(ភ្នំពេញ)៖ របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងឆ្នាំ២០២៥នេះ ក្រសួង ​និងមន្ទីរ​បានចេញលិខិតអនុញ្ញាតសាងសង់​ ចំនួន ៣ ៥០៣គម្រោង ដែលមានផ្ទៃក្រឡាកម្រាលសំណង់​ជាង ១៨លានម៉ែត្រការ៉េ ក្នុងតម្លៃទុនវិនិយោគប្រមាណ៧ ៣២០ ​លានដុល្លារ ​កើនឡើង ៦៨,៨៩% ​បើធៀបនឹងរយៈពេលដូចគ្នា កាលពីឆ្នាំ២០២៤ ដែលតម្លៃ​ទុនវិនិយោគប្រមាណ ៤ ៣៣៤ ​លានដុល្លារ និងគម្រោងសាងសង់សរុបមានចំនួន ២ ៦២២គម្រោង។

របាយការណ៍នេះបានបញ្ជាក់ថា ការចេញលិខិតអនុញ្ញាតសាងសង់ថ្នាក់ក្រសួង​ មានចំនួន ៥២១គម្រោង ផ្ទៃក្រឡាកម្រាលសំណង់ចំនួនជាង ១៧លានម៉ែត្រការ៉េ និងមានតម្លៃប៉ាន់ស្មានទុនវិនិយោគប្រមាណជាង ៦ ៧៤០ ​លានដុល្លារ បើធៀបនឹងរយៈពេលដូចគ្នាឆ្នាំ២០២៤ កើនឡើង ៧៣.៧០% ដែលមានទុនវិនិយោគប្រមាណ៣ ៨៨០ ​លានដុល្លារ និងមានចំនួន២៩៣គម្រោង​។

ចំណែកការចេញលិខិតអនុញ្ញាតសាងសង់ថ្នាក់រាជធានី ខេត្ត មានចំនួន ២ ៩៨២គម្រោង ​ក្នុងតម្លៃប៉ាន់ស្មានទុនវិនិយោគប្រមាណ ៥៧៩ លានដុល្លារ បើធៀបនឹងរយៈពេលដូចគ្នា ឆ្នាំ២០២៤ កើនឡើង២៧.៩៣%​​ ដែលទុនវិនិយោគប្រមាណ ៤៥៣លានដុល្លារ និងមានចំនួន២ ៣២៩គម្រោង។ ​

របាយការណ៍នេះបានបញ្ជាក់ថា យ៉ាងដូច្នេះថា គិតពីចាប់ផ្តើមអនុវត្តឆ្នាំ២០០០ ដល់ឆ្នាំ២០២៥ បានចេញលិខិតអនុញ្ញាតសាងសង់នៅទូទាំងប្រទេស ចំនួន ៧២ ៨២០គម្រោង ​ និងតម្លៃប៉ាន់ស្មានទុនវិនិយោគ ​សរុបប្រមាណ៨៧ ៦៩៦ លានដុល្លារ។

ក្រសួងរៀបចំដែនដីបានបញ្ជាក់ថា វិស័យសំណង់ដើរតួនាទីយ៉ាងសំខាន់ក្នុងការស្តារ និងអភិវឌ្ឍសង្គមជាតិ និងជំរុញកំណើនសេដ្ឋកិច្ចគ្រួសារ និងសេដ្ឋកិច្ចជាតិ។ ពីមួយអាណត្តិទៅមួយអាណត្តិ រាជរដ្ឋាភិបាលកម្ពុជា បានដាក់ចេញនូវគោលនយោបាយបន្ត ពង្រឹងការគ្រប់គ្រងនិងការអភិវឌ្ឍវិស័យសំណង់ ដែលជាសសរស្តម្ភមួយនៃកំណើនសេដ្ឋកិច្ច ដោយផ្តោតលើការ ជំរុញការវិនិយោគក្នុងវិស័យសំណង់ ការកសាងច្បាប់ ការដាក់ចេញបទប្បញ្ញត្តិបច្ចេកទេស និងការកែលម្អសេវា សាធារណៈជូនប្រជាពលរដ្ឋ។

ក្រសួងបានពង្រឹងការត្រួតពិនិត្យ និងទប់ស្កាត់ការសាងសង់រំលោភលើដី សាធារណៈរបស់រដ្ឋ ការសាងសង់គ្មានលិខិតអនុញ្ញាត ការសាងសង់ខុសលិខិតអនុញ្ញាតសាងសង់ និងបានតម្រូវ ឱ្យម្ចាស់ការដ្ឋានរៀបចំឱ្យមានអាងប្រព្រឹត្តិកម្មទឹកកខ្វក់មុនបង្ហូរចូលល្អសាធារណៈ ដើម្បីចៀសវាងការប៉ះពាល់ ដល់សោភណភាព សុវត្ថិភាព សណ្តាប់ធ្នាប់សាធារណៈ និងបរិស្ថាន។

បើតាមក្រសួងរៀបចំដែនដី នគរូបនីយកម្ម និងសំណង់ គិតមកទល់ពេលនេះ គម្រោងអគារខ្ពស់ៗចាប់ពី ៥ជាន់ឡើង មានចំនួន២២៨គម្រោង ស្មើនឹង២៨៨អគារ ក្នុងនោះនៅរាជធានី ភ្នំពេញ មានចំនួន៦៨គម្រោង ស្មើនឹង១០៣អគារ ខេត្តព្រះសីហនុមានចំនួន៣០គម្រោង ស្មើនឹង ៣១អគារ និងខេត្តបន្ទាយមានជ័យមានចំនួន១០៥គម្រោង ស្មើនឹង១១១អគារ និងនៅតាមបណ្តា ខេត្តផ្សេងៗទៀតមានចំនួន៤៣អគារ​។ ​ អគារពី៥ទៅ៩ជាន់ មានចំនួន១៧៩អគារ, អគារចាប់ពី១០ទៅ១៩ជាន់ មានចំនួន៨៩អគារ ,អគារពី២០ទៅ២៩ជាន់ មានចំនួន១៥អគារ, អគារពី៣០ទៅ ៣៩ជាន់ មានចំនួន១អគារ,​ និងអគារពី៤០ជាន់ឡើងទៅ មានចំនួន៤អគារ។

ចំណែកសំណង់លំនៅឋានមានចំនួន២ ៧២៤គម្រោង ​មានតម្លៃប៉ាន់ស្មានទុន​វិនិយោគ២ ៥១២ ​លានដុល្លារ។ ក្នុងនោះ ​បុរីលំនៅឋាននិងបណ្ដុំលំនៅឋានមានលក្ខណៈ ជាបុរីមានចំនួន៥៦គម្រោង ស្មើនឹង៩ ៥២៧ខ្នង ​មានតម្លៃប៉ាន់ស្មានទុនវិនិយោគប្រមាណ ១ ៥២៨ លានដុល្លារ។​ អគារផ្ទះល្វែងមានចំនួន១២ ៩៤០ល្វែងខ្នង ​មានតម្លៃប៉ាន់​ស្មានទុនវិនិយោគប្រមាណ១ ៨២៩ លានដុល្លារ និង ​អគារស្នាក់នៅរួមមាន ចំនួន១៣៦គម្រោង ​តម្លៃប៉ាន់ស្មានទុនវិនិយោគប្រមាណជាង ៦៨២ ​លានដុល្លារ​៕