(ព្រះសីហនុ)៖ អាជ្ញាធរជាតិប្រយុទ្ធប្រឆាំងគ្រឿងញៀន និងរដ្ឋបាលស្រុកព្រៃនប់ ខេត្តព្រះសីហនុ នៅថ្ងៃទី១៧ ខែវិច្ឆិកា ឆ្នាំ២០២៥នេះ បានរួមគ្នផ្សពព្វផ្សាយលើកកម្ពស់ចំណេះដឹងពីបញ្ហាគ្រឿងញៀន និងការប្រើប្រាស់ App NoDrug ដល់អង្គភាព និងអាជ្ញាធរមូលដ្ឋានភូមិ ឃុំ ទូទាំងស្រុកព្រៃនប់ ជិត២០០នាក់។

ក្នុងនាមលោក ម៉ាង ស៊ីណេត អភិបាលខេត្តព្រះសីហនុ, លោកបណ្ឌិត អ៉ី ធារិន អភិបាលស្រុក បានលើកឡើងពីស្ថានភាពទូទៅ ពិសេសបញ្ហាគ្រឿងញៀនក្នុងមូលដ្ឋានដែលគណៈកម្មាធិការត្រួតពិនិត្យគ្រឿងញៀនស្រុកព្រៃនប់ បានខិតខំធ្វើការប្រយុទ្ធប្រឆាំងដើម្បីសុវត្ថិភាពរបស់ប្រជាពលរដ្ឋ។

ថ្លែងក្នុងនាម នាយឧត្តមសេនីយ៍ មាស វិរិទ្ធអគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន, ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ បានពាំនាំការកោតសរសើរពីលោកសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជូនចំពោះ អាជ្ញាធរគ្រប់ថ្នាក់នៃខេត្តព្រះសីហនុ និយាយជារួម និងនិយាយដោយឡែកអាជ្ញាធរស្រុកព្រៃនប់ ដែលបានចូលរួមចំណែកក្នុងការងារប្រយុទ្ធប្រឆាំងគ្រឿងញៀន។

ឧត្តមសេនីយ៍ឯក លឹម តុងហួត បានបន្តថា ស្រុកព្រៃនប់ ជាស្រុកដំបូងគេដែលបានធ្វើការងារផ្សព្វផ្សាយដល់ប្រតិបត្តិករផ្ទាល់ជាមេឃុំ មេភូមិ ព្រមទាំងនាយកសាលាទូទាំងស្រុកសូមបន្តយកចិត្តទុកដាក់ លើកកម្ពស់ការងារផ្សព្វផ្សាយនេះឱ្យបានទូលំទូលាយពីបញ្ហាគ្រឿងញៀនក៏ដូចជាជំរុញការប្រើប្រាស់ App NoDrug ដល់ប្រជាពលរដ្ឋ សិស្សានុសិស្ស ដើម្បីប្រសិទ្ធភាព បង្ការទប់ស្កាត់បានកុំឱ្យប្រជាពលរដ្ឋធ្លាក់ចូលទៅក្នុងអន្ទាក់ នៃគ្រឿងញៀន «គ្មានគ្រឿងញៀន សហគមន៍សុខសាន្ត មានការអភិវឌ្ឍ»៕