(កំពង់ធំ)៖ លោក ជឹម រីណា អធិការនគរបាលស្រុកស្ទោង ខេត្តកំពង់ធំ នៅព្រឹកថ្ងៃទី២៨ ខែវិច្ឆិកា ឆ្នាំ២០២៥ បានដឹកនាំកម្លាំងមន្ត្រីបានចុះពិនិត្យកន្លែងមួយចំនួន នៅក្នុងស្រុក ដែលជាទីកន្លែងសិស្សានុសិស្សប្រមូលផ្ដុំ លេងហ្គេមតាមទូរស័ព្ទដៃ និងមានមួយចំនួនជក់បារី។

ការចុះពិនិត្យលើកនេះ មានគោលបំណងស្វែងយល់ពីស្ថានភាពពិតប្រាកដ និងបង្កើនការយកចិត្តទុកដាក់ចំពោះកុមារ យុវជន ដែលកំពុងក្លាយជាក្ដីព្រួយបារម្ភរបស់អាណាព្យាបាលគ្រប់រូប។ ការប្រមូលផ្តុំលេងហ្គេមជាញឹកញាប់ ការចំណាយពេលវេលាច្រើននៅក្រៅសាលារៀន និងការជក់បារី អាចប៉ះពាល់យ៉ាងធ្ងន់ធ្ងរ ដល់វិន័យសិក្សា សុខភាព និងអនាគតកុមារទាំងនោះ ព្រមទាំងជះឥទ្ធិពលអាក្រក់ដល់សង្គមជាតិទាំងមូល។

ក្នុងឱកាសនេះ អធិការនគរបាលស្រុកស្ទោង និងកម្លាំងមន្ត្រី បានផ្តល់អនុសាសន៍ដល់សិស្សានុសិស្ស ឲ្យប្រុងប្រយ័ត្នក្នុងការប្រើប្រាស់ទូរស័ព្ទដៃ និងមិនលេងហ្គេមលើសកម្រិត បញ្ជាក់ឲ្យយកចិត្តទុកដាក់លើការសិក្សា ជាបន្ទុកសំខាន់បំផុតសម្រាប់អនាគត។ លោកក៏បានរំលឹកអំពីគ្រោះថ្នាក់ នៃការជក់បារី និងការរួមបញ្ចូលក្នុងសកម្មភាពមិនសមស្របផ្សេងៗទៀត។

សម្រាប់ម្ចាស់ទីតាំងអាជីវកម្ម និងកន្លែងកម្សាន្តជាទីកន្លែងសិស្សប្រមូលផ្ដុំ លោកអធិការនគរបាល បានអំពាវនាវឲ្យ «គិតអំពីប្រយោជន៍រួម និងទំនួលខុសត្រូវចំពោះសង្គម» ដោយមិនគួរអនុញ្ញាតឲ្យ កុមារ–យុវជន មកស្នាក់សំរាកលេងហ្គេមឆ្លងកំឡុងម៉ោងរៀន ឬប្រើប្រាស់កន្លែងជារបរជក់បារី និងអាកប្បកិរិយាមិនសមស្របផ្សេងៗឡើយ ព្រោះវាអាចបង្កឲ្យមានបញ្ហាសុវត្ថិភាព និងសណ្តាប់ធ្នាប់សាធារណៈ។

អធិការនគរបាលស្រុកស្ទោង បន្តប្ដេជ្ញាធ្វើការល្បាតត្រួតពិនិត្យជាប្រចាំ និងសហការជិតស្និទ្ធជាមួយអាណាព្យាបាល សាលារៀន និងសហគមន៍ ដើម្បីការពារ និងលើកកម្ពស់គុណភាពជីវិតកុមារ យុវជន ក្លាយជា កម្លាំងមនុស្សធនធានមានតម្លៃសម្រាប់អនាគតប្រទេសជាតិ៕