(កណ្តាល)៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល នៅថ្ងៃទី២១ ខែវិច្ឆិកា ឆ្នាំ២០២៥ បានចេញមកបំភ្លឺជូនសាធារណជនទៅនឹងបណ្តាញសារព័ត៌មានផ្សព្វផ្សាយជាបន្តបន្ទាប់ពាក់ព័ន្ធ លោកឧត្តមសេនីយ៍ត្រី សុខ ស៊ីថា បានប្រើអំពើហិង្សាយដោយចេតនា នៅសង្កាត់ព្រែកតាកូវ ក្រុងអរិយក្សត្រ។

ដោយអនុវត្តតាមការដឹកនាំបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងលោក គួច ចំរើន អភិបាលខេត្តកណ្តាល, លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យលោកអធិការនគរបាលក្រុងអរិយក្សត្រ ស្រាវជ្រាវបំភ្លឺពាក់ព័ន្ធករណីខាងលើភ្លាមៗ។

របាយការណ៍របស់ស្នងការដ្ឋាននគរបាលខេត្តកណ្តាល បានបញ្ជាក់ថា ករណីហិង្សាដោយចេតនានេះ បានកើតហេតុនៅវេលាម៉ោង ៩ព្រឹកនៅថ្ងៃទី១៧ ខែវិច្ឆិកា ឆ្នាំ២០២៥ នៅភូមិព្រែកតាកូវ សង្កាត់ព្រែកតាកូវ ក្រុងអរិយក្សត្រ ខេត្ដកណ្ដាល។

ជនរងគ្រោះមានចំនួន ២នាក់ រួមមាន៖

*ទី១៖ ឈ្មោះ ជឹម ធឿន អាយុ៦១ឆ្នាំ មុខរបរកសិករ មានទីលំនៅបច្ចុប្បន្នភូមិព្រែកតាកូវ សង្កាត់ព្រែកតាកូវ ក្រុងអរិយក្សត្រ ខេត្ដកណ្ដាល។ (រងរបួសហូរឈាមក្រោមសាច់ដុំដៃខាងឆ្វេង)
*ទី២៖ ឈ្មោះ ជឹម ស៊ីថា អាយុ៥៨ឆ្នាំ មុខរបរកសិករ មានទីលំនៅបច្ចុប្បន្នភូមិលើ សង្កាត់ស្វាយជ្រំ ក្រុងអរិយក្សត្រ ខេត្ដកណ្ដាល។

ដោយឡែកជនសង្ស័យ ចំនួន ០៥នាក់ (ឃាត់ខ្លួនបាន ០៤នាក់) រួមមាន៖

*ទី១៖ ឈ្មោះ សុខ ស៊ីថា អាយុ៤៦ឆ្នាំ មុខរបរនគរបាល (ឧត្តមសេនីយ៍ត្រី) មានទីលំនៅបច្ចុប្បន្នភូមិបឹងក្រចាប់ជើង ឃុំព្រែកតាមាក់ ស្រុកខ្សាច់កណ្តាល ខេត្ដកណ្ដាល (ជនដៃដល់)។ (គេចខ្លួន)
*ទី២៖ ឈ្មោះ សយ សារឿន អាយុ៤៨ឆ្នាំ មុខរបរកសិករ មានទីលំនៅបច្ចុប្បន្នភូមិតាជោ សង្កាត់សារិកាកែវ ក្រុងអរិយក្សត្រ ខេត្ដកណ្ដាល។ (ឃាត់ខ្លួន)
*ទី៣៖ ឈ្មោះ ញ៉េប ស្រួន ហៅក្រៅ ទ្រូ អាយុ៣៣ឆ្នាំ មុខរបរកសិករ មានទីលំនៅបច្ចុប្បន្នភូមិព្រែកបង្កង សង្កាត់ព្រែកតាកូវ ក្រុងអរិយក្សត្រ ខេត្ដកណ្ដាល។ (ឃាត់ខ្លួន)
*ទី៤៖ ឈ្មោះ យឹម សំនៀង អាយុ៣៣ឆ្នាំ មុខរបរកសិករ មានទីលំនៅបច្ចុប្បន្នភូមិអរិយក្សត្រ សង្កាត់អរិយក្សត្រ ក្រុងអរិយក្សត្រ ខេត្ដកណ្ដាល។ (ឃាត់ខ្លួន)
*ទី៥៖ ឈ្មោះ វណ្ណី ដារ៉ា អាយុ១៨ឆ្នាំ មុខរបរកម្មករសំណង់ មានទីលំនៅបច្ចុប្បន្នភូមិព្រែកល្វា សង្កាត់ព្រែកតាកូវ ក្រុងអរិយក្សត្រ ខេត្ដកណ្ដាល។ (ឃាត់ខ្លួន)

វត្ថុតាងដែលចាប់យក រួមមាន៖

១.ទូរសព្ទដៃ០១គ្រឿង ម៉ាក OPPO ពណ៌ខ្មៅ (របស់ឈ្មោះ ញ៉េប ស្រួន)
២.ទូរសព្ទដៃ០១គ្រឿង ម៉ាក TECHNO ពណ៌ទឹកប៊ិក (របស់ឈ្មោះ យឹម សំនាង)
៣.ទូរសព្ទដៃ០១គ្រឿង ម៉ាក OPPO ពណ៌ខ្មៅ (របស់ឈ្មោះ សយ សារឿន)។

បច្ចុប្បន្នជនសង្ស័យ និងវត្ថុតាង បាននាំមកកាន់អធិការដ្ឋាននគរបាលក្រុងអរិយក្សត្រ ដើម្បីបន្តនីតិវីធី។ ចំណែកជនសង្ស័យឈ្មោះ សុខ ស៊ីថា ដែលគេចខ្លួន សមត្ថកិច្ចជំនាញពាក់ព័ន្ធកំពុងស្វែងរកទៅតាមនីតិវិធីជំនាញ៕