(ក្រចេះ)៖ រដ្ឋបាលខេត្តក្រចេះ ដោយមានមន្ទីរកសិកម្មរុក្ខាប្រមាញ់និងនេសាទ និងមន្ទីរទេសចរណ៍ខេត្តក្រចេះ បានរៀបចំប្រារព្ឋទិវាសត្វផ្សោតដើម្បីរំលឹកដល់សត្វផ្សោតទន្លេមេគង្គ និងចូលរួមលើកកម្ពស់ការយល់ដឹងដល់សាធារណជនទូទៅអំពីសារៈសំខាន់នៃសត្វផ្សោត។

ពិធីនេះបានរៀបចំឡើងនៅទីតាំងរមណីយដ្ឋានអន្លង់ផ្សោតកាំពី ស្ថិតនៅក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ កាលពីថ្ងៃទី១៥ ខែវិច្ឆិកា ឆ្នាំ២០២៥ ក្រោមអធិបតីភាពលោកស្រី អ៉ឹម រចនា អនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទ និងលោក ហង់ ចាន់ឌី អភិបាលរងខេត្តក្រចេះ។

ការៀបចំទិវានេះមានគោលបំណងរំលឹកដល់សត្វផ្សោតទន្លេមេគង្គ លើកកម្ពស់ការយល់ដឹងដល់សាធារណៈជនទូទៅអំពីសារៈសំខាន់សត្វផ្សោត និងខ្លឹមសារ លិខិបទដ្ឋានគតិយុត្តិពាកព័ន្ធ ពិសេសច្បាប់ស្តីពីជលផល និងបង្កើនការយល់ដឹងអំពីសារៈសំខាន់នៃការការពារសត្វផ្សោត ធនធានជលផល និងប្រព័ន្ធអេកូឡូស៊ី តាមរយៈការផ្សាភ្ជាប់ការអប់រំតាមបែបព្រះពុទ្ធសាសនា ការអភិវឌ្ឍន៍ស័យទេសចរណ៍ ការបង្កើតរបរចិញ្ចឹមជីវិតសម្រាប់ប្រជាពលរដ្ឋមូលដ្ឋាន ក្រោមប្រធានបទ ការពារសត្វផ្សោត គឺការពារតម្លៃរបស់យើង។

ក្រៅពីនោះក៏មានក្នុងយុទ្ធនាការដើររួមគ្នាដើម្បីក្តីមេត្តា និងការរួបរួមគ្នាចូលរួមទាំងអស់គ្នា ជាមួយសហគមន៍ ព្រះសង្ឃ សិស្សានុសិស្ស យុវជន និងអាជ្ញាធរ ក្នុងយុទ្ធនាការនៃធម្មយាត្រាចម្ងាយ ៣គីឡូម៉ែត្រ ដើម្បីប្រសិទ្ធពរជ័យ និងអបអរសាទរទិវាសត្វផ្សោតទន្លេមេគង្គ ដែលជានិមិត្តរូបដ៏ពិសិដ្ឋ និងភាពសុខដុមរមនានៃទន្លេរបស់យើង។

ក្នុងនោះមន្ទីរទេសចរណ៍ខេត្តក្រចេះ បានចូលរួមរៀបចំដាក់តាំងបង្ហាញ ភ្លក់ក្រឡានថ្មគ្រែ សំដៅចូលរូមពង្រឹង លើកទឹកចិត្ត លើកកម្ពស់គុណភាពផលិតផលក្រឡាន ប្រកបដោយការទទួល ខុសត្រូវរួមចំណែកស្រូបទាញការចាប់អារម្មណ៍កាន់តែខ្លាំងពីភ្ញៀវទេសចរ ក្រោមពាក្យស្លោករួមដែលយើងរួមគ្នាលើកឡើងក្នុងកម្មវិធីនេះគឺ «ក្រឡានរសជាតិឆ្ងាញ់ល្អ ទេសចរមានកំណើន» «ក្រឡានថ្មគ្រែ ថែកេរ្តិ៍ដូនតា» «ក្រឡានល្អ ស្វាគមន៍ទេសចរឆ្នាំ២០២៦»។ ក្រៅពីនោះក៏មានការដាក់តាំងផលិតផល ដែលមានដូចជាក្រូចថ្លុង ក្រឡានថ្មគ្រែ ទឹកឃ្មុំ ត្រីងៀត បន្លែសាច់ ក្រម៉ា វត្ថុអនុស្សាវរីយ៍ផ្សេងជាច្រើនទៀត ដែលជាស្នាដៃផលិតដោយសហគមន៍នៅតាមតំបន់អេកូទេសចរណ៍ នៅក្នុងខេត្តក្រចេះ ។

ថ្លែងនៅក្នុងទិវាសត្វផ្សោតទន្លេរមេគង្គ អនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទ លើកឡើងថា ប្រទេសដែលមានសត្វផ្សោតទឹកសាបរស់នៅក្នុងតំបន់អាស៊ីនិងអាមេរិកខាងត្បូងតែងតែរៀបចំទិវាសត្វផ្សោត ទឹកសាបក្នុងខែតុលានិងវិច្ឆិកាជារៀងរាល់ឆ្នាំ។ ថ្ងៃនេះជាឱកាសដ៏វិរសេសវិសាលមួយដែលប្រទេសកម្ពុជាយើងចូល រួមជាមួយពិភពលោក រៀបចំទិវាសត្វផ្សោតទន្លេមេគងនាថ្ងៃនេះ នៅរមណីយដ្ឋានអន្លង់ផ្សោតកាំពី ដែលជាតំបន់ដ៏សំខាន់នៃដែនជម្រករបស់សត្វផ្សោត នៅប្រទេសកម្ពុជាយើង ។

លោកស្រីបញ្ជាក់ថា សត្វផ្សោតជាប្រភែទសត្វដ៏កម្រនេះ ដែលត្រូវបានចាត់ ទុកជារតនៈសម្បត្តិជាតិមានជីវិតដ៏ពិសិដ្ឋ «ខ្ញុំសូមថ្លែង អំណរគុណយ៉ាងជ្រាវជ្រៅដល់រដ្ឋបាលខេត្តក្រចេះ មន្ទីរកសិកម្មរុក្ខាប្រមាញ់ និងនេសាទខេត្តក្រចេះ និងអង្គការ WWF ចំពោះកិច្ចសហការរៀបចំប្រាព្ធទិវានេះ ឡើងនាថ្ងៃនេះ ហើយក៏សូមអរគុណផងដែរដល់ប្រជាជននៃសហគមន៍មូលដ្ឋាន បងប្អូនឆ្នាំទន្លេ និងក្មួយៗសិស្សានុសិស្សទាំងអស់ចំពោះការចំណាយពេលវេលាចូលរួមក្នុងទិវានាថ្ងៃនេះ»។

អនុរដ្ឋលេខាធិការ បានជំរុញផ្តល់ការគាំទ្រ និងលើកទឹកចិត្តដល់មន្រ្តីឆ្មាំទន្លេ អាជ្ញាធរពាក់ព័ន្ធ និងអង្គការដៃគូ បន្តរួមសហការលើការងារអភិរក្សសត្វផ្សោតទន្លេមេគង្គឱ្យកាន់តែមានប្រសិទ្ធភាពថែមទៀតដើម្បីរក្សាប្រភេទធនធានជលផលជា «បេះដូងនៃទន្លេមេគង្គ» ឱ្យបន្តជារតនសម្បត្តិរបស់មិនអាចកាត់ថ្លៃបានរបស់កម្ពុជា និងសកលលោក៕