(កំពង់ធំ)៖ លោក សាយ គឹមឡម អភិបាល នៃគណៈអភិបាលស្រុកស្ទោង នៅថ្ងៃទី១៨ ខែវិច្ឆិកា ឆ្នាំ២០២៥ បានជំរុញគ្រប់ភាគីពាក់ព័ន្ធសហការគ្នា ដើម្បីភ្ជាប់បណ្ដាញទឹកស្អាតជូនពលរដ្ឋបានប្រើប្រាស់គ្រប់ខ្នងផ្ទះ។

ថ្លែងក្នុងវគ្គសិក្ខាសាលាថ្នាក់ស្រុកប្រចាំឆ្នាំ២០២៦ ក្រោមកិច្ចសហការជាមួយអង្គការទស្សនពិភពលោកប្រចាំស្រុកស្ទោង, លោកសាយ គឹមឡម បានសង្កត់ធ្ងន់ថា អង្គការទស្សនៈពិភពលោកគឺជាដៃគូអភិវឌ្ឍន៍ដ៏មានសក្តានុពលបំផុតមួយ ក្នុងចំណោមដៃគូជាច្រើនទៀត ក្នុងការលើកកម្ពស់និងអភិវឌ្ឍន៍មូលដ្ឋានជាច្រើនវិស័យដូចជាអប់រំ សុខភាព អនាម័យ កសិកម្ម ទឹកស្អាតជាអាទិ៍ ដែលពិតជាបានរួមចំណែកយ៉ាងធំធេងបំផុត ក្នុងការលើកកម្ពស់សុខុមាលភាពប្រជាពលរដ្ឋ ក្នុងស្រុកស្ទោងឱ្យកាន់តែប្រសើរឡើង ស្របតាមយុទ្ធសាស្ត្ររាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី។

លោក ក៏បានលើកទឹកចិត្តដល់អាជ្ញាធរឃុំគ្រប់ឃុំ ត្រូវបង្កើនកិច្ចសហប្រតិបត្តិការឱ្យល្អឡើងថែមទៀត ជាមួយអង្គការទស្សនៈពិភពលោក ដៃគូអភិវឌ្ឍន៍នានា ក៏ដូចជារដ្ឋាករទឹកស្វ័យតស្ទោង-តាំងក្រសាំង ក្នុងការតភ្ជាប់បណ្ដាញទឹកស្អាត ជូនពលរដ្ឋបានប្រើប្រាស់ ជាពិសេសពលរដ្ឋដែលមានប័ណ្ណសមធម៌ ឬប័ណ្ណក្រីក្រឱ្យអស់ពីលទ្ធភាព។

បន្ថែមពីនេះ លោក សាយ គឹមឡម បានកោតសរសើរនិងថ្លែងអំណរគុណយ៉ាងជ្រាលជ្រៅបំផុតដល់លោកស្រី ចាន់ សុផល និងសហការី តំណាងអង្គការទស្សនៈពិភពលោក ពិសេសប្រជាជននិងថ្នាក់ដឹកនាំនៃប្រទេសម៉ាឡេស៊ី ដែលជាអ្នកឧបត្ថម្ភគាំទ្រនូវមូលនិធិ យ៉ាងច្រើនសន្ធឹកសន្ធាប់លើសពីការគណនា និងតែងតែឧបត្ថម្ភគាំទ្រ នូវគ្រឿងឧបភោគបរិភោគសម្ភារប្រើប្រាស់ ដល់រដ្ឋបាលស្រុកស្ទោង សម្រាប់ធ្វើកិច្ចការមនុស្សធម៌ជាមួយប្រជាពលរដ្ឋ ដែលងាយរងហានិភ័យនិង ជួបឧបទ្ទវហេតុផ្សេងៗ។

សូមជម្រាបថា ក្នុងអង្គសិក្ខាសាលានេះមានការប្រគល់ ទទួលនូវគ្រឿងឧបភោគបរិភោគ ជារួមមាន៖ មី១០០កេស ទឹកស៊ីអ៊ីវ ១០០យួរ ប្រេងឆា១០០ដប និងត្រីខរ ១០០យួរផងដែរ៕