(ភ្នំពេញ)៖ ស្ត្រីរងគ្រោះ ន.ល.ហ ដែលបានប្តឹងជនសង្ស័យឈ្មោះ ធី សុខឃឿន ម្ចាស់ហាង «ជំនោរកាហ្វេ» ពីបទ «រំលោភសេពសន្ថវៈ» ត្រូវបានលោកស្រី ទុង រតនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចេញដីកាកោះចូលទៅឆ្លើយបំភ្លឺនៅថ្ងៃទី២៤ ខែវិច្ឆិកា ឆ្នាំ២០២៥។

ស្រ្តីរងគ្រោះ បានស្នើយ៉ាងទទូចដល់តំណាងអយ្យការរាជធានីភ្នំពេញ​ មេត្តាចោទប្រកាន់ជនសង្ស័យតាមផ្លូវច្បាប់ និងជួយរកយុត្តិធម៌ដល់នាងដែលជាជនក្រីក្រ។

សូមបញ្ជាក់ថា បុគ្គលិកហាងជំនោរកាហ្វេ ឈ្មោះ ន.ល.ហ បានប្តឹងម្ចាស់ហាងជំនោរកាហ្វេឈ្មោះ ធី សុខឃឿន ពីបទ «រំលោភសេពសន្ថវៈ» ព្រមទាំងទទូចឲ្យតំណាងអយ្យការជួយរកយុត្តិធម៌ជូននាង និងផ្តន្ទាទោសបុគ្គលនេះតាមច្បាប់។

យោងតាមពាក្យបណ្តឹង ដែលដាក់ជូនតំណាងអយ្យការអមសាលាដំបូងរាជធានីភ្នំពេញ ជនរងគ្រោះ ត្រូវបានម្ចាស់ហាងរំលោភ ប្រព្រឹត្តកាលពីថ្ងៃទី១៤ ខែមិថុនា ឆ្នាំ២០២៥ រហូតដល់អំឡុងខែកក្កដា ឆ្នាំ២០២៥៕