(ទីក្រុងណៃពិដោ)៖ លោក ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន នារសៀលថ្ងៃទី២០ ខែវិច្ឆិកា ឆ្នាំ២០២៥នេះ បានដឹកនាំគណៈប្រតិភូកម្ពុជាអញ្ជើញចូលរួមកិច្ចប្រជុំរដ្ឋមន្រ្តីដឹកជញ្ជូន អាស៊ាន-ចិន លើកទី២៤, កិច្ចប្រជុំរដ្ឋមន្រ្តីដឹកជញ្ជូន អាស៊ាន-ជប៉ុន លើកទី២៣ និង កិច្ចប្រជុំរដ្ឋមន្រ្តីដឹកជញ្ជូន អាស៊ាន-កូរ៉េ លើកទី១៦​ នៅទីក្រុង​ណៃពិដោ​ ប្រទេសមីនយ៉ាន់ម៉ា។

ក្នុងកិច្ចប្រជុំជាមួយដៃគូសន្ទនានីមួយៗលោក ប៉េង ពោធិ៍នា បានធ្វើបទអន្តរាគមន៍ដោយបានថ្លែងអំណរគុណដល់ដៃគូសន្ទនាទាំងបីដែលបានគាំទ្រយ៉ាងសកម្មដល់ការអភិវឌ្ឍលើវិស័យដឹកជញ្ជូន និងឡូជីស្ទីក ទាំងក្នុងក្របខណ្ឌអាស៊ាន និងក្នុងក្របខណ្ឌទ្វេភាគី។

លោករដ្ឋមន្រ្តី បានសំដែងនូវការគាំទ្រ និងអនុម័តផែនការសកម្មភាពដែលត្រូវបន្តអនុវត្តក្រោយឆ្នាំ២០២៥ ក៏ដូចជាបានបញ្ជាក់ពីការប្តេជ្ញាចិត្តរបស់កម្ពុជាក្នុងការបន្តសហការយ៉ាងជិតស្និទ្ធជាមួយអាស៊ាន និងដៃគូសន្ទនា ដើម្បីលើកកម្ពស់ កិច្ចសហប្រតិបត្តិការដឹកជញ្ជូន ដែលមានលក្ខណៈជាក់ស្តែង ទស្សនវិស័យអនាគត និងផ្តល់ផលប្រយោជន៍ដល់ប្រជាជន។

សូមជម្រាបថា រដ្ឋមន្រ្តីដឹកជញ្ជូនអាស៊ាន បានអនុម័តនូវឯកសារសំខាន់ចំនួន៣ ជាមួយដៃគូសន្ទនា ចិន ជប៉ុន និងកូរ៉េ រួមមាន៖ ផែនការយុទ្ធសាស្ត្រសម្រាប់កិច្ចសហប្រតិបត្តិការដឹកជញ្ជូនអាស៊ាន-ចិន ឆ្នាំ២០២៦-២០៣៥, ផែនការការងារភាពជាដៃគូដឹកជញ្ជូនអាស៊ាន-ជប៉ុន ឆ្នាំ២០២៥-២០២៦ និងផែនទីបង្ហាញផ្លូវនៃកិច្ចសហប្រតិបត្តិការដឹកជញ្ជូនអាស៊ាន-កូរ៉េ ឆ្នាំ២០២៦-២០៣០៕