(ព្រៃវែង)៖ លោក ឡុង ភារម្យ តំណាងម្ចាស់ស្ថានីយផ្គត់ផ្គង់ទឹកស្អាត ឡុង រិន ដែលមានទីតាំង ស្ថិតនៅភូមិកន្ទ្រាន ឃុំរោងដំរី ស្រុកបាភ្នំ ខេត្តព្រៃវែង បានឲ្យដឹងថា សព្វថ្ងៃនេះស្ថានីយបានផ្គត់ផ្គងទឹកស្អាត មានចំនួន៥ឃុំ ស្មើនឹង២២ភូមិគ្រួសារ ដែលបានប្រើប្រាស់ទឹកស្អាត មានចំនួន២,៥០០គ្រួសារ។

លោកបានបន្ថែមថា សព្វថ្ងៃនេះ ស្ថានីយ៍ទឹកស្អាតបាភ្នំមានពីរស្ថានីយ ដែលបាននៅកំពុងបម្រើការផ្ដល់ទឹកស្អាត ជូនប្រជាពលរដ្ឋប្រើប្រាស់ នៅក្នុងមូលដ្ឋានភូមិសាស្ត្ររបស់ខ្លួន ធ្វើយ៉ាងណាដើម្បីឲ្យប្រជាពលរដ្ឋ នៅក្នុងឃុំមានទឹកស្អាតប្រើប្រាស់ឲ្យបានគ្រប់ៗគ្នា និងប្រកបដោយអនាម័យខ្ពស់។

ជាមួយគ្នានេះ ម្ចាស់ស្ថានីយ៍ទឹកស្អាត ក៏មានផែនការសកម្មភាពធ្វើយ៉ាងណា ដើម្បីជំរុញដល់ប្រជាពលរដ្ឋទាំងអស់ នៅក្នុងស្រុកបាភ្នំមានទឹកស្អាតប្រើប្រាស់ ឲ្យបានគ្រប់ៗគ្នា ដើម្បីធានាដល់សុខភាព ធានាដល់ការរស់នៅ ក៏ដូចជាចំណេញនៅពេលវេលា ក្នុងការដឹកជញ្ជូនទឹក ពីទីៗកន្លែងមួយយកទៅប្រើប្រាស់ផងដែរ។

ប្រជាពលរដ្ឋដែលប្រើប្រាស់ទឹកស្អាត បានលើកឡើងថា ការប្រើប្រាស់ទឹកស្អាតសព្វថ្ងៃនេះ បានងាយស្រួលជាងមុន គឺពីមុនប្រើប្រាស់ទឹកអណ្ដូង ឬក៏ទឹកទិញពីគេ ដែលយកមកលក់ នៅតាមភូមិដែលអូស ជារទេះដាក់ជាធុង ដើម្បីយកមកលក់ក្នុងការប្រើប្រាស់ គឺចំណាយពេលវេលាយូរ ហើយឥឡូវនេះ បានប្រើប្រាស់ទឹកស្អាត គឺងាយស្រួលចង់ប្រើពេលណាក៏បាន៕