(ព្រះវិហារ)៖ លោក គីម រិទ្ធី អភិបាលខេត្តព្រះវិហារ និងជាប្រធានគណៈកម្មការសាខាកាកបាទក្រហមកម្ពុជាខេត្ត នៅព្រឹកថ្ងៃទី៣ ខែវិច្ឆិកា ឆ្នាំ២០២៥ បានអញ្ជើញចុះសួរសុខទុក្ខ និងនាំអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនប្រជាពលរដ្ឋម្នាក់ ដែលកំពុងសម្រាកព្យាបាលជំងឺនៅឯមន្ទីរពេទ្យបង្អែក១៦មករា ខេត្តព្រះវិហារ ដែលរងគ្រោះដោយសារករណីផ្ទុះគ្រាប់បែកចង្កោមរបស់កងទ័ពថៃ ដែលបន្សល់ទុកក្រោយការផ្ទុះ អាវុធនៅតាមព្រំដែន។

នៅក្នុងឱកាសនោះ លោក គីម រិទ្ធី បានផ្តាំផ្ញើសាកសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជាមួយនឹងចូលរួមសោកស្តាយ និងចូលរួមរំលែកទុក្ខជាមួយជាមួយក្រុមគ្រួសាររងគ្រោះ ក្នុងហេតុការណ៍ផ្ទុះ គ្រាប់បែកចង្កោម ដែលបណ្តាលឱ្យកូនប្រុសជាទីស្រឡាញ់អាយុត្រឹម ១០ឆ្នាំម្នាក់ បានស្លាប់ភ្លាមៗនៅកន្លែងកើតហេតុ ចំណែកឪពុកបានរងរបួសធ្ងន់ និងកំពុងសម្រាកព្យាបាលនៅឯមន្ទីរពេទ្យនាពេលនេះ។

អភិបាលខេត្តព្រះវិហារ បានលើកទឹកចិត្តជនរងគ្រោះដោយសារករណីផ្ទុះគ្រាប់បែកចង្កោម ត្រូវតាំងចិត្តឱ្យបានល្អ ខិតខំសម្រាកព្យាបាលជំងឺដើម្បីឱ្យឆាប់ជាសះស្បើយ បានវិលត្រឡប់ទៅលំនៅដ្ឋានវិញ ជួបជុំគ្រួសារ បន្តប្រកបរបរចិញ្ជឹមជីវិតតាមធម្មតាតទៅទៀត។

សូមបញ្ជាក់ថា កាលពីល្ងាចថ្ងៃទី២៥ ខែតុលា ឆ្នាំ២០២៥ មានករណីផ្ទុះគ្រាប់បែកចង្កោម១ករណី នៅភូមិបង្គោល៨ ឃុំស្រអែម ស្រុកជាំក្សាន្ត ខេត្តព្រះវិហារ បណ្តាលឱ្យក្មេងប្រុសអាយុ១០ឆ្នាំម្នាក់ស្លាប់ភ្លាមៗនៅកន្លែងកើតហេតុ ដោយឡែកបុរសជាឪពុកបានរងរបួសធ្ងន់។

តាមរបាយការណ៍របស់អាជ្ញាធរស្រុកជាំក្សាន្ត មុនពេលកើតហេតុ ម្តាយបាននាំកូនជាជនរងគ្រោះទៅមើលចំការដំឡូង លុះត្រឡប់មកវិញកូនរើសបានដុំដែកមួយកាន់រហូតដល់ផ្ទះ ហើយបានដើរទៅចង្ក្រានបាយ ដែលឪពុកកំពុងអង្គុយនៅទីនោះ រួចធ្វើការក្រឡុកដុំដែកនោះលេង ទើបបណ្តាលឱ្យផ្ទុះកក្រើកឡើងតែម្តង៕