(ប្រទេសចិន)៖ ដំណើរទស្សនកិច្ចរបស់គណៈប្រតិភូ គណៈកម្មាធិការអាហារូបករណ៍ អ.ម.ត ដែលបានចេញដំណើរកាលពីថ្ងៃទី២៦ ខែតុលា ឆ្នាំ២០២៥ ដឹកនាំដោយលោក ឡាវ វ៉ាន់ ប្រធានការិយាល័យគ្រឹះស្ថានសិក្សា និងជាប្រធានការិយាល័យកិច្ចការនិស្សិតក្រៅប្រទេស អមដំណើរដោយសមាជិក៣៥រូបប នាំយកនូវសេចក្តីផ្តាំផ្ញើសួរសុខទុក្ខពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងជាប្រធានកិត្តិយសសមាគម អ.ម.ត និងការយកចិត្តទុកដាក់ខ្ពស់ពីលោកជំទាវបណ្ឌិត ពេជ ចន្ទមុនី្ន ប្រធានគណៈកម្មាធិការ និងជាប្រធានសមាគមអ.ម.ត ជូនដល់និស្សិតកម្ពុជាដែលទទួលបានអាហារូបករណ៍ដ៏ថ្លៃថ្លាពីសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ហៅកាត់ថា អ.ម.ត និងនិស្សិតអាហារូបករណ៍នានាសរុបប្រមាណ៤៥០រូប ដែលកំពុងសិក្សានៅក្នុងប្រទេសចិន (ក្រុងKunming ១២០រូប, ក្រុងChangsha ៣៥រូប, ក្រុងTianjin ៣០រូប, ក្រុងWuhan ៩០រូប ក្រុងHefei ៦០រូប, ក្រុងXiamen ២០រូប និងរដ្ឋធានីBeijing ១០០រូប)។

ឆ្លើយតបនឹងផែនការសកម្មភាពរបស់គណៈកម្មាធិការអាហារូបករណ៍ និងសមាគម អ.ម.ត ជាទៀងទាត់តាមកាលវិភាគដែលបានកំណត់ លោក ឡាវ វ៉ាន់ បានជម្រាបជូនថា ជារៀងរាល់ឆ្នាំ ការិយាល័យគ្រឹះស្ថានសិក្សានៃគណៈកម្មាធិការអាហារូបករណ៍ អ.ម.ត និងការិយាល័យកិច្ចការនិស្សិតក្រៅប្រទេស នៃសមាគម អ.ម.ត តែងបានដាក់ផែនការមកបំពេញបេសកកម្មការងាររបស់ខ្លួនក្នុងប្រទេសចិន តាមគោលដៅសាកលវិទ្យាល័យដែលនិស្សិតអាហារូបករណ៍ អ.ម.ត កំពុងបន្តការសិក្សា។

លោក ឡាវ វ៉ាន់ បានសង្កត់ធ្ងន់ថា រាល់លើកនៃដំណើរបេសកកម្ម គណៈប្រតិភូតែងរៀបចំនូវកម្មវិធីទទួលទានអាហារសាមគ្គី និងសំណេះសំណាលដោយផ្ទាល់ជាមួយនិស្សិតអាហារូបករណ៍ដើម្បីឈ្វេងយល់ ពីស្ថានភាពជាក់ស្តែងនៃការសិក្សា និងសកម្មភាពប្រចាំថ្ងៃរបស់និស្សិត។ ជំនួបនេះមិនត្រឹមតែផ្តល់ភាពកក់ក្តៅដល់និស្សិតកម្ពុជា គឺបានឆ្លុះបញ្ចាំងពីឥរិយាបទដ៏ល្អផូផង់របស់ខ្មែរ តែងតែសាមគ្គីភាពមិនថាទៅដល់ទីណា។

និស្សិតកម្ពុជាប្រមាណ៤៥០រូប បានទទួលដំបូន្មានល្អៗពីគណៈប្រតិភូ ដូចជា ការពង្រឹងសាមគ្គីភាពខ្មែរតែមួយ, ការបង្កើនគុណភាពនៃការសិក្សា, ការពន្លាតទស្សនីយភាពអរិយធម៌វប្បធម៌ខ្មែរលើឆាកអន្តរជាតិ និងការទទួលបទពិសោធន៍ល្អ-ទំនើបជឿនលឿន-ឌីជីថលកម្ម-បៃតងភាព-ចីរភាពពីប្រទេសចិន យកមកអនុវត្តដោយផ្ទាល់នៅប្រទេសកម្ពុជាដើម្បីរួមចំណែកជាមួយរាជរដ្ឋាភិបាលកម្ពុជាក្នុងការធ្វើទំនើបកម្មសង្គម ស្របតាមគោលនយោបាយជាតិ ឆ្នាំ២០៣០ជាប្រទេសមានប្រាក់ចំណូលមធ្យមកម្រិតខ្ពស់ និងចំណូលខ្ពស់នៅត្រឹមឆ្នាំ២០៥០។

សូមបញ្ជាក់ថា គណៈកម្មាធិការអាហារូបករណ៍ អ.ម.ត និងសមាគម អ.ម.ត ក្រោមការដឹកនាំប្រកបដោយគតិបណ្ឌិតរបស់ លោកជំទាវបណ្ឌិត ពេជ ចន្ទមុន្នី ដែលមានការិយាល័យគ្រឹះស្ថានសិក្សា និងការិយាល័យកិច្ចការនិស្សិតក្រៅប្រទេស ជាសេនាធិការ និងមានបេសកកម្មដ៏សំខាន់មួយ ក្នុងការស្វះស្វែងបង្កើនបរិមាណអាហារូបករណ៍ ដល់និស្សិតកម្ពុជាមកសិក្សាកម្រិតឧត្តមសិក្សាក្នុងប្រទសចិន ហើយការិយាល័យទាំងពីរស្វាគមន៍យ៉ាងកក់ក្តៅនូវរាល់គ្រប់អង្គពាក់ព័ន្ធនានាដែលមករួមសហការក្នុងការចែករំលែក ការផ្តល់ និងការបំពេញបន្ថែមបរិមាណអាហាររូបករណ៍៕