(ព្រះវិហារ)៖ លោក គីម រិទ្ធី អភិបាលខេត្តព្រះវិហារ នៅព្រឹកថ្ងៃទី១ ខែធ្នូ ឆ្នាំ២០២៥ បានអញ្ជើញសម្ពោធដាក់ឱ្យប្រើប្រាស់ជាផ្លូវការនូវអគារសិក្សាថ្មី១ខ្នង ៤បន្ទប់ និងសមិទ្ធផលនានា នៅសាលាបឋមសិក្សាប្រាសាទខ្នារ ស្ថិតក្នុងភូមិស្វាយ ឃុំរណសិរ្ស ស្រុកសង្គមថ្មី ជាអំណោយរបស់ក្រុមហ៊ុនម៉ាឃីតត្រាស់ (Market Trust Co., Ltd) តាមរយៈអង្គការជប៉ុនសាងសង់សាលារៀនឲ្យកុមារ (JHP) ដោយចំណាយថវិកាសាងសង់ប្រមាណជាង ៦ម៉ឺនដុល្លាអាមេរិក។

លោក ជូនអ៉ិជិ ខាវ៉ាមារ៉ូ តំណាងលោក ខាណុ យូតាកា ប្រធានក្រុមហ៊ុនម៉ាឃីតត្រាស់ បានថ្លែងថា៖ដោយបានសង្កេតឃើញស្ថានភាពសាលាមានសភាពចាស់ទ្រុឌទ្រោម និងការខ្វះខាត បានជំរុញឱ្យលោកសម្រេចចិត្តគៀងគរសប្បុរសជន និងថវិកាផ្ទាល់ខ្លួន ដើម្បីសាងសង់អគារសិក្សាថ្មីនេះឡើង ដើម្បីឱ្យក្មួយៗសិស្សានុសិស្ស រៀនសូត្រប្រកបដោយផាសុកភាព សុវត្ថិភាព ដោយមិនបារម្ភពីបញ្ហាត្រូវទទឹកភ្លៀង ឬកម្ដៅថ្ងៃទៀតឡើយ។ លោកបានផ្តាំផ្ញើឱ្យសិស្សានុសិស្ស ទាំងអស់ខិតខំរៀនសូត្រឱ្យបានពូកែ ដើម្បីយកចំណេះជំនាញ មកអភិវឌ្ឍប្រទេសជាតិរបស់យើងទៅថ្ងៃអនាគត។

លោក គីម រិទ្ធី អភិបាលខេត្តព្រះវិហារ បានសម្តែងនូវការ អបអរសាទរជាមួយបងប្អូនប្រជាពលរដ្ឋ លោកគ្រូ អ្នកគ្រូ និងសិស្សានុសិស្សទាំងអស់ ដែលទទួលបានសមិទ្ធផលថ្មីនេះ ជាមួយនឹងការថ្លែងអំណរគុណ និងកោតសរសើរ យ៉ាងស្មោះចំពោះទឹកចិត្តសប្បុរសធម៌របស់ក្រុមហ៊ុនម៉ាឃីតត្រាស់ និងសប្បុរសជននានា ដែលបានលះបង់ធនធានផ្ទាល់ខ្លួនជួយសាងសង់អគារ សាលាបឋមសិក្សានេះ ក៏ដូចជាការងារមនុស្សធម៌ជាច្រើនទៀតនៅតាមតំបន់ផ្សេងៗ។

លោកអភិបាលខេត្តព្រះវិហារ បានថ្លែងបញ្ជាក់ថា៖កាយវិការដ៏ប្រពៃនេះ គឺជាការបង្ហាញនូវទឹកចិត្តសប្បុរសធម៌ និងការយកចិត្តទុកដាក់ខ្ពស់ ចំពោះអនាគតកុមារជំនាន់ក្រោយ ដែលនឹងក្លាយជាទំពាំងស្នងឬស្សី របស់ប្រទេសជាតិ។ជាមួយគ្នានេះលោកក៏បានថ្លែងកោតសរសើរចំពោះ អាជ្ញាធរស្រុកសង្គមថ្មី ដែលបានខិតខំប្រឹងប្រែងយ៉ាងសកម្មក្នុងការគៀងគរ និងទាក់ទាញសប្បុរសជន ឱ្យចូលរួមចំណែកជួយសាងសង់ ហេដ្ឋារចនាសម្ព័ន្ធអប់រំដ៏មានសារៈសំខាន់នេះ។

លោក គីម រិទ្ធី ក៏បានថ្លែងផ្ដាំផ្ញើដល់អាជ្ញាធរស្រុកសង្គមថ្មី លោកគ្រូ អ្នកគ្រូ សិស្សានុសិស្ស ត្រូវចូលរួមថែទាំ និងសម្អាតបរិវេណសាលាទាំងក្នុង និងក្រៅ ពិនិត្យមើលបង្គន់អនាម័យ នឹងរួមគ្នាដាំដើមឈើដើម្បីទទួលបានបរិស្ថានបៃតងនៅក្នុងសាលាផងដែរ៕