(តាកែវ)៖ អភិបាលខេត្តតាកែវ លោក វ៉ី សំណាង បានជំរុញ និងអំពាវនាវប្រជាពលរដ្ឋ ពិសេសប្អូនៗសិស្សានុសិស្សទាំងអស់ បន្តយកចិត្តទុកដាក់ និងធ្វើជាគំរូមុនគេ ក្នុងការចូលរួមសំអាតអនាម័យបរិស្ថានជុំវិញខ្លួនតាមសាលារៀន និងទីប្រជុំជននានា ផ្ដើមចេញពីទុកដាក់សំរាមទៅក្នុងធុងសំរាមឲ្យបានត្រឹមត្រូវ ដើម្បីសហគមន៍យើងមានបរិស្ថានស្អាតល្អ។

ថ្លែងក្នុងឱកាសអញ្ជើញអបអរសាទរទិវាអនាម័យបរិស្ថានជាតិ ២៣ វិច្ឆិកា ក្រោមប្រធានបទ «ទម្លាប់ស្អាត គ្រួសារស្អាត បរិស្ថានល្អ» នៅបរិវេណសួនច្បារមាត់បឹងតាកែវ នាព្រឹកថ្ងៃទី២៥ ខែវិច្ឆិកា ឆ្នាំ២០២៥ ដោយមានការអញ្ជើញ ចូលរួមពីថ្នាក់ដឹកនាំក្រសួង បរិស្ថាន កងកម្លាំងទាំង៣ មន្រ្តីរាជការ លោកគ្រូ អ្នកគ្រូ សិស្សានុសិស្ស រួមនិងប្រជាពលរដ្ឋជាង ១.៥០០នាក់។

លោក វ៉ី សំណាង បានថ្លែងថា «ការចូលរួមសំអាតអនាម័យបរិស្ថាន គឺជាភាពចំបាច់ សំដៅរួមចំណែកលើកកម្ពស់សោភ័ណភាពខេត្ត ក៏ដូចជាក្រុងដូនកែវរបស់យើងកាន់តែមានភាពស្រស់ស្អាត ពិសេសទាក់ទាញភ្ញៀវ ទេសចរណ៍ជាតិ អន្តរជាតិមានលេងកម្សាន្តកាន់តែច្រើន បង្កើនសេដ្ឋកិច្ចដល់ប្រជាពលរដ្ឋ និងខេត្តទាំងមូល»។

អភិបាលខេត្តតាកែវ បន្តថា «ផ្ទុយទៅវិញបើសិនជាយើងមិនចូលរួមសំអាតអនាម័យបរិស្ថាន ហើយគិតតែបោះសំរាមចោលពាសវាលពាសកាល តើបរិស្ថានស្អាតនៅត្រង់ណា តើនឹងមានភ្ញៀវទេសចរណ៍ឯណាគេមកលេងបន្តទៀត ស្របពេលអាជ្ញាធរខេត្តបានខិតខំកៀរគរអ្នកវិនិយោគមកកាន់តែច្រើន។ ដូច្នេះក្នុងនាមប្រជាពលរដ្ឋ និងយុវជនគំរូ ត្រូវរួមគ្នាផ្លាស់ប្ដូរទំលាប់ រួមគ្នាគិត រួមគ្នាធ្វើ ស្របតាមពាក្យស្លោកបរិស្ថានស្អាតផ្ដើមចេញពីយើងទាំងអស់គ្នា ដើម្បីចូលរួមធ្វើយ៉ាងណាឲ្យខេត្តរបស់យើងស្អាតល្អស្រស់បំព្រង គ្មានក្លិនស្អុយ ធានាបាននូវខ្យល់បរិសុទ្ធសម្រាប់សុខភាព»។

ក្នុងឱកាសនោះ លោក អ៊ាត សីលា រដ្ឋលេខាធិការក្រសួងបរិស្ថាន បានមានថ្លែងថា សំរាមផ្លាស្ទិចមិនអាចរលាយក្នុងរយៈពេលខ្លីបាននោះទេ ពោលរាប់រយឆ្នាំឯនោះទើបរលាយ ហើយការបោះសំរាមចោលពាសវាពាសកាល វាបានបង្ករផលប៉ះពាល់យ៉ាងខ្លាំងដល់សុខភាពរបស់យើង និងបង្ករជាជម្ងឺឆ្លងផ្សេងៗបាន ដូច្នោះដើម្បីធានាបាននូវខ្យល់បរិសុទ្ធ គ្មានការបំពុលខ្យល់ បរិស្ថានស្អាតល្អ យើងត្រូវទុកដាក់ និងបែងចែកសំណល់រឹង រាវ ឲ្យបានត្រឹមត្រូវទៅក្នុងធុងសំរាមទាំងអស់គ្នា៕