(កំពង់ចាម)៖ បណ្ណាល័យកូនខ្មែរខ្នាតតូចនេះ គឺជាគំនិតផ្តួចផ្តើមរបស់យុវសិស្សឈ្មោះ ម៉ៅ សុផាតវីនណា មកពីសាលាអន្តជាតិស៊ីអាយអេ (CIA) ត្រូវបានធ្វើពិធីប្រគល់ជូនដល់សាលាបឋមសិក្សាតាំងក្រសាំង និងអនុវិទ្យាល័យតាំងក្រសាំង នៅរសៀលថ្ងៃទី២៥ ខែវិច្ឆិកាឆ្នាំ២០២៥ ដែលមានការចូលរួមពីលោកគ្រូ អ្នកគ្រូព្រមទាំងសិស្សានុសិស្សជាច្រើនទៀត មានទីតាំងស្ថិតនៅក្នុងភូមិឃុំតាំងក្រសាំង ស្រុកបាធាយ ខេត្តកំពង់ចាម។

បណ្ណាល័យកូនខ្មែរ គឺជាបណ្ណាល័យខ្នាតតូចដែលសិស្សអាចអាន សិក្សា និងមើលសៀវភៅដោយឥតគិតថ្លៃ នៅទូទាំងព្រះរាជាណាចក្រកម្ពុជា។ គំនិតផ្តួចផ្តើមនេះ មានបេសកកម្មស្នូលក្នុងការបង្កើត និងរក្សាបណ្តាញបណ្ណាល័យខ្នាតតូច ដើម្បីចែករំលែកសៀវភៅដោយឥតគិតថ្លៃនៅតាមសហគមន៍ជនបទ និងសាលារៀននៅទូទាំង ២៥ខេត្តរាជធានីនៃព្រះរាជាណាចក្រកម្ពុជា (យោងតាមវិទ្យាស្ថានជាតិស្ថិតិ និងក្រសួងផែនការឆ្នាំ២០២០)។

ចក្ខុវិស័យរបស់យើង គឺជួយពង្រឹង និងលើកកម្ពស់ការធ្វើឱ្យមានលក្ខណៈជាទម្លាប់នៃការអាន កម្សាន្តដល់យុវវ័យគ្រប់ស្រទាប់នៅទូទាំងប្រទេស ជាពិសេសផ្តោតលើសិស្សានុសិស្សដែលខ្វះខាតជាចំបង។

ស្របតាមអាទិភាពយុទ្ធសាស្ត្ររបស់ក្រសួងអប់រំ យុវជន និងកីឡា (MoEYS) សម្រាប់ការលើកកម្ពស់អក្ខរកម្មដំបូង និងពង្រីកការទទួលបានការអប់រំប្រកបដោយគុណភាព។ គម្រោងនេះស្នើឱ្យមានការបង្កើតបណ្តាញបណ្ណាល័យខ្នាតតូចចែករំលែកសៀវភៅថ្មីៗ និងសៀវភៅពេញនិយមដែលមានតុល្យភាពទាំងជាភាសាខ្មែរ និងអង់គ្លេស ជាមួយយុទ្ធសាស្ត្រទទួលយកសៀវភៅបរិច្ចាគ ដើម្បីធានាបាននូវការផ្គត់ផ្គង់សម្ភារៈសិក្សា ប្រកបដោយចីរភាព។

ក្នុងពិធីនោះដែរ បណ្ណាល័យកូនខ្មែរដែលដឹកនាំដោយយុវសិស្ស ម៉ៅ សុផាតវីនណា ព្រមទាំងសហការី​បានផ្តល់សៀវភៅសិក្សាស្រាវជ្រាវជាភាសាខ្មែរ និងសៀវភៅភាសាអង់គ្លេសចំនួន ៨៩ក្បាល រួមទាំងសូឡាបំភ្លឹចំនួន ២គ្រឿង ជូនដល់សាលាបឋមសិក្សាតាំងក្រសាំង។

ជាមួយគ្នានេះ សៀវភៅសិក្សាស្រាវជ្រាវភាសាខ្មែរ និងអង់គ្លេសចំនួន ៧៥ក្បាល ថែមទាំងសូឡាបំភ្លឺចំនួន២គ្រឿង ជាមួយថវិកា ៤០ម៉ឺនរៀល បានផ្តល់ជូនសាលាអនុវិទ្យាល័យតាំងក្រសាំង។

ដោយមើលឃើញកង្វះខាតរបស់សិស្ស បណ្ណាល័យកូនខ្មែរក៍បានផ្តល់គ្រឿងឧបភោគបរិភោគ មាន មី អង្ករ សៀវភៅ សំលៀកបំពាក់ ភួយ ព្រមទាំងថវិកា ១០ម៉ឺនរៀលជូនដល់សិស្សទីទាល់ក្រផងដែរ៕