ជំនួបជាមួយគណៈប្រតិភូក្រុមហ៊ុន Cambrew! រដ្ឋមន្ត្រី នេត្រ ភក្ត្រា ថ្លែងអំណរគុណចំពោះការវិនិយោគនៅកម្ពុជាបង្កើតឱកាសការងារដល់យុវជន និងកោតសរសើរចំពោញក្រុមហ៊ុនចូលរួមគោរពច្បាប់ និងការប្រកួតប្រជែងដោយស្មោះត្រង់
24-11-2025 18:14
(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន នៅរសៀលថ្ងៃទី២៤ ខែវិច្ឆិកា ឆ្នាំ២០២៥នេះ បានអនុញ្ញាតឱ្យលោក Mr. Michiel Oerlemans នាយកប្រតិបត្តិថ្មីនៃក្រុមហ៊ុន Cambrew (Carlsberg Cambodia) និងសហការី ចូលជួបសម្តែងការគួរ ដើម្បីពិភាក្សាអំពីបរិយាកាសនៃការធ្វើអាជីវកម្ម និងការផ្សព្វផ្សាយពាណីជ្ជកម្មផលិតផលភេសជ្ជៈ និងស្រាបៀរនៅក្នុងទីផ្សារព្រះរាជាណាចក្រកម្ពុជា។
តាមរយៈជំនួបជាមួយលោករដ្ឋមន្ត្រីក្រសួងព័ត៌មាន, លោក Michiel Oerlemans បានបញ្ជាក់ពីការប្តេជ្ញាចិត្តចូលរួមចំណែក និងតាំងចិត្តខ្ពស់ចូលរួមការវិនិយោគនៅប្រទេសកម្ពុជា ដើម្បីអភិវឌ្ឍសេដ្ឋកិច្ចប្រទេសកម្ពុជា ជាពិសេសបង្កើតឱកាសការងារជូនដល់យុវជនកម្ពុជា។
ក្នុងជំនួបនោះ តំណាងសម្ព័ន្ធក្រុមហ៊ុន Carlsberg Group បានជម្រាបអំពីសាវតានៃការឈានជើងចូលទីផ្សារកម្ពុជា, បច្ចុប្បន្នភាពនៃប្រតិបត្តិការអាជីវកម្ម, ខ្សែសង្វាក់ផលិតកម្មភេសជ្ជៈរបស់ក្រុមហ៊ុន និងការចែកចាយលក់នៅក្នុងទីផ្សារ, ពិសេសគឺការធ្វើទំនើបកម្ម និងផែនការកំណែទម្រង់នានា ដើម្បីលើកកម្ពស់គុណភាព និងប្រជាប្រិយភាពផលិតផលរបស់ខ្លួនក្នុងទីផ្សារដែលកំពុងមានការប្រកួតប្រជែង ក៏ដូចជាស្នើសុំការចែករំលែកទស្សនៈ និងអនុសាសន៍ពីសំណាក់ ឯកឧត្តមរដ្ឋរដ្ឋមន្ត្រី ផងដែរ។
ជាមួយគ្នានេះដែរ លោកក៏បានវាយតម្លៃខ្ពស់ចំពោះប្រទេសកម្ពុជា ដែលមានការរីកចម្រើនជាលំដាប់ទាំងផ្នែកសេដ្ឋកិច្ច ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា និងបន្តវេនដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនីតិកាលទី៧ នៃរដ្ឋសភា លើការងារអភិវឌ្ឍន៍ប្រទេសកម្ពុជា។ លោកក៏បានមើលឃើញពីសក្តានុពលរបស់ប្រទេសកម្ពុជា ដែលបានបោះជំហានយ៉ាងស្វាហាប់ រហ័សរហួន លើការងារអភិវឌ្ឍន៍ប្រទេស ជាពិសេសមានប្រជាជនវ័យក្មេងដែលពោលពេញដោយសមត្ថភាព ដែលជាកម្លាំងចលករមួយដ៏រឹងមាំ ឆ្លើយតបនឹងតម្រូវការជាក់ស្តែងរបស់វិស័យឯកជន ដែលមកបណ្តាក់ទុនវិនិយោគនៅកម្ពុជា។
ពាក់ព័ន្ធនឹងការផ្សព្វផ្សាយពាណិជ្ជកម្មគ្រឿងស្រវឹង, លោក Michiel Oerlemans បានប្តេជ្ញាចិត្តគោរពតាមគោលការណ៍ និងតាមច្បាប់ផ្សេងៗរបស់ប្រទេសកម្ពុជា ដើម្បីធ្វើយ៉ាងណាអនុវត្តឱ្យបានត្រឹមត្រូវ និងភាពស្មោះត្រង់នៃការប្រកួតប្រជែងដោយស្មើភាព ជុំវិញការផ្សព្វផ្សាយពាណិជ្ជកម្មផ្សាយគ្រឿងស្រវឹង។
ជាឆ្លើយតប លោករដ្ឋមន្ត្រី នេត្រ ភក្ត្រា បានថ្លែងអំណរគុណដល់ក្រុមហ៊ុនដែលបានបោះទុនមកវិនិយោគនៅក្នុងប្រទេសកម្ពុជា បង្កើតឱកាសការងារថ្មីៗដល់ប្រជាជនកម្ពុជា។ រដ្ឋមន្ត្រី ក៏បានស្នើឱ្យក្រុមហ៊ុនគោរពឱ្យបានត្រឹមត្រូវនូវគោលការណ៍ណែនាំ និងច្បាប់បទដ្ឋានគតិយុត្តនានារបស់កម្ពុជា ជាពិសេសត្រូវចូលរួមពង្រឹងការផ្សព្វផ្សាយពាណិជ្ជកម្មផលិតផលរបស់ខ្លួនប្រកបដោយការទទួលខុសត្រូវ មានសណ្តាប់ធ្នាប់ និងចូលរួមប្រកួតប្រជែងដោយស្មោះត្រង់ មានសុច្ចរិតភាព ជាមួយបណ្តាក្រុមហ៊ុនវិនិយោគផ្សេងទៀតជាដើម។
លោករដ្ឋមន្ត្រី នេត្រ ភក្ត្រា ក៏បានបញ្ជាក់ពីការខិតខំរួមគ្នា ដើម្បីឱ្យការងារផ្សព្វផ្សាយផលិតផលនានានៅលើទឹកដីកម្ពុជា គោរពតាមគោលការណ៍ច្បាប់ ដោយឈរលើស្មារតីស្មើភាពគ្នា នៃការប្រកួតប្រជែងជាដើម និងរំពឹងថា ក្រុមហ៊ុននឹងទទួលបានការគាំទ្រថែមមួយកម្រិតទៀត។តាមរយៈប្រកាសស្ដីពីការកំណត់អំពីបែបបទ នីតិវិធី និងវិធានក្នុងការគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹងរបស់ក្រសួងព័ត៌មាន បានឱ្យដឹងថា ការផ្សាយពាណិជ្ជកម្មផលិតផលគ្រឿងស្រវឹងត្រូវគោរពទៅតាមគោលការណ៍ដែលកំណត់ដោយក្រសួងព័ត៌មាន។ គោលការណ៍ដែលត្រូវបានកំណត់ក្នុងប្រកាសទាំងនោះរួមមាន មិនអនុញ្ញាតផ្សាយពាណិជ្ជកម្ម ឃោសនា និងការផ្សព្វផ្សាយលក់គ្រឿងស្រវឹងដោយយកទស្សនិកជនឱ្យទទួលទានគ្រឿងស្រវឹង នៅលើឆាកកម្មវិធីនានា។ មិនអនុញ្ញាតឱ្យផ្សាយគ្រឿងស្រវឹងផ្ដោតលើគោលដៅអនីតិជន និង/ឬយកអនីតិជនមកផ្សាយ។ មិនអនុញ្ញាតឱ្យផ្សាយលក់គ្រឿងស្រវឹងនៅចន្លោះម៉ោង១៨ ដល់ម៉ោង២០ តាមស្ថានីយទូរទស្សន៍ ឬវិទ្យុគ្រប់ប្រភេទ លើកលែងតែការផ្សាយដោយបង្ហាញតែរូបសញ្ញា ឬឈ្មោះផលិតផលគ្រឿងស្រវឹង។
ប្រកាសដដែលបន្ថែមថា ពាណិជ្ជកម្មផ្សាយគ្រឿងស្រវឹងត្រូវមានចម្ងាយមិនតិចជាង២០០ម៉ែត្រ ជាពិសេសនៅជុំវិញបរិវេណទីតាំងមួយចំនួនដូចជា គ្រឹះស្ថានសិក្សា គ្រឹះស្ថានសុខាភិបាល គ្រឹះស្ថានសាសនា រមណីយដ្ឋានវប្បធម៌ប្រវត្តិសាស្រ្ត និងអាកាសយានដ្ឋានអន្តរជាតិ។ ការបង្ហាញពីការទទួលទានគ្រឿងស្រវឹង ជាលក្ខខណ្ឌតម្រូវឱ្យសង្គមទទួលស្គាល់ ឬសម្រាប់ជោគជ័យក្នុងសង្គម ឬមោទនភាពជាតិត្រូវបានហាមឃាត់ និងត្រូវគោរពអ្នកមានតំណម រួមមានអ្នកកាន់សាសនា វប្បធម៌ អ្នកមានជំងឺ និងស្រ្តីមានផ្ទៃពោះ៕
