(ភ្នំពេញ)៖ លោក ពុំ សុថា ប្រតិភូរាជរដ្ឋាភិបាក ទទួលបន្ទុកជាប្រធានរដ្ឋបាលជលផល នៅថ្ងៃទី២៩ ខែវិច្ឆិកា ឆ្នាំ២០២៥ បានប្រាប់បណ្ដាញព័ត៌មាន Fresh News ថា រយៈពេល១០ខែក្នុងឆ្នាំនេះ រដ្ឋបាលជលផល បានបង្ក្រាបបទល្មើសនេសាទសរុប ២,៦១៣ករណី រួមមានរុះរើនិងបំផ្លាញចោលឧបករណ៍នេសាទខុសច្បាប់ ចំនួន ២,៣៦៦ករណី, បញ្ជូនទៅតុលាការ ចំនួន ១៥៤ករណី ពិន័យអន្តរការណ៍ចំនួន៩៣ករណីផងដែរ។

លោក បានបន្តថា ក្នុងនោះវត្ថុតាងខុសច្បាប់ដែលរឹបអូស រួមមាន របាំងស្បៃមុងនិងសាច់អួន ប្រវែង១១២,៧៨៥ម៉ែត្រ, បង្គោលឬចម្រឹងចំនួន ៧៣,២៦៨ដើម, លូស្បៃមុងនិងសាច់អួនចំនួន ២,០៥៧មាត់, សម្រាស់ឬមធ្យោបាយធ្វើឱ្យត្រីឬវារីសត្វកុំទំហំ ២០៧ម៉ែត្រក្រឡា, ប្រើសាច់អួនក្រុងចាប់ត្រីរួមផ្សំភ្លើង (ឈ្លក់ភ្លើង) ចំនួន ៨មាត់, មងរាយនិងមងបណ្តែតនេសាទក្នុងកន្លែងអភិរក្សជលផលប្រវែង ១,៩៤៥ម៉ែត្រ, លបកែច្នៃឫលបកន្ទុយ កណ្តុរចំនួន ៣៨៦គ្រឿង, ឧបករណ៍ឆក់ត្រីចំនួន ៧គ្រឿង និងលែងត្រីចម្រុះចូលក្នុងបឹងធម្មជាតិវិញទម្ងន់ ៤,០២៥ គីឡូក្រាម។

យោងតាមប្រសាសន៍របស់ប្រធានរដ្ឋជលផល, បើធៀបបទល្មើសនេសាទរវាងឆ្នាំ២០២៤ និងក្នុងឆ្នាំ២០២៥នេះ ចំនួនបទល្មើសមានការថយចុះយ៉ាងច្រើន។ លទ្ធផលនៃការថយចុះនេះដោយមានការខិតខំទប់ស្កាត់និងបង្ក្រាបបទល្មើសជលផល ពីសមត្ថកិច្ចជំនាញ កងកម្លាំងប្រដាប់អាវុធ រដ្ឋបាលថ្នាក់ក្រោមជាតិ សមត្ថកិច្ចពាក់ព័ន្ធ និងសហគមន៍នេសាទ ព្រមទាំងមានការចូលរួមផ្តល់ ព័ត៌មានពីមហាជនផងដែរ។

ប្រភពដដែល បានបន្តថាឧបករណ៍នេសាទដែលមានលក្ខណៈបំផ្លិចបំផ្លាញដែលបានបង្ក្រាប ដូចជា អូនអូសឆក់ ឆក់ក្តៅ ឆក់ត្រជាក់ របាំងស្បៃមុង ឈិបយន្ត ជាដើម។

ជាមួយគ្នានេះ លោក បានគូសបញ្ជាក់ថា ជនខិលខូចមួយចំនួននៅតែបន្តលួចធ្វើនេសាទដោយប្រើឧបករណ៍នេសាទខុសច្បាប់ ដូចជា ឧបករណ៍ ឆក់ត្រី ឧបករណ៍ស្បៃមុង និងលួចធ្វើនេសាទក្នុងកន្លែងអភិរក្សជលផលជាដើម បញ្ហាទាំងនេះមិនបានរាំងស្ទះក្នុងការ បង្ក្រាបបទល្មើសនេសាទទេ។

ដោយមានការពង្រឹងការគ្រប់គ្រង ការការពារ និងអភិរក្សធនធានជលផលប្រកបដោយប្រសិទ្ធភាព បានធ្វើឱ្យប្រជាផលនេសាទទឹកសារកើនឡើងគួរកត់សម្គាល់ក្នុងរយៈពេល២ឆ្នាំចុងក្រោយនេះ ប្រមាណ២០% ដែលនាំឱ្យមហាជនមានការអបអរសាទរនិងសប្បាយរីករាយ ចំពោះផលនេសាទដែលកើនឡើងយ៉ាងច្រើននេះ នេសាទបង់សំណាញ់ ដាក់មង និងក្នុងដងត្រី ទទួលបានផលត្រីច្រើនហួសពីការប្រមាណ។

ជាងនេះទៀត ប្រភេទត្រី កម្រមួយចំនួន ដូចជាត្រីគល់រាំង ត្រីរាជ ត្រីត្រសក់ ត្រីក្អក មានវត្តមានឡើងវិញគួរឱ្យកត់សម្គាល់។ ចំពោះការខិតខំនេះ សត្វផ្សោតទន្លេមេគង្គក៏មានការកើនឡើងរហូតដល់១១១ក្បាល ពិសេសជាងនេះ ទៀតនោះក្នុងឆ្នាំ២០២៥នេះ កូនផ្សោតកើតបាន៧ក្បាល និងមិនមានផ្សោតស្លាប់ ដែលនេះជាប្រវត្តិសាស្ត្រនៃការ ការពារនិងការអភិរក្សសត្វផ្សោតទន្លេមេគង្គ ដោយពុំមានសត្វផ្សោតស្លាប់ក្នុងរយៈពេល១ឆ្នាំពេញ។

ដើម្បីរក្សាធនធានជលផលក្នុងស្រុករួចផុតពីការបំផ្លិចបំផ្លាញបន្តទៀត រដ្ឋបាលជលផលបន្តអនុវត្តច្បាប់ ដោយម៉ឺងម៉ាត់ ដោយសហការជាមួយកងកម្លាំងប្រដាប់អាវុធ រដ្ឋបាលថ្នាក់ក្រោមជាតិ សមត្ថកិច្ចពាក់ព័ន្ធ និងសហគមន៍ នេសាទ និងលើកទឹកចិត្តឱ្យមានការផ្តល់ព័ត៌មានពីមហាជន ពិសេសប្រជានេសាទ ការពារកន្លែងអភិរក្សផលផល លែង ត្រីកម្រក៏ដូចជាត្រីមេពូជចូលក្នុងធម្មជាតិ។

ទន្ទឹមនេះ រដ្ឋបាលជលផលបន្តផ្សព្វផ្សាយ អប់រំណែនាំដល់ប្រជានេសាទ ឱ្យយល់ដឹងពីសារសំខាន់នៃធនធានជលផលឱ្យបានខ្លាំងក្លាថែមទៀត៕