លោក សេង ទៀង ច្រានចោលព័ត៌មានថា រូបលោកជាប់ពាក់ព័ន្ធទង្វើឆបោកប្រជាពលរដ្ឋ ប្រព្រឹត្តដោយលោកស្រី ប៉ូឡូ និងស្នើសមត្ថកិច្ចចាត់វិធានការច្បាប់
01-12-2025 16:16
(ភ្នំពេញ)៖ លោក សេង ទៀង នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត ប្រកាសច្រានចោលទាំងស្រុងចំពោះការផ្សាយព័ត៌មានថា រូបលោកជាប់ព័ន្ធនឹងទង្វើឆបោកប្រាក់ប្រជាពលរដ្ឋពីសំណាក់លោកស្រី ប៉ូឡូ ចាងហ្វាងកាសែត RFN News។
នៅថ្ងៃទី១ ខែធ្នូ ឆ្នាំ២០២៥នេះ មានការផ្សព្វផ្សាយតាមបណ្តាញសង្គមហ្វេសប៊ុកពីករណីឆបោកប្រាក់ប្រជាពលរដ្ឋប្រព្រឹត្តដោយលោកស្រី ប៉ូឡូ ចាងហ្វាងកាសែត RFN News។ ការផ្សព្វផ្សាយនោះ បានលើកឡើងថា លោកស្រី ប៉ូឡូ បានរត់ការដោះស្រាយជម្លោះដីធ្លីរវាងប្រជាពលរដ្ឋ៨គ្រួសារនៅភូមិទី២ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
ព័ត៌មានផ្សាយទៀតថា លោកស្រី ប៉ូឡូ បានទារលុយពីប្រជាពលរដ្ឋប្រមាណ ៣ពាន់ដុល្លារជាថ្នូរនឹងដោះស្រាយជម្លោះនេះ ហើយលុយនោះគេយកទៅលោក សេង ទៀង។
លោក សេង ទៀង បានថ្លែងប្រាប់ Fresh News ថា លោកមិនស្គាល់បុគ្គលឈ្មោះ ប៉ូឡូ នោះឡើយ ហើយក៏មិនមានជាប់ព័ន្ធអ្វីនោះដែរ។
លោក សេង ទៀង បានស្នើឱ្យសមត្ថកិច្ចតាមរកបុគ្គលឈ្មោះ ប៉ូឡូ នេះ ហើយចាត់វិធានការច្បាប់ បើពិតជាបានយករូបឈ្មោះទៅជាប់ពាក់ព័ន្ធនឹងសកម្មភាពឆបោកប្រជាពលរដ្ឋដូចអ្វីដែលបានផ្សព្វផ្សាយ។
លោក សេង ទៀង បានអំពាវនាវប្រជាពលរដ្ឋសុំកុំជឿរាល់បុគ្គលដែលធានាអះអាងថា បានស្គាល់រូបលោក ហើយរត់ការដោះស្រាយជម្លោះដីធ្លី ឬបញ្ហាផ្សេងៗទៀត ព្រោះរូបលោកមិនមានតួនាទី ឬភារកិច្ចអ្វីទៅអន្តរាគមន៍លើវិវាទនានានោះឡើយ៕
