(សៀងហៃ)៖ លោក អ៊ុំ វុទ្ធទី ជំនួយការសម្តេចតេជោប្រធានព្រឹទ្ធសភា និងជាស្ថាបនិកសមាគមនិស្សិតកម្ពុជាប្រចាំប្រទេសចិន អមដោយលោកស្រី ហេង គីមអេង ប្រធាននិស្សិតនៅទីក្រុងសៀងហៃ និងជាសមាជិកាក្រុមប្រឹក្សាភិបាលសមាគម, លោក ជុំ បុណ្យរុង ទីប្រឹក្សាសមាគម នៅព្រឹកថ្ងៃទី៣ ខែវិច្ឆិកា ឆ្នាំ២០២៥ បានចូលជួបសម្តែងការគួរសម និងពិភាក្សាការងារ ជាមួយលោក ខុន សារឿន កុងស៊ុល ដែលតំណាងឲ្យលោកងួន វិសុទ្ធ អគ្គកុងស៊ុល នៃស្ថានអគ្គកុងស៊ុលកម្ពុជាប្រចាំទីក្រុងសៀងហៃ។

ក្នុងជំនួបនោះ លោក អ៊ុំ វុទ្ធទីប្រធានក្រុមប្រឹក្សាភិបាលសមាគម បានថ្លែងអំណរគុណយ៉ាងជ្រាលជ្រៅបំផុតចំពោះថ្នាក់ដឹកនាំ និងមន្ត្រីស្ថានអគ្គកុងស៊ុលកម្ពុជាប្រចាំទីក្រុងសៀងហៃ ដែលបានខិតខំយ៉ាងយកចិត្តទុកដាក់ខ្ពស់ ចំពោះសមាជិក សមាជិកាសមាគមនិស្សិត ដែលកំពុងសិក្សានៅទីក្រុងសៀងហៃ សរុបប្រមាណជាង ១១០នាក់។

នាពេលកន្លងមកនេះ ស្ថានអគ្គកុងស៊ុល បានរៀបចំកម្មវិធីជួបជុំជាច្រើនជូននិស្សិតដើម្បីឱ្យបានពួកគាត់ បានស្គាល់គ្នា រាប់អានគ្នា និងសាមគ្គីភាពក្នុងនាមជាគ្រួសារខ្មែរតែមួយ ព្រមទាំងបានគាំទ្រដល់ការផ្សព្វផ្សាយវប្បធម៌ ទេសចរណ៍កម្ពុជា របស់និស្សិតកម្ពុជាសិក្សានៅទីក្រុងសៀងហៃផងដែរ៕