(កោះកុង)៖ មន្ទីរពេទ្យបង្អែកខេត្តកោះកុង បានសហការជាមួយក្រុមគ្រូពេទ្យស្ម័គ្រចិត្តជំនាញ នៃប្រទេសបារាំង បានចុះមកផ្ដល់សេវាពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃចាប់ពីថ្ងៃទី២៤-២៨ ខែវិច្ឆិកា ឆ្នាំ២០២៥ ស្ថិតនៅក្នុងមន្ទីរពេទ្យបង្អែកខេត្តកោះកុង។

លោកវេជ្ជបណ្ឌិត ហៃ ឡៃសុន ប្រធានមន្ទីរពេទ្យបង្អែកខេត្តកោះកុង បានឲ្យដឹងថា លោក និងក្រុមគ្រូពេទ្យនៅក្នុងមន្ទីរពេទ្យបង្អែកខេត្តកោះកុង មានសេចក្តីសោមនស្សរីករាយក្រៃលែង ដែលបានក្រុមគ្រូពេទ្យជំនាញស្ម័គ្រចិត្ត នៃប្រទេសបារាំង មកផ្ដល់សេវាពិនិត្យ និងព្យាបាលជំងឺជូនប្រជាពលរដ្ឋនៅក្នុងខេត្តដោយមិនគិតពីសេវាអ្វីឡើយ។

លោកវេជ្ជបណ្ឌិត បានបញ្ជាក់ថា ក្រុមគ្រូពេទ្យជំនាញស្ម័គ្រចិត្តពីប្រទេសបារាំង បានសហការជាមួយក្រុមគ្រូពេទ្យ នៃមន្ទីរពេទ្យបង្អែកខេត្ត ក្នុងការផ្ដល់សេវាពិនិត្យ និងព្យាបាលជូនប្រជាពលរដ្ឋ មានដូចជា៖ វះកាត់ជំងឺដុំពក ឬដុំគិសនៅក ពិនិត្យត្រចៀកវាស់កម្រិត នៃការស្ដាប់ និងផ្ដល់ឧបករណ៍ជំនួយត្រចៀកដល់អ្នកដែលមានបញ្ហាក្នុងការស្ដាប់។

ប្រជាពលរដ្ឋដែលមកទទួលសេវាពិនិត្យ និងព្យាបាលជំងឺ មានសេចក្តីរីករាយយ៉ាងខ្លាំង និងបានកោតសរសើរមន្ទីរពេទ្យបង្អែកខេត្ត ដែលបានយកចិត្តទុកដាក់ក្នុងការព្យាបាលអ្នកជំងឺប្រជាពលរដ្ឋដោយមិនប្រកាន់វណ្ណៈ អ្នកមាន ឬអ្នកក្រអ្វីឡើយ។

ប្រជាពលរដ្ឋបានកោតសរសើរចំពោះហេដ្ឋារចនាសម្ព័ន្ធនៅក្នុងមន្ទីរពេទ្យបង្អែកខេត្តកោះកុង ដែលបានរៀបចំឡើងដោយមានផាសុខភាពល្អ រួមទាំងកាយវិការរបស់ក្រុមគ្រូពេទ្យ មានក្រមសីលធម៌វិជ្ជាជីវៈគួរឲ្យគោរព៕