(កំពត)៖ លោក អំ តារា អនុប្រធានប្រចាំការស.ស.យ.ក ស្រុកទឹកឈូ ខេត្តកំពត បានលើកឡើងថា ការចុះមកជួយច្រូតកាត់ប្រមូលផលស្រូវជូនប្រជាពលរដ្ឋ ដើម្បីផ្សព្វផ្សាយវិស័យកសិកម្មស្រុក បង្កើតទំនាក់ទំនងល្អ រវាងយុវជនដែលជាមន្ត្រីកសិកម្មតាមឃុំនីមួយៗ ឲ្យធ្វើការរួមគ្នារួមសាមគ្គីគ្នា ដើម្បីជួយដល់កសិករជួបការលំបាកក្នុងជីវភាព និងបង្ហាញអំពីសកម្មភាពទូទៅរបស់ ស.ស. យ.ក ស្រុកទឹកឈូផង។

លោកថ្លែងបែបនេះ ក្នុងឱកាសតំណាងលោក អ៉ឹម ច័ន្ទសោធន ប្រធានសហភាពសហព័ន្ធយុវជនកម្ពុជាស្រុក ដឹកនាំយុវជនស.ស.យ.ក វិស័យកសិកម្ម និងយុវជនស.ស.យ.ក ឃុំកណ្ដោល ចុះជួយប្រមូលផល និងច្រូតកាត់ជូនគ្រួសារ ប៉ុក ប៉ែត ដែលជួបការលំបាក និងមានបញ្ហាខ្វះខាតពលកម្ម នៅក្នុងភូមិទឹកក្រហម ឃុំកណ្ដោល ស្រុកទឹកឈូ ខេត្តកំពត ក្នុងផ្ទៃដីជាង១០អា ដែលផលិតស្រូវផ្ការំដួល នៅភូមិទឹកក្រហម ឃុំកណ្តោល ស្រុកទឹកឈូ ខេត្តកំពត នាថ្ងៃសុក្រ ទី១៤ ខែវិច្ឆិកា ឆ្នាំ២០២៥។

លោក អំ តារា បានបញ្ជាក់ថា ដោយមានការណែនាំពីលោក អ៉ឹម ច័ន្ធសោធន អភិបាលស្រុក និងជាប្រធាន ស.ស.យ.ក ស្រុកទឹកឈូ រូបលោកបានដឹកនាំ ក្រុមយុវជនវិស័យកសិកម្ម ដែលជាមន្ត្រីកសិកម្ម ឃុំទាំងអស់ក្នុងស្រុក និងយុវជន និងអាជ្ញាធរឃុំកណ្តោល ចុះជួយច្រូតស្រូវជូនប្រជាពលរដ្ឋ មានជីវភាពខ្វះខាតនៅភូមិទឹកក្រហម។

ក្រុមយុវជនដែលបានចូលរួមច្រូតស្រូវបានបង្ហាញចំណាប់អារម្មណ៍សប្បាយរីករាយ ហើយថា ពួកគាត់បានស្វែងយល់ច្រើនអំពីផលលំបាក នៃការធ្វើដំណាំស្រូវតាមបែបប្រពៃណី ជាក់ស្តែង ការច្រូតកាត់ដោយដៃ វាជាប្រពៃណីមួយរបស់ពលរដ្ឋខ្មែរ ដែលជិតបាត់បង់ទៅហើយ ដោយសារការអភិវឌ្ឍ និង របបគំហើញនៃបច្ចេកវិទ្យា និងទំនើបកម្ម នៃការប្រើប្រាស់គ្រឿងចក្រ(ម៉ាស៊ីន) ជំនួស កម្លាំងមនុស្ស។

ពលរដ្ឋម្ចាស់ ស្រែបានសម្តែងសេចក្តីសប្បាយរីករាយ និងអរគុណ ចំពោះអភិបាលស្រុកទឹកឈូ និងក្រុមយុវជនដែលបានចុះមកជួយ តាំងពីការបង្ហាត់បង្ហាញអំពីបច្ចេកទេសចិញ្ចឹម និង ដាំ ដុះ រហូតដល់មកជួយប្រមូលផលឲ្យថែមទៀត។

សូមបញ្ជាក់ថា ស្រុកទឹកឈូ ក្រៅពីវិស័យទេសចរណ៍ វិស័យកម្មក៏សត្តានុពលខ្លាំងដែរ នៅគ្រប់ឃុំទាំង ១៣ មានមន្ត្រីបច្ចេកទេសកសិកម្មទាំងអស់ ហើយពួកគាត់បានស្ម័គ្រចិត្ត ចូលជាសមាជិក សមាជិកា នៃសហភាពសហព័ន្ធយុវជនកម្ពុជា ដើម្បីចូលរួមចំណែកជួយសង្គម និងអភិវឌ្ឍមូលដ្ឋាន របស់ខ្លួនឲ្យកាន់តែប្រសើរ៕