(ព្រៃវែង)៖ កសិករជាច្រើនគ្រួសាររស់នៅភូមិតាំងស្នាយ ឃុំរកា ស្រុកពារាំង ខេត្តព្រៃវែង សប្បាយចិត្ត នឹងប្រកបរបរកសិកម្មឡើងវិញបន្ទាប់ពីទឹកស្រក ដោយអ្នកខ្លះធ្វើស្រែ ហើយអ្នកខ្លះទៀតនាំគ្នាដាំឈូក ដើម្បីរកចំណូលជួយដល់គ្រួសារ។

លើកឡើងប្រាប់ដល់បណ្តាញព័ត៌មាន Fresh News នាថ្ងៃទី៣០ ខែតុលា ឆ្នាំ២០២៥ នេះ ប្រជាសិករជាច្រើននាក់ដែលរស់នៅភូមិ ឃុំ ខាងលើ បានលើកឡើងថា ជារៀងរាល់ឆ្នាំបន្ទាប់ពីទឹកស្រកវិញ គឺធ្វើស្រែបានផលល្អហើយមិនសូវចំណាយលុយទិញជី ព្រោះថា ពេលទឹកឡើងហាក់ដូចជានាំជីមកដាក់ស្រែអញ្ចឹង តែទោះយ៉ាងណាក៏គាត់មានការសោកស្តាយខ្លាំងដែលឆ្នាំនេះទឹកឡើងខ្លាំងធ្វើឱ្យដាច់ផ្លូវក្រាលកៅស៊ូដែលទើបនឹងធ្វើរួច។

ប្រជាសិករ ភូមិតាំងស្នាយ ឃុំរកា បញ្ជាក់ថារាល់ថ្ងៃនេះ គាត់មានដីស្រែដោយធ្វើស្រែផង ដាំឈូកផង ដោយក្នុង១ឆ្នាំ គាត់ធ្វើស្រែ ៦ខែ ហើយ ៦ខែទៀតគាត់ដាំឈូក បើចំពោះការប្រមូលផលវិញមិនសូវខុសគ្នាប៉ុន្មានទេ។
ចំពោះការដាំឈូកវិញយើងត្រូវចំណាយដើមទុនច្រើនជាងធ្វើស្រែ តែមានតំលៃថ្លៃជាងស្រូវ រីឯការធ្វើស្រែវិញចំណាយដើមទុនតិចជាងឈូកក៏ពិតមែន រីឯតំលៃថោកហើយជីវិញមានតំលៃថ្លៃ តែមិនដឹងធ្វើមិចបើមុខរបរមានតែប៉ុនហ្នឹងទៅហើយនោះ។

ទន្ទឹមនឹងការសប្បាយចិត្តក្នុងការធ្វើស្រែរបស់ពួកគាត់ ប្រជាសិករ ភូមិតាំងស្នាយ ក៏បានលើកឡើងបន្ថែមទៀតថា រាល់ថ្ងៃនេះប្រសិនបើមានរោងចក្រផលិតជីក្នុងស្រុកច្រើន មានតំលៃថោកជាងជីដែលនាំចូលពីប្រទេសជិតខាង ដូច្នេះពួកគាត់សង្ឃឹមថាថ្ងៃក្រោយនឹងបានប្រាក់ចំណេញច្រើនជាងមុនបន្ថែមទៀត អំពីការធ្វើស្រូវនិងដាំឈូក។

ដោយឡែកចំពោះតំបន់ដែលមិនមានផលប៉ះពាល់ដោយទឹកជំនន់ និងតំបន់ខ្លះមានទឹកចូលដែរតែចូលបន្តិចបន្តួច ធ្វើអោយដំណាំស្រូវទទួលបានផលល្អជាងឆ្នាំមុនៗ ដោយកន្លែងខ្លះក៏កំពុងតែមានការលូតលាស់ល្អ និងកន្លែងខ្លះទៀតក៏ត្រៀមច្រូតកាត់ប្រមូលផលផងដែរ៕