(ភ្នំពេញ)៖ លោក ពុត សាមិត្ដ អនុរដ្ឋលេខាធិការ នៃក្រសួងអប់រំ យុវជន និងកីឡា នៅថ្ងៃទី០១​ ខែធ្នូ ឆ្នាំ២០២៥នេះ បានលើកឡើងថា រយៈពេល៦ឆ្នាំដំបូងនៃជីវិត គឺជារយៈពេលដែលកុមារតូច ឆ្លងកាត់ការអភិវឌ្ឍន៍ប្រព័ន្ធប្រសាទយ៉ាងឆាប់រហ័ស ដែលផ្តល់នូវសមត្ថភាពជាមូលដ្ឋានរបស់កុមារ។

ការលើកឡើងបែបនេះ ធ្វើឡើងក្នុងឱកាសដែល លោក ពុត សាមិត្ដ អញ្ជើញជាអធិបតីភាព ក្នុងពិធីបើកវគ្គបណ្ដុះបណ្ដាល ស្ដីពី ការអប់រំបរិស្ថានសម្រាប់សាលាមត្ដេយ្យសិក្សា នៅសាលាមធ្យមសិក្សា គរុកោសល្យមត្ដេយ្យមជ្ឈឹម រាជធានីភ្នំពេញ នាព្រឹកថ្ងៃទី០១ ខែធ្នូ ឆ្នាំ២០២៥។

លោក ពុត សាមិត្ដ បានបញ្ជាក់យ៉ាងដូច្នេះថា «តាមការស្រាវជ្រាវ បានបង្ហាញថា រយៈពេល៦ឆ្នាំដំបូងនៃជីវិត គឺជារយៈពេលដែលកុមារតូចឆ្លងកាត់ ការអភិវឌ្ឍន៍ប្រព័ន្ធប្រសាទ យ៉ាងឆាប់រហ័ស ដែលផ្តល់នូវសមត្ថភាពជាមូលដ្ឋានរបស់កុមារ ទាំងនេះគឺជាធាតុផ្សំដ៏សំខាន់ចាំបាច់ ដើម្បីកសាងមូលដ្ឋានគ្រឹះដ៏រឹងមាំ សម្រាប់ការរៀនសូត្រពេញមួយជីវិតរបស់កុមារ»។

លោក ពុត សាមិត្ដ បានលើកឡើងថា បណ្ដុំនៃសរសៃប្រសាទរបស់កុមារតូច ក្នុងដំណាក់កាលនេះ មានភាពរីកចម្រើនលូតលាស់ តាមរយៈការបង្កើនការអន្តរាគមន៍ដូចជា៖ ការអប់រំ ការការពារ ការផ្តល់ការថែសុខភាព និងអាហាររូបត្ថម្ភ និងការភ្ញោច ដែលរីកចម្រើនតាំងពីចាប់បដិសន្ធិក្នុងផ្ទៃមាតាមកម្លេះ។

ទន្ទឹមគ្នានេះ លោក ពុត សាមិត្ដ ក៏​បានឲ្យដឹងផងដែរថា ការលើកកម្ពស់ ការអភិវឌ្ឍសមត្ថភាពចិត្តសង្គម ក្នុងជីវភាពរស់នៅប្រចាំថ្ងៃ គឺជាកត្តាដ៏សំខាន់ណាស់ សម្រាប់វ័យដំបូងរបស់កុមារ ដែលពួកគេអាចទទួលការបណ្តុះនូវឥរិយាបទមួយ ដែលមានលក្ខណៈសម្របសម្រួល សម្រាប់ការរស់នៅក្នុងសង្គមទៅថ្ងៃអនាគត។

លោក ពុត សាមិត្ដ បានគូសបញ្ជាក់ថា ការលើកកម្ពស់សិទ្ធិរស់រានមានជីវិត ដ៏មានតម្លៃរបស់កុមារ កម្ពុជាបានសហការជាមួយបណ្តាប្រទេសនានាលើពិភពលោក ក្នុងការដោះស្រាយបញ្ហាប្រឈម ពាក់ព័ន្ធនឹងបរិស្ថានផងដែរ។

ដើម្បីសម្រេច បានគោលបំណងនេះ ការស្វែងយល់អំពីសារៈសំខាន់ នៃបរិស្ថានដែលយើង កំពុងរស់នៅគឺជាកត្តាចម្បង ប៉ុន្តែបើគ្មានការអប់រំឱ្យយល់ដឹងពីធម្មជាតិ ផ្សារភ្ជាប់ជាមួយជីវិតរស់នៅរបស់មនុស្ស នឹងបង្កការរំខានដល់ ការអភិវឌ្ឍរបស់កុមារ។ នេះជាការបញ្ជាក់បន្ថែម របស់លោក ពុត សាមិត្ដ។

លោកបានឲ្យដឹងទៀតថា ការអប់រំកុមារតូច ឱ្យចេះថែរក្សា និងស្រឡាញ់សួនច្បារ សាលារៀន និងបរិស្ថាន ធម្មជាតិក្នុងសហគមន៍ កុមារនឹងមានអារម្មណ៍យល់ ពីភាពអស្ចារ្យ នៃធនធានធម្មជាតិក្នុងប្រទេសកម្ពុជា។ កុមារតូចមានការអភិវឌ្ឍតាមលំអានជាគំរូល្អ ពីមនុស្សពេញវ័យក្នុងបរិស្ថាន នៃការរស់នៅរបស់ពួកគេ តាមរយៈជីវភាពរស់នៅប្រចាំថ្ងៃ។

លោក ប្រាក់ កុសល ប្រធាននាយកដ្ឋានអប់រំ កុមារតូច នៃក្រសួងអប់រំ យុវជន និងកីឡា បានថ្លែងថា វគ្គបណ្តុះបណ្តាល ស្ដីពី ការអប់រំបរិស្ថានសម្រាប់សាលាមត្ដេយ្យសិក្សា នាពេលនេះ ធ្វើឡើងក្នុងគោលបំណង ដើម្បីចុះផ្សាយសកម្មភាព វគ្គបណ្តុះបណ្តាលការងារអប់រំបរិស្ថាន នៅមត្តេយ្យសិក្សា។

បើតាមលោក ប្រាក់ កុសល, វគ្គបណ្តុះបណ្តាល ស្ដីពី ការអប់រំបរិស្ថានសម្រាប់សាលាមត្ដេយ្យសិក្សា ដែលធ្វើឡើងរយៈពេល៥ថ្ងៃ គិតចាប់ពីថ្ងៃទី១-៥ ខែធ្នូ ឆ្នាំ២០២៥ នៅសាលាមធ្យមសិក្សា គរុកោសល្យមត្តេយ្យមជ្ឈឹម នាពេលនេះ ពិតជាមានសារៈសំខាន់ណាស់។

វគ្គបណ្ដុះបណ្ដាលនេះ រៀបចំឡើងដោយ នាយកដ្ឋានអប់រំកុមារតូច នៃក្រសួងអប់រំ យុវជន និងកីឡា ក្រោមជំនួយឥតសំណងរបស់ក្រសួងការបរទេសជប៉ុន៕