(ភ្នំពេញ)៖ រាជបណ្ឌិត្យសភាកម្ពុជា នៅថ្ងៃទី១២ ខែវិច្ឆិកា ឆ្នាំ២០២៥នេះ បានរៀបចំសិក្ខាសាលាស្តីពី «ការបោះជំរំសាលារៀនទឹកភ្លៀងអន្តរជាតិ និង ការប្រកួតប្រជែងកម្មវិធីទឹកភ្លៀង» ក្រោមគម្រោងស្តីពី «ការកសាងសាលារៀនទឹកភ្លៀងប្រកបដោយភាពធន់ នឹងអាកាសធាតុនៅតំបន់ទន្លេមេគង្គ» ដែលមានរយៈពេល២ថ្ងៃ នៅសាលបឹងទន្លេឆ្មារ អគារខេមរវិទូ នៃរាជបណ្ឌិតសភាកម្ពុជា។

សិក្ខាសាលានេះ ដោយមានការអញ្ជើញចូលរួមពី លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា លោកសាស្ត្រាចារ្យ ម៉ូ យ៉ុងហាន់ សាស្ត្រាចារ្យនៃសាកលវិទ្យាល័យជាតិសអូល លោកសាស្ត្រាចារ្យបណ្ឌិត លោក លោកស្រី ជាភ្ញៀវជាតិ និងអន្តរជាតិជាច្រើនរូប។

សូមជម្រាបដែរថា សិក្ខាសាលានេះ មានគោលបំណងលើកកម្ពស់ចំណាប់អារម្មណ៍របស់សិស្សានុសិស្ស និងការយល់ដឹងជាសាធារណៈ លើវិស័យស្រាវជ្រាវវិទ្យាសាស្ត្រ បច្ចេកវិទ្យា និងការផ្លាស់ប្តូរវប្បធម៌គ្នាទៅវិញទៅមក ក៏ដូចជាការលើកកម្ពស់ភាពធន់នឹងអាកាសធាតុ នៅទូទាំងតំបន់នៃបណ្តាប្រទេសទន្លេមេគង្គផងដែរ។ ការ ចូលរួមនេះនឹងធ្វើឡើងនៅស្ថាប័នស្រាវជ្រាវរបស់ជាតិ នៃរាជបណ្ឌិត្យសភាកម្ពុជា ដែលមានអ្នក ចូលរួមមកពីប្រទេសកម្ពុជា ឡាវ មីយ៉ាន់ម៉ា និងវៀតណាម ដើម្បីចែករំលែកគំនិតច្នៃប្រឌិត របស់ពួកគេ តាមរយៈវីដេអូខ្លី និងការបង្ហាញតាមរយៈផ្ទាំងរូបភាព (Posters) ក្រោមប្រធានបទ «ទឹក ភ្លៀង និងដំណោះស្រាយ»៕