(ព្រះវិហារ)៖ នៅថ្ងៃទី០២ ខែធ្នូ ឆ្នាំ២០២៥កន្លងទៅនេះ ឧត្តមសេនីយ៍ឯក ស្រី ឌឹក មេ​បញ្ជា​​​ការរង​កងទ័ពជើងគោក និងជាមេបញ្ជាការកងពលធំអន្តរាគមន៍លេខ៣ បាន​បង្ហាញ​មុខជាសាធារណៈនៅក្នុងពិធីប្រគល់អំណោយដល់កងទ័ព និងគ្រួសារកងទ័ព​នៅ​ទិសខេត្តព្រះវិហារ។ ពិធីនេះត្រូវបានធ្វើឡើងក្រោមអធិបតីភាពសម្តេច ម៉ែន សំអន។

ការបង្ហាញមុខជាសាធារណៈរបស់ឧត្តមសេនីយ៍ឯក ស្រី ឌឹក គឺជាការបញ្ចប់នូវមន្ទិល និងព័ត៌មានអកុសលទាំងឡាយ ដែលសារព័ត៌មានថៃ បានផ្សាយនាពេលកន្លងទៅ។

ក្រោយបញ្ចប់សង្គ្រាម៥ថ្ងៃ (២៤-២៨ ខែកក្កដា) នៅតាមព្រំដែនកម្ពុជា-ថៃ សារព័ត៌​មាន​ថៃទាំងទូរទស្សន៍ កាសែត និងអនឡាញ បានផ្សាយយ៉ាងខ្លាំងក្លាបំផុតនូវព័ត៌​មាន​អកុ​សលថា លោកឧត្តមសេនីយ៍ឯក ស្រី ឌឹក បានទទួលមរណភាព​លើសម​រភូមិ​។

ការ​ផ្សាយទាំងនេះ បានបង្កើតនូវមន្ទិលសង្ស័យមួយចំនួនលើសាធារណជនរបស់ខ្មែរ ហើយ​រហូតក្រុមប្រឆាំងក្រៅប្រទេសខ្លះ ចោទប្រកាន់ថា កម្ពុជាលាក់បាំងព័ត៌មានម​រណ​​ភាពរបស់​ឧត្តមសេនីយ៍ឯក ស្រី ឌឹក ថែមទៀតផង។

នៅពេលនេះអ្វីៗហាក់បានបង្ហាញច្បាស់លាស់ហើយ រូបភាពលោកឧត្តមសេនីយ៍ ស្រី ឌឹក ក្នុងពិធីប្រគល់អំណោយនោះ ជារូបពិតៗ មិនមែនជាការប្រឌិត ឬច្នៃដោយ AI នោះឡើយ (បញ្ជាក់ការពិតដោយ Fresh AI) ។ ក្រោយការពិតត្រូវបានបង្ហាញបែបនេះ ជាការឆ្លុះបង្ហាញឱ្យឃើញថា ការ​ផ្សាយរបស់សារព័ត៌មានថៃនាពេលកន្លងទៅ ខ្វះការផ្ទៀងផ្ទាត់ និងខ្វះក្តីគោរពដល់​ក្រឹត្យ​​ក្រម​សារព័ត៌មាន ជាពិសេសបង្ហាញឱ្យឃើញពីកម្សោយនៃការផ្សាយរបស់​សារ​ព័ត៌​មានតែម្តង។

ក្រោយការពិតត្រូវបានលាតត្រដាងបែបនេះហើយ តើបណ្តាញសារព័ត៌មានថៃ ដែល​ធ្លាប់បានផ្សាយព័ត៌មានអកុសលលើឧត្តមសេនីយ៍ ស្រី ឌឹក ហ៊ានផ្សាយបំភ្លឺ ឬហ៊ានទទួលស្គាល់នូវកម្សោយនៃការផ្សាយរបស់ខ្លួនដែរឬទេ?