(រតនគិរី)៖ ស្របពេលដែលរដូវប្រមូលផលជ័រកៅស៊ូ (កៅស៊ូចាន) កំពុងមានហាងឆេងខ្ពស់ នៅទីផ្សារប្រទេសវៀតណាមនោះ ម្ចាស់ចំការកៅស៊ូមួយចំនួនដូចជានៅស្រុកបរកែវ, ស្រុកអូរយ៉ាដាវ, ស្រុកកូនមុំ, ស្រុកអូរជុំ និងស្រុកអណ្តូងមាសជាដើម នៃខេត្តរតនគិរី សប្បាយចិត្តប្រមូលផលលក់ក្រុមឈ្មួញវៀតណាម និងខ្មែរ។

ជាក់ស្តែង នៅតាមឃ្លាំងធំៗមួយចំនួន នៅស្រុកអណ្តូងមាស, ស្រុកបរកែវ, ស្រុកអូរយ៉ាដាវ មានឈ្មួញកណ្តាលប្រមូលទិញស្តុកទុករួចដឹកចេញឆ្ពោះទៅប្រទេសវៀតណាមតាមច្រកទ្វារអន្តរជាតិអូរយ៉ាដាវខេត្តរតនគិរី និងតាមបណ្តាលច្រកទ្វារមួយចំនួនទៀតនៅខេត្តក្រចេះ និងខេត្តត្បូងឃ្មុំ។

បើតាមម្ចាស់ចំការកៅស៊ូមួយចំនួន ប្រាប់ឲ្យដឹងថា ជ័រកៅស៊ូ (ជ័រចានស្អុយ) ឈ្មួញកណ្តាលវៀតណាមទិញក្នុង១គីឡូតម្លៃ៣,២០០ - ៣,៤០០រៀល តាមប្រភេទជ័រ។ រីឯឈ្មួញកណ្តាលហ៊ានទិញក្នុង១គីឡូតម្លៃ ៣,១០០ - ៣,២០០រៀល ពោលគឺទាបជាងក្រុមឈ្មញវៀតណាម ដូច្នេះក្រុមឈ្មួញកណ្តាលខ្មែរអាចបាត់អាជីព។

ពួកគាត់បន្តថា តម្លៃជ័រកៅស៊ូស្អុយ (ជ័រចាន) មានតម្លៃល្អក្នុងឆ្នាំនេះ ដោយសារតែទីផ្សារល្អនៅប្រទេសវៀតណាម ហើយអ្នកត្រូវប៉ាន់ខ្លាំគឺសមត្ថកិច្ចប្រចាំការតាមច្រកទ្វារ ពីព្រោះជ័រកៅស៊ូស្អុយដឹកទៅលក់នៅប្រទេសវៀតណាម មិនជាប់បង់ពន្ធជូនរដ្ឋទេ គ្រាន់តែនៅភូមិភាគឥឦននៃខេត្តរតនគិរី ក្នុង១រដូវទិន្នផលជ័រស្អុយប្រមាណ៧,០០០ - ១០,០០០តោន ដឹកឆ្ពោះទៅវៀតណាម។

ប្រភពព័ត៌មានដោយឡែកទៀត ប្រាប់ឲ្យដឹងថា សូមឲ្យសមត្ថកិច្ចនគរបាលអន្តរប្រវេសន៍ខេត្តរតនគិរី ធ្វើការត្រួតពិនិត្យឈ្មួញកណ្តាលវៀតណាមដើរប្រមូលទិញជ័រមានច្បាប់ត្រឹមត្រូវដែរទេ, ទោះបីក្រុមឈ្មញកណ្តាលវៀតណាមធ្វើទិដ្ឋាការ មានសុពលភាពរយៈពេល១ខែ ជាភ្ញៀវទេសចរ តែមិនអាចធ្វើការនៅកម្ពុជាបានទេ។ លុះត្រាតែបន្តទិដ្ឋាការស្នាក់នៅរយៈពេល១ឆ្នាំ នៅអគ្គនាយកដ្ឋានអន្តោរប្រវេសន៍ ក្រសួងមហាផ្ទៃ និងមានបណ្ណការងារទើបអាចរកស៊ីធ្វើការបាន។

លោក ញឹក លឿត ប្រធានការិយាល័យកៅស៊ូ នៃមន្ទីរកសិកម្មខេត្តរតនគិរី បានថ្លែងប្រាប់ភ្នាក់ងារ Fresh News នៅព្រឹកថ្ងៃទី១ ខែធ្នូ ឆ្នាំ២០២៥នេះថា នៅក្នុងខេត្តរតនគិរី មានផ្ទៃដីកៅស៊ូក្រុមហ៊ុនចំនួន ២៧,០០០ហិកតា, មានកៅស៊ូគ្រួសារចំនួន៧១,៣៥៦.៧០ហិកតាស្មើនឹង៤៣,៤៦៦.គ្រួសារ ផ្ទៃដីកៅស៊ូជៀជ័រក្រុមហ៊ុនមាន២២,៨៣៦.៤០ហិកតា មានកៅស៊ូគ្រួសារ ចំនួន៦៣,២៦៥.៤០ហិកតា ស្មើនឹង៤០,៤២៩គ្រួសារ។

ដោយឡែក ផ្ទៃដីកៅស៊ូបាក់មានចំនួន៧៨ហិកតា ស្មើនឹង៧៨គ្រួសារ និងផ្ទៃដីដាំដុះឆ្នាំ២០២៥ មាន៤៣៨.៧០ហិកតា ស្មើនឹង ៤៣៨.៧០គ្រួសារផងដែរ៕