(កំពង់ស្ពឺ)៖ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ នាព្រឹកថ្ងៃទី០២ ខែធ្នូ​ ឆ្នាំ​២០២៥ បានអញ្ជើញ​​ចែកនូវសម្ភារៈដំណេក មានដូចជា ពូក ស្រោមពូក ខ្នើយ ស្រោមខ្នើយ ភួយដណ្ដប់ ដល់នាយទាហាន​ នាយទាហានរង​​ ក្នុងកងអនុសេនាធំចល័ត កងរាជអាវុធហត្ថខេត្តកំពង់ស្ពឺ​​ ស្របពេលក្នុងរដូវខែរងានេះ។

សកម្មភាព​នេះស្តែងចេញឱ្យឃើញពីការគិតគូរនិងយកចិត្តទុកដាក់បំផុតរបស់ មេបញ្ជាការ​ ដល់ការរស់នៅហូបចុកប្រចាំថ្ងៃ និងដំណេក​ ចំពោះ​នាយទាហាន​ នាយទាហានរង ដែលមានភាពហត់នឿយ ក្រោយពេលបំពេញភារកិច្ចការងាររួច​​ ដែលបានឆ្លុះបញ្ចាំងឱ្យឃើញនៅពាក្យស្លោករបស់ខ្មែរយើង (មានន័យថាមេប្រៀបបានដូចជាឪពុក និងម្ដាយ)។

ក្នុងឱកាសនេះផងដែរ លោកឧត្តមសេនីយ៍​ត្រី​ ម៉េ​ង​ ស្រ៊ុន​ បានពាំនាំនូវការសួរសុខទុក្ខរបស់នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ ជាមេបញ្ជាការកងរាជអាវុធហត្ថលើផ្ទៃប្រទេស ជូនចំពោះនាយទាហាន នាយទាហានរង​ នៃកងរាជអាវុធហត្ថខេត្តកំពង់ស្ពឺទាំងអស់ ព្រមទាំង ក្រុមគ្រួសារ និងពាក្យជូនពរ ឱ្យជួបប្រទះតែសេចក្តីសុខ សុភមង្គល សុខភាពល្អបរិបូណ៌ និងជោគជ័យគ្រប់ការងារថែមទៀតផង៕