(ស្វាយរៀង)៖ កម្លាំងជំនាញ នៃអធិការដ្ឋាននគរបាលស្រុកស្វាយទាប សហការជាមួយកម្លាំងប៉ុស្តិ៍រដ្ឋបាលឃុំកណ្តៀងរាយ គណៈនាយកសាលាវិទ្យាល័យ ហ៊ុន សែន ប្រសូត្រ បានស្រាវជ្រាវករណីបែកធ្លាយវីដេអូសិស្សសាលាណាត់វាយគ្នា ក្រៅសាលានៅលើផ្លូវបេតុង បឹងឈូក ស្ថិតនៅភូមិបន្ទាយ ឃុំកណ្តៀងរាយ ស្រុកស្វាយទាប ខេត្តស្វាយរៀង កាលពីថ្ងៃព្រហស្បតិ៍ទី២៧ ខែវិច្ឆិកា ឆ្នាំ២០២៥ វេលាម៉ោង១១៖១០នាទី។

នគរបាលស្រុកស្វាយទាប បានឲ្យដឹងថា ក្រោយពីស្រាវជ្រាវ សមត្ថកិច្ចបានកំណត់អត្តសញ្ញាណជនសង្ស័យជាសិស្សចំនួន២នាក់ទី១ ឈ្មោះ សេង ស៊ុកសុភក្ត្រា អាយុ១៥ឆ្នាំ រៀនថ្នាក់ទី៩A រស់នៅភូមិប្រសូតទី២ ឃុំកណ្តៀងរាយ ស្រុកស្វាយទាប
និងទី២ ឈ្មោះ វិត ដេវីត អាយុ១៣ឆ្នាំ រៀនថ្នាក់ទី9F រស់នៅភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង។

សមត្ថកិច្ចបានបន្តស្រាវជ្រាវស្វែងរកជនសង្ស័យខាងលើរហូតដល់ម៉ោង២ រសៀលថ្ងៃទី២៩ ខែវិច្ឆិកា ឆ្នាំ២០២៥ ទើបសមត្ថកិច្ចឃាត់ខ្លួនបានជនសង្ស័យចំនួន២នាក់ យកមកអធិការដ្ឋាននគរបាលស្រុកស្វាយទាប ដើម្បីធ្វើការសួរនាំ។

នៅចំពោះមុខសមត្ថកិច្ចជនសង្ស័យទាំង២នាក់ បានឆ្លើយសារភាពថា ពួកខ្លួនពិតជាបានណាត់វាយគ្នានៅផ្លូវបេតុងស្ថិតនៅភូមិក្បាលថ្នល់ ឃុំកណ្តៀងរាយ ស្រុកស្វាយទាប ខេត្តស្វាយរៀង ជាមួយជនរងគ្រោះដែលខ្លួន និងបក្ខពួកព្រួតគ្នាវាយនោះ ឈ្មោះ គិន សំណាង អាយុ១៧ឆ្នាំ រស់នៅភូមិទាហានលើ សង្កាត់ស្វាយតឿ ក្រុងស្វាយរៀង មានជំងឺប្រចាំកាយផងដែរ។

ក្រោយពិនិត្យ និងសួរនាំជនសង្ស័យខាងលើរួច លោកអធិការនគរបាលស្រុកស្ដីទី បានសុំបញ្ជាពីលោកឧត្តមសេនីយ៍ទោស្នងការ និងក្រោមការសម្រ​បសម្រួលពីព្រះរាជអាជ្ញាអមសាលាដំបូងខេត្តស្វាយរៀង ដោយសម្រេចឃាត់ខ្លួន ជនសង្ស័យខាងលើកសាងសំណុំរឿងបញ្ជូនទៅការិយាល័យជំនាញខេត្ត ដើម្បីបន្តនីតិវិធីច្បាប់។

ចំណែកឯ ឈ្មោះ វិត ដេវីត អាយុ១៣ឆ្នាំ មុខរបរសិស្ស រស់នៅភូមិលៀប ឃុំកណ្តៀងរាយ ស្រុកស្វាយទាប លោកអធិការនគរបាលស្រុកស្ដីទី បានសុំការអនុញ្ញាតពីលោកឧត្តមសេនីយ៍ទោស្នងការ និងលោកព្រះរាជអាជ្ញាអមសាលាដំបូង ខេត្តស្វាយរៀង អនុញ្ញាតឲ្យវិលត្រឡប់ទៅផ្ទះវិញ ដោយធ្វើកិច្ចសន្យាអប់រំណែនាំ និងអញ្ជើញអាណាព្យាបាលមកធានាអះអាងយកទៅអប់រំបន្តផងដែរ៕