(កោះកុង)៖ រដ្ឋបាលខេត្តកោះកុងនៅថ្ងៃទី២៧ ខែវិច្ឆិកា ឆ្នាំ៣០២៥ បានសហការជាមួយក្រុមហ៊ុន ខូសថលស៊ីធី ឌីវេឡុបមិនគ្រុប និងក្រសួងទេសចរណ៍ បានរៀបចំការប្រកួតកីឡាម៉ូតូទឹកដ៏អស្ចារ្យនៅឆ្នេរសមុទ្រ ដ៏ស្រស់ស្អាតខៀវស្រងាត់ ស្ថិតនៅក្នុងស្រុកគិរីសាគរ ខេត្តកោះកុង។

លោក ជា តិចហុក នាយកផ្នែកទំនាក់ទំនងសាធារណៈក្រុមហ៊ុន ខូសថលស៊ីធី បានឱ្យដឹងថា វិស័យកីឡាម៉ូតូទឹកនៅកម្ពុជា ក្នុងរយៈពេលប៉ុន្មានឆ្នាំចុងក្រោយនេះ មានការរីកចម្រើនគួរឱ្យកត់សម្គាល់ ដោយផ្ដើមចេញពីសកម្មភាពកម្សាន្តលំហែរតាមឆ្នេរ។

លោកថា ពេលនេះកីឡាមួយប្រភេទនេះបានវិវត្តខ្លួនក្លាយជាកីឡាដែលមានស្តង់ដារ រួមបញ្ចូលទាំងភាពសប្បាយរីករាយ និងបច្ចេកទេសកម្រិតខ្ពស់ស្ថិតនៅទីតាំងតារាសាគរ នៃខេត្តកោះកុង វេទិកាដ៏ស័ក្តិសមបំផុតសម្រាប់ការ ប្រកួតកីឡានេះ ដោយសារយើងមានឆ្នេរសមុទ្រដ៏ស្រស់ស្អាត និងផ្ទៃទឹកសមុទ្រខៀវស្រងាត់ដែលនឹងអំណោយផលដល់កីឡាលើទឹកគ្រប់ប្រភេទ។

លោក ជា តិចហុក បានបន្ថែមថា ការរៀបចំការប្រកួតនៅថ្ងៃនេះ មិនត្រឹមតែធ្វើឡើងដើម្បី ចូលរួមចំណែកលើកស្ទួយវិស័យកីឡាម៉ូតូទឹកកម្ពុជា ឱ្យកាន់តែមានភាពសកម្ម និងរឹងមាំ ដើម្បីបង្កើនសមត្ថភាពក្នុងការប្រកួតប្រជែង ជាមួយបណ្តាប្រទេសក្នុងតំបន់ ឬក៏អាចឈានប្រកួតជាមួយកីឡាក្នុងលំដាប់ពិភពលោក។ ប៉ុន្តែវាក៏ជាផ្នែកមួយនៃយុទ្ធនាការជំរុញ និងផ្សព្វផ្សាយសក្តានុពលទេសចរណ៍ ក្នុងខេត្តកោះកុង ជាពិសេសតំបន់តារាសាគរ ដែលសម្បូរទៅដោយឆ្នេរសមុទ្រដ៏ស្រស់ស្អាតនេះ ឱ្យកាន់តែល្បីល្បាញផងដែរ។

នាយកផ្នែកទំនាក់ទំនងសាធារណៈក្រុមហ៊ុន ខូសថលស៊ីធី មានក្តីសង្ឃឹមយ៉ាងមុតមាំថា ព្រឹត្តិការណ៍នេះនឹងក្លាយជាកម្លាំងចលករថ្មីមួយ ក្នុងការទាក់ទាញភ្ញៀវទេសចរជាតិ និងអន្តរជាតិឱ្យមកកម្សាន្តនៅតារាសាគរ កាន់តែកំណើនខ្ពស់ផ្នែកវិស័យទេសចរណ៏ និងរួមគ្នាអភិវឌ្ឍន៍ប្រែក្លាយតំបន់នេះឱ្យទៅជាគោលដៅទេសចរណ៍កីឡាដ៏ទាក់ទាញបំផុតមួយនៅកម្ពុជា។

គួរជម្រាបថា ក្រុមហ៊ុន ខូសថលស៊ីធី ឌីវេឡុបមិនគ្រុប បាននិងកំពុងអភិវឌ្ឍហេដ្ឋារចនាសម្ព័ន្ធជាច្រើនក្នុងតំបន់តារាសាគរ រួមមាន៖ ផ្លូវគោក ផ្លូវទឹក ប្រព័ន្ធទំនាក់ទំនង អាកាសយានដ្ឋានអន្តរជាតិខ្នាត 4F (តារាសាគរ) សួនកម្សាន្តលំដាប់ពិភពលោក Dareena Park និងគម្រោងកំពង់ផែទឹកជ្រៅ ដែលគម្រោងទាំងនេះកំពុងទាក់ទាញដៃគូវិនិយោគជាតិ និងអន្តរជាតិជាច្រើន។

សមិទ្ធផលខាងលើ មិនត្រឹមតែបម្រើឱ្យវិស័យទេសចរណ៍ប៉ុណ្ណោះទេ តែក៏បានបង្កើតឱកាសការងារ និងលើកកម្ពស់ជីវភាពប្រជាជនក្នុងតំបន់ តាមរយៈការបណ្តុះបណ្តាលធនធានមនុស្ស និងព្រមទាំងចូលរួមជួយពង្រឹងដល់ សុខសុវត្ថិភាពទេសចរណ៍ប្រចាំតំបន់នេះផងដែរ៕