ក្រុមការងារចលនាកសាងសមាជិកគណបក្សខេត្តព្រៃវែង ដង្ហែអង្គកឋិនទាន ទៅកាន់វត្តជោតញ្ញាណ ក្រុងខេមរភូមិន្ទ ខេត្តកោះកុង
03-11-2025 15:40
(កោះកុង)៖ លោក ឡាយ ឡុងផេង និងក្រុមការងារសហការចលនាកសាងសមាជិកគណបក្សខេត្តព្រៃវែងនៅថ្ងៃទី៣ ខែវិច្ឆិកា ឆ្នាំ២០២៥ ព្រមទាំងពុទ្ធបរិស័ទចំណុះជើងវត្តជោតញ្ញាណ និងពុទ្ធបរិស័ទជិតឆ្ងាយ មានសទ្ធាជ្រះថ្លា ក្នុងព្រះពុទ្ធសាសនា បានមូលមតិគ្នាជាឯកច្ឆន្ទផ្តួចផ្តើមរៀបចំពិធីបុណ្យ អង្គព្រះកឋិនទាន សាមគ្គី ដើម្បីដង្ហែទៅវេរប្រគេព្រះភិក្ខុសង្ឃដែលគង់ចាំព្រះវស្សាអស់ត្រីមាសក្នុងព័ទ្ធសីមាវត្ត ជោតញ្ញាណ ស្ថិតនៅភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ដើម្បីជាប្រយោជន៍ក្នុងព្រះពុទ្ធសាសនា និង ដើម្បីរួបរួមចំណែកកសាងសមិទ្ធផលនានានៅក្នុងទីអារាម។
លោក ឡាយ ឡុងផេង បានថ្លែងថា បុណ្យកឋិន គឺជាបុណ្យ១របស់ព្រះពុទ្ធសាសនា ដែលមានរយៈពេល២៩ថ្ងៃ គឺចាប់ពីថ្ងៃ១រោច ខែអស្សុជ ដល់ថ្ងៃ១៥កើត ខែកក្តិក។ អាចនិយាយបានថា ពុទ្ធបរិស័ទ ចាប់ផ្តើមធ្វើបុណ្យកឋិន នៅក្រោយថ្ងៃចេញព្រះវស្សា។ ការចូលព្រះវស្សារបស់ព្រះសង្ឃ មានរយៈពេល៣ខែ។
កឋិនកាល គឺជារដូវដែលប្រជាពុទ្ធបរិស័ទ នាំយកសំពត់ជាគ្រឿងស្លៀកដណ្តប់របស់ព្រះសង្ឃ មានចីពរជាដើម ទៅប្រគេនព្រះសង្ឃ។ បច្ចុប្បន្ន គេឃើញពុទ្ធបរិស័ទ មិនត្រឹមតែប្រគេនចីវរទេ នៅប្រគេនទេយ្យទានផ្សេងៗទៀត ដូចជា គ្រឿងបរិភោគ និង ថ្នាំសង្កូវ ជាដើម រួមទាំងបច្ច័យផងដែរ (ថវិកា)។
បើតាមព្រះវិន័យ វត្តមួយ អាចប្រារព្ធពិធីបុណ្យកឋិនបានតែមួយថ្ងៃគត់ ក្នុងរយៈពេល២៩ថ្ងៃនេះ ដោយប្រារព្ធនៅថ្ងៃណាក៏បានដែរ តាមការរៀបចំរបស់គណៈកម្មការវត្ត និងតាមការស្នើសុំរបស់ម្ចាស់កឋិន។ បុណ្យនេះ មិនត្រឹមតែជាបុណ្យបែបព្រះវិន័យទេ តែថែមទាំងក្លាយជាបុណ្យប្រពៃណីខ្មែរផងដែរ។
លោក ឡាយ ទ្បុងផេង បានគូសបញ្ជាក់ថា បុណ្យកឋិនទាន ប្រារព្ធឡើងក្នុងគោលបំណងសំខាន់ៗមួយចំនួនដូចខាងក្រោម ដើម្បីបង្កើនសាមគ្គីភាពរវាងបុគ្គល គ្រួសារ និងសង្គម, ទ្រទ្រង់ព្រះពុទ្ធសាសនាឱ្យបានចំរើនរុងរឿង គង់វង្សស្ថិតស្ថេរនៅ យូរអង្វែង, ផ្តល់កម្លាំងកាយ ចិត្តដល់ព្រះភិក្ខុសង្ឃ បុគ្គលជាសាសនទាយាទបន្តអាយុព្រះពុទ្ធសាសនាតទៅ, ដើម្បីបានថ្វាយឧបការៈទំនុកបម្រុងឧបត្ថម្ភព្រះភិក្ខុសាមណេរ ដែលជាមហាកុសលដ៏ប្រសើរ និងដើម្បីកុំឱ្យកើតសេចក្តីប្រមាថចំពោះ មហាកុសលរបស់ខ្លួនផងដែរ៕
