(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី៤ ខែវិច្ឆិកា ឆ្នាំ២០២៥ បានទទួលជួបពិភាក្សាការងារជាមួយលោក Tom Hall ជាអនុប្រធានក្រុមហ៊ុន Lonely Planet សៀវភៅមគ្គុទេសក៍ទេសចរណ៍ដ៏ល្បីរបស់ពិភពលោក Lonely Planet និងសហការីចូលជួបសម្ដែងការគួរសម និងពិភាក្សាការងារពី កិច្ចសហប្រតិបត្តិការបន្ថែមទៀមក្នុងការជួយផ្សព្វផ្សាយសក្តានុពលទេសចរណ៍កម្ពុជាដល់ពិភពលោក។ ឆ្លៀតក្នុងឱកាសនោះ លោករដ្ឋមន្រ្តី បានថ្លែងអំណរគុណដល់ក្រុមហ៊ុនដែលបានផ្តល់ចំណាត់ថ្នាក់ទីក្រុងសៀមរាបជាគោលដៅទេសចរណ៍ដ៏ល្អមួយដែលត្រូវតែមកទស្សនាក្នុងឆ្នាំ២០២៥ នេះ។

ជំនួបនេះបានធ្វើឡើង នាឱកាសដែលលោក ហួត ហាក់ ដឹកនាំប្រតិភូជាន់ខ្ពស់ក្រសួងទេសចរណ៍ និងក្រុមប្រឹក្សាភិបាលសិក្សាទីផ្សារ និងផ្សព្វផ្សាយកម្ពុជា (CTB) អញ្ជើញចូលរួមពិព័រណ៍ទេសចរណ៍អន្តរជាតិ (World Travel Market) នាទីក្រុងឡុងដ៏ ចក្រភពអង់គ្លេស។ ទន្ទឹមនឹងនោះដែរ លោក ហួត ហាក់ រដ្ឋមន្រ្តីក្រសួងទេសចរណ៍កម្ពុជា បានអញ្ជើញលោក Tom Hall និងសហការី មកទស្សនានៅព្រះរាជាណាចក្រកម្ពុជាក្នុងពេលឆាប់ៗ ដើម្បីបានឃើញផ្ទាល់ និងជួយផ្សព្វផ្សាយពីសក្តានុពលទេសចរណ៍កម្ពុជាដល់ប្រជាជនអង់គ្លេស និងពិភពលោកទាំងមូល។

សូមជម្រាបថា ក្រុមហ៊ុន Lonely planet គឺជាក្រុមហ៊ុនបោះពុម្ពសៀវភៅណែនាំធ្វើដំណើរដ៏ល្បីល្បាញមួយ ដែលមានមូលដ្ឋាននៅប្រទេសអូស្ត្រាលី។ ក្រុមហ៊ុននេះត្រូវបានបង្កើតឡើងនៅឆ្នាំ ១៩៧៣ ដោយ Tony និង Maureen Wheeler។ Lonely Planet ល្បីពីការបោះពុម្ពសៀវភៅណែនាំទេសចរណ៍ (travel guidebooks) សម្រាប់ប្រទេសនានា, ក្នុងនោះមានព័ត៌មានលម្អិតអំពី កន្លែងទេសចរ កន្លែងស្នាក់នៅ កន្លែងបរិភោគអាហារ ការដឹកជញ្ជូន និងវប្បធម៌មូលដ្ឋាន។ ក្រៅពីសៀវភៅផ្ទាល់ Lonely planet ក៏មានគេហទំព័រ និងវេទិកាឌីជីថលផងដែរ ដែលផ្តល់ព័ត៌មាន និងដំណើរការអាចបង្កើតការចាប់អារម្មណ៍សម្រាប់អ្នកចូលចិត្តធ្វើដំណើរទូទាំងពិភពលោក៕