(បាត់ដំបង)៖ លោក ណុះ ស្លេះ រដ្ឋលេខាធិការក្រសួងអប់រំ យុជន និងកីឡា តំណាងបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងលោក សុខ លូ អភិបាលខេត្តបាត់ដំបង នៅព្រឹកថ្ងៃទី២០ ខែវិច្ឆិកា ឆ្នាំ២ឥ២៥នេះ បានអញ្ជើញសម្ពោធដាក់ឱ្យប្រើប្រាស់ជាផ្លូវការអគារសិក្សាថ្នាក់សមាហរណកម្មសម្រាប់បង្រៀនដល់សិស្សមានពិការភាពសតិបញ្ញា និងអូទីសឹម ព្រមទាំងសមិទ្ធផលនានា។ ពិធីនេះធ្វើឡើងនៅក្នុងបរិវេណសាលាបឋមសិក្សាព្រែកនរិន្ទ ស្រុកឯកភ្នំ ខេត្តបាត់ដំបង។

លោក សុខ លូ ថ្លែងអំណរគុណយ៉ាងជ្រាលជ្រៅចំពោះអង្គការដៃគូរអភិវឌ្ឍនានា ដែលបានជួយឧបត្ថម្ភកសាងសាងសាលានេះឡើងដែលជាតម្រូវការចាំបាច់ក្នុងមូលដ្ឋាន សម្រាប់ប្រើប្រាស់។ ការជួយបង្រៀនដល់កុមារមានពិការភាពសតិបញ្ញា និងអូទីសឹម ពិតជាមានសារសំខាន់បំផុតសម្រាប់កុមារ និងខេត្តបាត់ដំបង។

លោកបានបន្តក្រើនរំលឹកសិស្សានុសិស្សចៀសឆ្ងាយពីគ្រឿងញៀន គោរពច្បាប់ចរាចរណ៍ ចេះថែរក្សាអនាម័យបរិស្ថាន ចេះគោរពលោកគ្រូ អ្នកគ្រូ ធ្វើជាសិស្សល្អ ពលរដ្ឋល្អក្នុងសង្គម។ អភិបាលខេត្ត ក៏បានផ្តាំផ្ញើមាតា បិតា អាណាព្យាបាលសិស្ស លោកគ្រូ អ្នកគ្រូ ខិតខំជំរុញកូនចៅៗឱ្យបានសិក្សារៀនសូត្របានខ្ពង់ខ្ពស់ និងយកចិត្តទុកដាក់ក្នុងការបង្រៀនសិស្សានុសិស្សឱ្យបានល្អ។

ឆ្លៀតក្នុងឱកាសនេះ លោករដ្ឋលេខាធិការនៃក្រសួងអប់រំ យុជន និងកីឡា បានកោតសរសើរ និងចូលរួមអបអរសាទរជាមួយប្រជាពលរដ្ឋ ដែលមានសាលាបែបនេះសម្រាប់អប់រំ ដល់កុមារមានពិការភាពសតិបញ្ញា និងអូទីសឹមទី និងជាមោទនភាព សម្រាប់ ស្រុកឯកភ្នំ មានសាលាបង្រៀនល្អស្អាត។

លោកបានថ្លែងអំណរគុណដល់អង្គការដៃគូរអភិវឌ្ឍ ក្នុងការកសាងសាលានេះឡើង ហើយក្នុងនាម លោកផ្ទាល់ បានសម្តែងនូវសេចក្តីត្រេកអរ ចំពោះសមិទ្ធផលដ៏ល្អនេះ បានកសាងឡើងនៅខេត្តបាត់ដំបងយើងនេះផងដែរ៕