងនូវហេដ្ឋារចនាសម្ព័ន្ធផ្សេងៗដូចជា ប្រព័ន្ធទឹកស្អាត ប្រព័ន្ធ​អគ្គសនី បន្ទប់អនាម័យ ស្នាក់ការពិនិត្យសុខភាព សន្តិសុខ សណ្តាប់ធ្នាប់ និងកន្លែងមួយចំនួនទៀត ដើម្បីសម្រួលក្នុងការរស់នៅរបស់ប្រជាពលរដ្ឋភៀសសឹករបស់យើងប្រកបដោយភាពកក់ក្តៅនិងទំនុកចិត្តខ្ពស់»។

លោកបានបញ្ជាក់ទៀតថា ស្របពេលដំណឹងដ៍សែនរីករាយ នៃពិធីចុះកិច្ចព្រមព្រៀងសន្តិភាព រវាងនាយករដ្ឋមន្ត្រីកម្ពុជា និងថៃ ក្រោមការចូលរួមជាសាក្សីពីលោកប្រធានាធិបតីសហរដ្ឋអាមេរិក និងនាយករដ្ឋមន្ត្រីប្រទេសម៉ាឡេសុី កាលពីថ្ងៃទី២៦ ខែតុលា ឆ្នាំ២០២៥ កន្លងទៅថ្មីៗនេះ ធ្វើឱ្យប្រជាពលរដ្ឋខ្មែរទូទាំងប្រទេស ពិសេសប្រជាពលរដ្ឋភៀសសឹក មានការសប្បាយរីករាយចិត្តយ៉ាងក្រៃលែងរកអ្វីមកប្រៀបផ្ទឹមពុំបាន និងបាននាំគ្នាវិលត្រឡប់ទៅលំនៅដ្ឋានវិញរៀងៗខ្លួនដោយអារម្មណ៍កក់ក្តៅ។

ដោយសារមណ្ឌលភៀសសឹកបានបិទបញ្ចប់ នៅរសៀលថ្ងៃនេះ លោកបានដឹកនាំក្រុមការងារយុវជនគណបក្សខេត្តព្រះវិហារ និងសមាជិក សមាជិកា យុវជនស្រុកជាច្រើនរូបទៀត ចុះសម្អាត និងរៀបចំបិទជាផ្លូវការ នូវបរិវេណ និងទីធ្លានៃមណ្ឌលសុវត្ថិភាពទាំងមូល ដោយប្រមូលសំរាម កាកសំណល់ និងរៀបចំអនាម័យឡើងវិញ ដើម្បីធានាបាននូវបរិស្ថានស្អាត និងផាសុកភាព ត្រឡប់មកដូចដើម៕