(បាត់ដំបង)៖ លោក សុខ លូ អភិបាលខេត្តបាត់ដំបង បានស្នើភាគីវៀតណាម ជួយកៀរគរអ្នកវិនិយោគវៀតណាមមកបណ្ដាក់ទុនរកស៊ីនៅកម្ពុជា ជាពិសេសខេត្តបាត់ដំបង លើការកែច្នៃ ផលិតផល កសិកម្ម ដ៏សម្បូរបែបក្នុងខេត្តបាត់ដំបង។

លោកបានស្នើឲ្យស្វែងរកឱកាស ដើម្បីធ្វើឱ្យអ្នកវិយោគរបស់ខេត្តបាត់ដំបង មានឱកាសបានជួបពិភាក្សា និងសហការគ្នាជាមួយអ្នកវិនិយោគវៀតណាមដោយផ្ទាល់ ដើម្បីបង្កើតឱកាសធ្វើពាណិជ្ជកម្ម និងពង្រឹងទំនាក់ទំនងកាន់តែជិតស្និទ។

ការស្នើនេះ បានធ្វើឡើងនៅរសៀលថ្ងៃទី១៣ ខែវិច្ឆិកា ឆ្នាំ២០២៥ ក្នុងឱកាសលោកអញ្ជើញទទួលជួបសម្តែងការគួរសម និងពិភាក្សាការងារជាមួយលោក Tran Tuan Anh អគ្គកុងស៊ុលវៀតណាម ប្រចាំខេត្តបាត់ដំបង ដើម្បីពង្រឹងទំនាក់ទំនង កិច្ចសហប្រតិបត្តិការ និងស្វែងយល់ពីសក្តានុពលនៅខេត្តបាត់ដំបង។

ជាកិច្ចចាប់ផ្ដើមលោក សុខ លូ បានថ្លែងនូវការស្វាគមន៍យ៉ាងកក់ក្ដៅ ជូនចំពោះជាមួយលោក Tran Tuan Anh បន្ទាប់ពីបានទទួលតួនាទីនៅប្រទេសកម្ពុជា។

ឆ្លៀតក្នុងឱកាសនេះ លោកអភិបាលខេត្ត បានជម្រាបជូន លោកអគ្គកុងស៊ុល ពីសក្តានុពលរបស់ខេត្តបាត់ដំបងថា បាត់ដំបងជាខេត្តស្ថិតនៅភាគពាយ័ព្យនៃប្រទេសកម្ពុជា មានព្រំប្រទល់ជាប់នឹងប្រទេសថៃប្រវែងជាង ១៤៤,៨ គីឡូម៉ែត្រ មានច្រកអន្តរជាតិ២ និងច្រកតំបន់ ៣ ជាមួយប្រទេសថៃ។ ខេត្តបាត់ដំបង ជាខេត្តដែលមានសក្ដានុពល លេីវិស័យ កសិកម្ម និងទេសចរណ៍ និងសេវាកម្ម មានប្រជាជនជាង ១លាន ៣សែននាក់ មាន១៤ ក្រុង-ស្រុក ភាគច្រើន បងប្អូនប្រជាពលរដ្ឋប្រកបរបរកសិកម្ម។

លោកបានបន្តថា ខេត្តបាត់ដំបង គឺជាខេត្តដែល កំពុងអភិវឌ្ឍ មិនត្រឹមតែមានសក្ដានុពលខាងផ្នែកកសិកម្មប៉ុណ្ណោះទេ ថែមទាំងមានសក្តានុពលខាងផ្នែកទេសចរណ៍ផងដែរ ដោយក្នុងក្រុងបាត់ដំបងមានសំណង់បុរាណជាង ៨០០ ខ្នងផ្ទះ និងមានវត្តបុរាណជាច្រើនដែលមានវ័យចំណាស់ជាង ១០០ឆ្នាំ ត្រូវបានថែរក្សា អភិរក្ស និងមានតំបន់ទេសចរណ៍ធម្មជាតិ និងតំបន់ទេសប្រវត្តិសាស្ត្រជាច្រើនផងដែរ។ ជារួម ខេត្តបាត់ដំបងនៅខ្វះការវិនិយោគផ្នែកឧស្សាហកម្ម និងកែច្នៃ វិចខ្ចប់ កសិផលផ្សេងៗនៅមានកំរិតនៅឡើយ។

ទន្ទឹមនឹងនោះដែរ ខេត្តក៏កំពុងមានតម្រូវការជាច្រើនផ្នែក ដោយទាមទារឱ្យអ្នកវិនិយោគិនក្នុងស្រុក និងក្រៅស្រុកចាប់អារម្មណ៍បណ្តាក់ទុនវិនិយោគផ្នែក កសិ-ឧស្សាហកម្ម ក្នុងការកែច្នៃ កសិផល ដើម្បីធ្វើការផ្គត់ផ្គង់ក្នុងស្រុកផង និងនាំចេញទៅក្រៅប្រទេស។

ជាការឆ្លេីយតប លោក Tran Tuan Anh បានទទួលយកនូវ អ្វីដែលលោកអភិបាលខេត្ត បានលេីកឡេីង។

ក្នុងជំនួបសម្តែងការគួរសម និងពិភាក្សាកាងានេះដែរ លោក Tran Tuan Anh ក៏បានថ្លែងអំណរគុណ ដល់រដ្ឋបាលខេត្តបាត់ដំបង ដែលបានទទួលស្វាគមន៍យ៉ាងរាក់ទាក់ និងផ្តល់ការគាំទ្រដល់កិច្ចសហប្រតិបត្តិការ និងបានផ្តល់ឱកាសបានសិក្សាស្វែងយល់ពីសក្តានុពល និងស្វែងយល់អំពីឱកាសវិនិយោគ ក្នុងខេត្តបាត់ដំបង ដែលជាខេត្តដ៏ល្អមួយនេះ ជាពិសេសមានឆន្ទៈដូចគ្នា ក្នុងការជួយអភិវឌ្ឍប្រទេសជាតិ។

លោក Tran Tuan Anh គូសបញ្ជាក់ថា ការជួបសម្តែងការគួរសមនាពេលនេះដែរ គឺមានគោលបំណង ដើម្បីស្វែងរកការគាំទ្រ និងជួយលើកកម្ពស់កិច្ចសហប្រតិបត្តិការលើកកម្ពស់ការធ្វើពាណិជ្ជកម្ម និងការលើកកម្ពស់វិស័យទេសចរណ៍ និងការទំនាក់ទំនងល្អរវាងប្រជាជននិងប្រជាជន ការវិនិយោគរវាងប្រទេសទាំងពីរ ជាពិសេសខេត្តបាត់ដំបង និងសាធារណរដ្ឋសង្គមនិយមវៀតណាម ដើម្បីលើកតម្កើងនូវស្ថានភាពសេដ្ឋកិច្ចរបស់ប្រជាជនឲ្យមានភាពល្អប្រសើរឡើងថែមទៀត ព្រមទាំងពង្រឹងទំនាក់ទំនងល្អរវាងប្រទេសទាំងពីរយូរអង្វែងជាមួយគ្នា៕