(ទីក្រុងសៀងហៃ)៖ លោក អ៊ុំ វុទ្ធទីជំនួយការសម្តេចតេជោ ហ៊ុន សែន ប្រធានព្រឹទ្ធសភា និងជាប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន (ACSC) នៅថ្ងៃទី២ ខែវិច្ឆិកា ឆ្នាំ២០២៥ បានចុះសួរទុក និងរៀបចំអាហារសមាគ្គីជូន និស្សិតកំពុងសិក្សានៅទីក្រុងសៀងហៃសរុបប្រមាណ១១០នាក់។

ជំនួបនេះ មានការសម្របសម្រួលដោយលោក ស្រី ហេង គីមអេង ប្រធាននិស្សិតនៅទីក្រុងសៀងហៃ សមាជិកក្រុមប្រឹក្សាភិបាលសមាគម, លោក ហោ តារា សមាជិកក្រុមប្រឹក្សាភិបាលសមាគម, លោក ជុំ បុណ្យរុង ទីប្រឹក្សាសមាគម , លោក ហុង ហេង ទីប្រឹក្សាសមាគម ព្រមទាំងលោក ខុន សារឿន កុងស៊ុល ដែលតំណាងឲ្យលោក ងួន វិសុទ្ធ អគ្គកុងស៊ុល នៃស្ថានអគ្គកុងស៊ុលកម្ពុជាប្រចាំទីក្រុងសៀងហៃ។

លោក អ៊ុំ វុទ្ធទី ក៏បានពាំនាំការសួរសុខទុក្ខពីសំណាក់សម្ដេចតេជោ ហ៊ុន សែន ប្រធានព្រឹទ្ធសភា, លោក អ៊ុច បូររិទ្ធ អនុប្រធានទី១ ព្រឹទ្ធសភា , លោក ធន់ វឌ្ឍនា អនុប្រធានទី២ ព្រឹទ្ធសភា ចំពោះនិស្សិតកម្ពុជាដែលកំពុងសិក្សានៅទីក្រុងសៀងហៃ ប្រទេសចិន។

លោក អ៊ុំ វុទ្ធទី ក្នុងនាមស្ថាបនិកសមាគមនិស្សិត បានដាស់តឿននិស្សិត ត្រូវខិតខំរៀនសូត្រ ធ្វើយ៉ាងរក្សាអាហារូបករណ៍ឱ្យបាន ដើម្បីឈានទៅបញ្ចប់ការសិក្សាដោយជោគជ័យនាពេលខាងមុខ ព្រមទាំងណែនាំឱ្យនិស្សិតត្រូវបន្តសាមគ្គីភាព ឯកភាពគ្នា ដើម្បីជំរុញកិត្យានុភាពជាតិកម្ពុជានៅលើឆាតអន្តរជាតិ។

ជាមួយគ្នានេះដែរ លោក អ៊ុំ វុទ្ធទី បានកោតសរសើរចំពោះនិស្សិតកម្ពុជាសិក្សាទីក្រុងសៀងហៃ ក្រៅពីការសិក្សា បានឆ្លៀតពេលវេលា ក្នុងការបន្តផ្សព្វផ្សាយវប្បធម៌ ទេសចរណ៍កម្ពុជា និងឱកាសវិនិយោគនៅកម្ពុជា ជូនប្រជាពលរដ្ឋចិន និងអ្នកវិនិយោគចិន ដើម្បីបង្ហាញពីការចូលរួមក្នុងការអភិវឌ្ឍន៍សេដ្ឋកិច្ចជាតិ។

ជាថ្មីម្តងទៀត សមាគមនិស្សិត សូមគោរពថ្លែងអំណរគុណយ៉ាងជ្រាលជ្រៅបំផុតចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ដែលបានបន្តគាំទ្រ និងបានឧបត្ថម្ភដ៏ថ្លៃថ្លា នូវសម្ភារៈសិល្បជាច្រើន ដល់សមាគមនិស្សិត ដើម្បីផ្សព្វផ្សាយអំពីវប្បធម៌ខ្មែរ អរិយធម៌ខ្មែរ និងតំបន់ទេសចរណ៍កម្ពុជា ដើម្បីជំរុញកំណើនភ្ញៀវទេសចរណ៍ចិន មកទស្សនានៅកម្ពុជា៕