(កំពង់ឆ្នាំង)៖ ប្រជាកសិករក្នុងខេត្តកំពង់ឆ្នាំង បានកំពុងតែប្រមូលផលស្រូវវស្សាដើមរដូវ (ស្រូវស្រាល) ព្រោះតែទិន្នផលស្រូវឆ្នាំនេះទទួលបានផលល្អ បើទោះជាតម្លៃស្រូវឆ្នាំនេះចុះថ្លៃបន្តិចក៏ដោយចុះ ក៏ប្រជាកសិករនៅតែមាន ទឹកចិត្តសប្បាយរីករាយក្នុងការប្រមូលផលស្រូវនាដើមរដូវនេះ ប្រកបដោយទឹកចិត្តសប្បាយរីករាយ ហើយពួកគាត់នៅតែមានជំនឿយ៉ាងមុតមាំថាតម្លៃស្រូវ និងឡើងថ្លៃវិញនៅពេលប្រមូលផលស្រូវរួចរាល់ ដោយសាររាជរដ្ឋាភិបាល កំពុងតែគិតគូរអំពីតម្លៃស្រូវដល់ប្រជាកសិករ។

ប្រជាកសិករមានទីលំនៅក្នុងភូមិគល់គប់ ឃុំស្រែថ្មី ស្រុករលាប្អៀរ ខេត្តកំពង់ឆ្នាំង បានឱ្យដឹងថា ស្រូវឆ្នាំ២០២៥ ទទួលបានរបបទឹកភ្លៀងគ្រប់គ្រាន់ ដែលធ្វើឱ្យទិន្នផលស្រូវល្អគ្រប់ទីកន្លែងដែលធ្វើឱ្យប្រជាកសិករសប្បាយរីករាយ បើទោះជាតម្លៃស្រូវឆ្នាំនេះចុះថ្លៃបន្តិចមែនក៏ដោយ ក៏ប្រជាកសិករនៅតែមានជំនឿយ៉ាងមុតមាំថាតម្លៃស្រូវ និងឡើងថ្លៃវិញនៅពេលដែលប្រជាកសិករប្រមូលផលស្រូវ (ធ្ងន់) នៅរយៈពេលប្រមាណជាមួយខែទៀតខាងមុខនេះ ដោយសា រតែបច្ចុប្បន្នរាជរដ្ឋាភិបាលកំពុងតែយកចិត្តទុកដាក់ការប្រមូលទិញស្រូវពីប្រជាកសិករនៅគ្រប់ទីកន្លែងក្នុងតម្លៃសមរម្យ។

កសិករថា ទាំងនេះគឺមកពីការយកចិត្តទុកដាក់ និងការលើកកម្ពស់ទៅលើវិស័យកសិកម្មរបស់របស់រាជរដ្ឋាភិបាល ដែលតែងតែគិតគូរដល់ប្រជាកសិករដោយមិនបណ្ដែតបណ្ដោយ ឱ្យឈ្មួញធ្វើព្យុះភ្លៀងទៅលើតម្លៃស្រូវ តាមតែអំពើចិត្តរបស់ឈ្មួញទៀតនោះឡើយ។

ចំណែកតម្លៃស្រូវបច្ចុប្បន្ននេះ លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង បានបញ្ជាក់ថា តម្លៃស្រូវក្នុងសប្តាហ៍នេះគឺស្រូវក្រអូប (ស្ងួត) តម្លៃ ១,២០០រៀល ក្នុង ១គីឡូក្រាម, ស្រូវចម្រុះ (ស្ងួត) ជាមធ្យមតម្លៃ៨៥០រៀល ក្នុង ១គីឡូក្រាម, ស្រូវផ្ការំដួលសើមតម្លៃ ៩០៨រៀល ក្នុង ១គីឡូក្រាម (ស្រូវប្រភេទនេះមានកុងត្រាជាមួយរោងម៉ាស៊ីនបានតម្លៃ១ ០៦០រៀល ក្នុង១គីឡូក្រាម) ស្រូវប្រភេទ OM5 451 សើម តម្លៃ៦២០រៀល ក្នុង ១គីឡូក្រាម តម្លៃស្រូវគ្រប់ប្រភេទនឹងឡើងថ្លៃជាងនេះនៅពេលដែលប្រជាកសិករប្រមូលផលស្រូវរួចរាល់ផងដែរ៕