(កណ្ដាល)៖ លោក ហេង សុភារិទ្ធ នាយខណ្ឌរដ្ឋបាលជលផលខេត្តកណ្ដាល បានបន្តដឹកនាំក្រុមការងារចុះបង្ក្រាបបទល្មើសនេសាទជាបន្តបន្ទាប់ដូចភ្លៀងរលឹម នៅតាមភូមិសាស្ត្រតំបន់ទឹកលិច ទូទាំងខេត្តកណ្ដាល សំដៅកម្ទេចចោលរាល់បទល្មើសដែលបង្កវិនាសកម្មផលមច្ឆាជាតិ មិនឲ្យបំផ្លិចបំផ្លាញឡើយ។

ថ្លែងប្រាប់អ្នកយកព័ត៌មាន Fresh News ប្រចាំខេត្តកណ្ដាល នាថ្ងៃទី១៨ ខែវិច្ឆិកា ឆ្នាំ២០២៥នេះ លោក ហេង សុភារិទ្ធ បានបញ្ជាក់ថា លោកមិនដែលពាក់ព័ន្ធនឹងសំណូកណាមួយ ឲ្យគេប្រព្រឹត្តបទល្មើសនេសាទនោះទេ ពោលគឺលោកមិនពាក់ព័ន្ធដាច់ខាត ប៉ុន្តែបានដាក់បទបញ្ជាដល់មន្ត្រីជលផលទាំងអស់ទូទាំងខេត្ត ត្រូវចុះអនុវត្តបង្ក្រាបឲ្យអស់រាល់បទល្មើសនេសាទ នៅភូមិសាស្ត្រដែនទឹកក្នុងខេត្តកណ្ដាល ហើយពិសេសមិនឲ្យពាក់ព័ន្ធដាច់ខាតនឹងសំណូកណាមួយជាថ្នូរការបើកឲ្យប្រព្រឹត្តិបទល្មើសដោយសេរីជាដាច់ខាត។ បើដឹងថានរណាហ៊ានពាក់ព័ន្ធ បានន័យថា អ្នកនោះកំពុងចូលរួមប្រព្រឹត្តបទល្មើសដែរ។

ក្នុងនាមមន្ត្រីជំនាញជលផលខេត្ត, លោក ហេង សុភារិទ្ធ បានអំពាវនាវដល់ប្រជាពលរដ្ឋទាំងអស់ មិនថាអ្នកណាទេ មិនគួរប្រព្រឹត្តបទល្មើសនេសាទឡើយ ព្រោះវាបានបានផ្លិចបំផ្លាញផលមច្ឆាជាតិ យើងខ្លាំងណាស់ ហើយបើសិនជារកឃើញថា នរណាហើយជាប់ពាក់ព័ន្ធ នោះកម្លាំងជំនាញនឹងអនុវត្តន៍ច្បាប់មិនខានឡើយ។ កម្លាំងជលផល នឹងនៅតែបន្តចុះបង្ក្រាបគ្រប់ទីតាំងបទល្មើសទាំងអស់ ទូទាំងខេត្តកណ្ដាល។

សូមជម្រាបថា ខណ្ឌរដ្ឋបាលជលផលកណ្តាល បានធ្វើសកម្មភាពចុះបង្ក្រាបបទល្មើសនេសាទជាហូរហែរមកហើយ។ មកដល់ថ្ងៃសុក្រទី១៤ ខែវិច្ឆិកា ឆ្នាំ២០២៥នេះ ខណ្ឌរដ្ឋបាលជលផលកណ្តាល សហការអធិការដ្ឋានរដ្ឋបាលចតុមុខ ផ្នែកបាសាក់ ផ្នែករកាកោង សង្កាត់ពញាឮ គណៈបញ្ជាការឯកភាពរដ្ឋបាលស្រុកពញាឮ បានចុះត្រួតពិនិត្យ និងបង្ក្រាបបទល្មើសនេសាទប្រើឧបករណ៍ស្បៃមុង នៅចំណុចភូមិដងគោម និងភូមិកំពង់ក្នុងឃុំកំពង់អុស ស្រុកពញាឮ ខេត្តកណ្តាល។ ប្រើមធ្យោបាយកាណូតចំនួន៤គ្រឿង កម្លាំងសរុប៣៥នាក់។

លោកបន្តថា ជាលទ្ធផលអនុវត្តបានរួមមាន លូស្បៃមុងស្មើ៤៥មាត់លូ, របាំងស្បៃមុងស្មើ៥២៥០, បង្គោលតូច ធំស្មើ៤៥០ដើម និងលែងត្រីចម្រុះចូលបឹងវិញចំនួនស្មើ១៣៥គីឡូក្រាម៕