(ភ្នំពេញ)៖ កាលពីរសៀលថ្ងៃទី៣១ ខែតុលា ឆ្នាំ២០២៥ ក្មេងប្រុសម្នាក់អាយុ១៤ឆ្នាំឈ្មោះ សល្យ ស៊ីធីណែត បានទៅដាក់ពាក្យសុំស្វែងរកអន្តរាគមន៍ពីអង្គភាពប្រឆាំងអំពើពុករលួយ (ACU) ដើម្បីឲ្យជួយម្តាយរបស់ខ្លួន ដែលកំពុងជាប់ពន្ធនាគារ រឿងជំពាក់ប្រាក់ម្ចាស់បំណុលទាំងដើមទាំងការរហូតដល់១លាន១៧ម៉ឺនដុល្លារ ព្រមទាំងដាក់បញ្ចាំប្លង់ដី និងប្លង់ផ្ទះទៀតផងដែរ (លុយដើមដែលខ្ចីមានចំនួន ៤៥ម៉ឺនដុល្លារ)។

នៅថ្ងៃទី២ ខែវិច្ឆិកា​ ឆ្នាំ២០២៥ អង្គភាពប្រឆាំងអំពើពុករលួយបានចេញបង្ហាញរបាយការណ៍បឋមចំពោះករណី ក្រោយបញ្ចប់ការសួរនាំ និងធ្វើការស្រាវជ្រាវ ក្រោមការដឹកនាំរបស់លោក យ៉ិនទៀង ពុទ្ធិរិទ្ធ ប្រធានស្តីទីអង្គភាព និងលោក យ៉ិនទៀង ពុទ្ធរ៉ា ឧបការី នៃអង្គភាព ដែលមានក្រុមការងារស្រាវជ្រាវចំនួន៦នាក់។

នៅក្នុងរបាយការណ៍នេះ ACU បានបង្ហាញថា ករណីនេះបានកើតឡើងតាំងពីថ្ងៃទី១ ខែសីហា ឆ្នាំ២០២០មកម្ល៉េះ ដោយស្រ្តីឈ្មោះ អែម ចន្ធី បានខ្ចីលុយពីលោក គិត សំណាង ចំនួន៤៥ម៉ឺនដុល្លារ ដោយលើកទី១ខ្ចីចំនួន ៣៥ម៉ឺនដុល្លារ ដើម្បីយកទៅដោះបំណុលជាមួយធនាគារ Mega International Commercial Bank និងលើកទី២ ខ្ចីចំនួន១០ម៉ឺនដុល្លារ ដើម្បីប្រើប្រាស់ផ្ទាល់ខ្លួន ក្នុងរយៈពេល៦ខែ។

ក្រោយខ្ចីលុយចំនួន៤៥ម៉ឺនដុល្លារ ជាមួយការដាក់បញ្ចាំប្លង់ផ្ទះនៅខណ្ឌមានជ័យ និងរហូតយកដាក់ប្លង់ដីនៅខេត្តស្ទឹងត្រែង ប៉ុន្តែស្រ្តី អែម ចន្ធី មិនមានលទ្ធភាពសងនោះទេ បើទោះមានចេញសែកជូនម្ចាស់បំណុលក៏ដោយ តែសុទ្ធតែសែកមិនមានសាច់ប្រាក់។ ដោយសារមិនមានលទ្ធភាពសង ហើយប្រាក់ដើម និងប្រាក់ការបានឡើងដល់ជាង ១លានដុល្លារនោះ ម្ចាស់បំណុលលោក គិត សំណាង ក៏បានដាក់ពាក្យប្តឹងទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់។

ក្រោយម្ចាស់បំណុលដាក់ពាក្យប្តឹងទៅតំណាងអយ្យការ ហើយត្រូវបានតុលាការបន្តនីតីវិធី រហូតឈានដល់ការឃាត់ខ្លួនស្រ្តីរូបនេះដាក់ពន្ធនាគារ តាមអំណាចសាលក្រមដែលផ្តន្ទាទោសគាត់២ឆ្នាំ ជាមួយការតម្រូវឲ្យសងលុយទៅម្ចាស់ដើមវិញ។

សូមបញ្ជាក់ថា ករណីនេះ ត្រូវបានគេចែកចាយយ៉ាងច្រើននៅលើបណ្តាញសង្គម ដោយសារតែកូនប្រុសអាយុ១៤ឆ្នាំ ដែលកំពុងស្ថិតនៅក្នុងការសិក្សាបែរជាចេញមុខមកជួយស្វែងរកអន្តរាគមន៍ជូនម្តាយ ដែលកំពុងជាប់ពន្ធនាគារទៅវិញ ដូច្នេះទទួលបានការអាណិតអាសូរពីមហាជន។

តែយ៉ាងណាក៏ដោយ អង្គភាពប្រឆាំងអំពើពុករលួយ ក៏បានជូនយោបល់ដល់លោកស្រី អែម ចន្ធី និងមេធាវី ដាក់ពាក្យស្វែងរកយុត្តិធម៌បន្តពីតុលាការកំពូល ព្រោះនៅមានឱកាស។

ខាងក្រោមនេះជាលទ្ធផលនៃការស្រាវជ្រាវបឋមរបស់អង្គភាពប្រឆាំងអំពើពុករលួយ៖