(ពោធិ៍សាត់)៖ លោក ពៅ ពិសិដ្ឋ អភិបាលរងខេត្ត តំណាង លោក ខូយ រីដា អភិបាលខេត្តពោធិ៍សាត់ នាថ្ងៃទី២៦ ខែវិច្ឆិកា ឆ្នាំ២០២៥ បានស្នើដល់មន្ត្រីជំនាញ និងសមត្ថកិច្ចពាក់ព័ន្ធទាំងអស់ ត្រូវពិនិត្យ និងពិភាក្សាឱ្យបានល្អិតល្អន់ និងគ្រប់ជ្រុងជ្រោយ ក្នុងការបន្ធូរបន្ថយទោស និងលើកលែងទោសឱ្យទណ្ឌិត ធ្វើយ៉ាងណាសមស្របទៅនឹងច្បាប់ និងគោលការណ៍ណែនាំនានា សំដៅជ្រើសរើសបានទណ្ឌិតដែលបានស្នើសុំការបន្ធូរបន្ថយទោស និងលើកលែងទោស ជាអ្នកមានការតាំងចិត្តកែប្រែខ្លួន ឱ្យក្លាយជាពលរដ្ឋល្អ ក្នុងសង្គមជាតិពិតប្រាដក អាចរស់នៅប្រកបដោយសេចក្តីសុខជាមួយក្រុមគ្រួសារ ក៏ដូចជាក្នុងសង្គមទាំងមូល។

លោកអភិបាលរងខេត្ត បានស្នើបែបនេះ នៅសាលប្រជុំជាន់ទី១សាលាខេត្ត ក្នុងឱកាសដឹកនាំកិច្ចប្រជុំ ស្តីពីការត្រួតពិនិត្យវាយតម្លៃបញ្ជីឈ្មោះ ទណ្ឌិតស្នើសុំបន្ធូរបន្ថយទោស ក្នុងឱកាសទិវាជ័យជម្នះលើរបបប្រល័យពូជសាសន៍ ឆ្នាំ២០២៦ ដោយបានការចូលរួមពីលោកនាយករងរដ្ឋបាលសាលាខេត្ត, តំណាងអយ្យការអមសាលាដំបូងខេត្ត, លោកឧត្តមអគ្គានុរក្ស.២ ប្រធានពន្ធនាគារខេត្ត និងមន្ត្រីពាក់ព័ន្ធមួយចំនួនទៀត។

លោក ពៅ ពិសិដ្ឋ បានថ្លែងថា ទណ្ឌិតទាំងឡាយដែលអាចស្នើសុំការបន្ធូរបន្ថយទោស និងលើកលែងទោស ត្រូវមានលក្ខណៈសម្បត្តិគ្រប់គ្រាន់ តាមលក្ខខណ្ឌកំណត់ដោយច្បាប់ សម្រាប់ទោសដែលមិនមែនជាកម្មវត្ថុក្នុងការលើកលែងទោស បន្ធូរបន្ថយទោស ឬពិបាកក្នុងការលើកលែងទោស និងបន្ថយទោសនោះ គឺមានដូចជាទោស ចាប់ជំរិតទារប្រាក់ ប្លន់សម្លាប់ រំលោភសម្លាប់ ឃាតកម្មសាហាវឃោរឃៅ ទោសផលិត និងជួញដូរគ្រឿងញៀន ភេរវកម្ម ជនប្រដាប់អាវុធ ទណ្ឌិតទទួលទោសច្រើនដង ទណ្ឌិតដែលជាប់ពន្ធនាគារច្រើនដង និងទណ្ឌិតធ្លាប់ល្មើសជាប់ពិន័យជាដើម។

លោកអភិបាលរងខេត្ត បានសន្និដ្ឋានជារួមថា កម្រិតកែប្រែរបស់ទណ្ឌិត ទាំង៣០នាក់ គឺសុទ្ធសឹងមិនមែនទោស បទឧក្រឹដ្ឋ ហើយមិនពាក់ព័ន្ធច្រើន ឬធ្ងន់ធ្ងរ ទៅលើការរក្សាទុក និងការប្រើប្រាស់គ្រឿងញៀន។ មួយវិញទៀតដោយសារតែទីកន្លែងឃុំខ្លួនទណ្ឌិត មានសភាពចង្អៀតណែនតាន់តាប់ ដែលគិតជាភាគរយប្រមាណ៦0% ទើបគណៈកម្មការខេត្ត បានឯកភាពឱ្យបន្ថយទោស និងបន្តដាក់ការស្នើសុំបន្ធូរបន្ថយទោស និងលើកលែងទោស ទៅថ្នាក់ជាតិសម្រេច។

គួរជម្រាបជូនថា ព្រះរាជាណាចក្រកម្ពុជា បានកំណត់យកពិធីបុណ្យចំនួន០៥ សម្រាប់ស្នើសុំបន្ធូរបន្ថយទោស និងលើកលែងទោសឱ្យទណ្ឌិត ក្នុងនោះមាន៖
ទី១៖ ទិវាជ័យជម្នះលើរបបប្រល័យពូជសាសន៍ (៧ មករា)
ទី២៖ ពិធីបុណ្យចូលឆ្នាំថ្មីប្រពៃណីជាតិខ្មែរ
ទី៣៖ ពិធីបុណ្យវិសាខបូជា
ទី៤៖ ពិធីបុណ្យឯករាជ្យជាតិ (៩ វិច្ឆិកា)
ទី៥៖ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។

សម្រាប់ទិវាជ័យជម្នះលើរបបប្រល័យពូជសាសន៍ ៧ មករា ២០២៦ខាងមុខនេះដែរ អង្គភាពពន្ធនាគារខេត្តពោធិ៍សាត់ បានជ្រើសរើសយកទណ្ឌិត ចំនួន៣០នាក់ ស្រី០៤នាក់ មកដាក់ជូនគណៈកម្មការត្រួតពិនិត្យ និងវាយតម្លៃកម្រិតកែប្រែរបស់ទណ្ឌិត ដើម្បីដោះលែង និងបន្ធូបន្ថយទោស ក្នុងនោះមានទណ្ឌិតដែលត្រូវបានបន្ថយទោស ចំនួន០៣ខែ មានចំនួន២៣នាក់ ស្រី០៤នាក់, ទណ្ឌិតដែលត្រូវបានបន្ថយទោសចំនួន០៦ខែ មានចំនួន០៦នាក់ និងទណ្ឌិតដែលត្រូវបានបន្ថយទោស ចំនួន០៩ខែ មានចំនួន០១នាក់ ដែលត្រូវបានឯកភាពឱ្យបន្ថយទោសផងដែរ៕